नेकपा दुनेया ल्वापु प्वाः तिनाः ज्वया वल

न्ह्यानाच्वंगु धलय् प्वाः तिना बिल धायेवं धः तज्यानाः गनं गनं छिं अनं अनं लः पिहां वयाः झन् जक फोहर जुइ । सत्तारुढ दल नेकपा दुने खने दयाच्वंगु कचवं नं मिले जुल धाःगु ला ध्वम्प्वाः प्वाःती थें जक जूगु खनेदत । खने दयेक फोहर पिहां वयेगु छझाः ला बन्द जूगु खः, तर कर्णाली प्रदेशय् थःगु हे पार्टीया मुख्यमन्त्रीया विरुद्ध अविश्वासया प्रस्ताव अले मन्त्रिमण्डल पुनर्गठनय् प्रधानमन्त्रीं थः मनू जक दुकाःगु स्वयेबलय् म्हुतु छप्वाः जक यचुगु जुल, ज्या धाःसा वँचुगु हे खनेदत ।

पार्टी तछ्यायेगु अध्यादेश काण्डनिसें सकसियां न्ह्यःने खनेदुगु नेकपा दुनेया शक्ति संघर्ष दथुइ छक्वः मत्थर जूगु खः । लिपा हाकनं सनेवं थःगु हे पार्टीया मनूत भारतया इशाराय् थःत क्वःथलेत जूपिं धकाः चार्ज लगे यात । थ्वयां लिउ ला नेकपा दुनेया शक्ति संघर्ष चरमचुलीइ हे थ्यन । ओलीयात चीकाछ्वइगु व पार्टी विभाजन जुइगु तक खँ थ्यन । स्थायी कमिटीया ४५म्ह मध्ये ३१म्हेस्यां ओलीया राजीनामा फ्वन । अनंलि स्थायी कमिटीया मुँज्या हे मच्वंबलय् केन्द्रीय कमिटीया दुजःतसें केन्द्रीय कमिटीया मुँज्या सःतेमाःगु माग यात । अन्ततः एकतर्फी स्थायी कमिटीया मुँज्या नं च्वन । तर एकतर्फी स्थायी कमिटीया मुँज्यायात ओली पक्षं मान्यता मबीगु खनेदुगुलिं व एकतर्फी हे यानाः न्ह्यायेगुलिइ मवँसे प्रचण्ड-माधव पक्ष कुहां वयाः सुलहय् वन ।

प्रधानमन्त्री केपी शर्मा ओलीं पार्टी अध्यक्ष वा प्रधानमन्त्री त्वःतेमाः धकाः माग यासें यदि माने मजुल धाःसा निगुलिं पदं लिकायेगु धकाः सना जूपिं व पार्टीया विधि व प्रक्रिया खँ ल्हाना जूपिं धइपिं पार्टीया वरिष्ठ नेतापिं झलनाथ खनाल व माधव कुमार नेपाल खः । तर केपीया न्ह्यःने खँ तयेगु, सचिवालायया बैठक सःतेगु आदि खँय् मेम्ह अध्यक्षनाप सल्लाह यानाः ज्याखँ तय यायेफुगु थासय् ला मेम्ह अध्यक्ष पुष्पकमल दाहाल प्रचण्ड हे लानाच्वन । थ्व ल्याखं झलनाथ व माधव नेपालया विचाः व माग जूसां ज्याखँय् नेतृत्व नं प्रचण्डं हे यानाच्वन । मेम्ह अध्यक्ष व प्रधानमन्त्री केपी शर्मा ओलीं पुलांपिं एमाले छधी जुयाः पुलांपिं माओवादी पक्षयात पाखा लगे यायेगु दाउ नं म्हितलसा लिपा वनाः प्रचण्डयात हे मुक्कं पार्टी चले यायेगु कार्यकारी अधिकार बीगु धकाः मिलेमतो यात । थ्व मिलेमतो यायेगु इच्छा झलनाथ व माधवया मखु। अथे खःसां इमिगु नेतृत्व यानाच्वंम्ह प्रचण्ड हे मिलेमतोय् वंबलय् इमिगु छुं लगे मजुल । हाकनं प्रचण्डनाप मिले जूगु स्थितिइ जक माधव पक्ष ल्याखय् वइगु जूगुलिं नं प्रचण्डयात त्वःताः ओलीयात हाथ्या बीफुगु अवस्था मदु। अन्ततः निम्ह नायः मिले जुयाः कार्यदलया सिफारिसकथं नेकपा दुनेया कचवं ज्यन धाल ।

मेम्ह अध्यक्ष व प्रधानमन्त्री केपी शर्मा ओलीं पुलांपिं एमाले छधी जुयाः पुलांपिं माओवादी पक्षयात पाखा लगे यायेगु दाउ नं म्हितलसा लिपा वनाः प्रचण्डयात हे मुक्कं पार्टी चले यायेगु कार्यकारी अधिकार बीगु धकाः मिलेमतो यात । थ्व मिलेमतो यायेगु इच्छा झलनाथ व माधवया मखु ।

थथे जूबलय् विधि व प्रक्रिया धकाः हालाजूपिं हे भागबण्डाय् वन धकाः धाल आः भागबण्डाकथं हे मन्त्रिमण्डल पुनर्गठन जुइगु व छुं मुख्यमन्त्रीपिं हिलेगु ज्या जुइ धकाः नं व्यापक अनुमान जुल । तर वामदेव गौतम छम्हेसित राष्ट्रियसभाय् यंकेगु निंतिं प्रचण्ड हे हालाबीमाःगु अवस्था वलसा वामदेव ओलीयात त्वःताः प्रचण्ड व माधव खेमाय् वनीगु स्थिति नं पिदन । थुकथं वामदेव छम्हेसित राष्ट्रियसभाय् यंकेगु निंतिं तकं ओलीयात काके माःगु अवस्था वल । पार्टीया मनूतय्गु थ्व हे पहः खनाः खइ, कांग्रेस निकटया वकिल दिनेश त्रिपाठीं वामदेवया विरुद्ध अदालतय् मुद्दा तयाबिल । अदालतं नं वामदेवयात मेगु जिम्मेवारी बी दइमखु धकाः अन्तरिम आदेश जारी यात । थुकिं वामदेवयात मन्त्री नकेगु खँयात पनाबिल । नापं थुकिं वामदेवया गाक्कं मानमर्दन नं जूगु दु। नारायणकाजी श्रेष्ठ नं चुनावय् हे बूम्ह खः । तर वयागु सम्बन्धय् छुं विवाद पिहां मवः तर वामदेवया सम्बन्धय् गुगु विवाद पिहां वयाच्वन, व ज्या आल्पसें हे जुयाच्वंगु खः ।

थ्वयांलिउ मन्त्रिमण्डल पुनर्गठन यायेगु धकाः  ओली व प्रचण्ड नाप लाःगु बुखँ तःक्वः हे पिहां वल । तर थथे नाप लाःगु बुखँया सिलसिला पिहां वये न्ह्यः हे प्रधानमन्त्री ओलीं मन्त्रीतय्त मन्त्रिमण्डल पुनर्गठन जुइमखु, ढुक्क जुयाः ज्या या धकाः धाल । अप्वःसिनं अबलय् मन्त्रीतय्त आश्वस्त यायेत जक थ्व खँ धाःगु जुइमाः धकाः अनुमान याःगु खः । छुं ई न्ह्यः दुपिं मन्त्रीतय्त चीकीमखु, बरु प्वनाच्वंगु थाय् जक जायेकी धकाः बुखँ पिहां वल । जूबलय् नं उकथं हे जुल । प्रधानमन्त्रीं थः मनू स्वम्हेसित जक मन्त्रिमण्डलय् तये हल । उकी न्हापा नं अर्थमन्त्री जुइधुंकूम्ह विष्णु पौडेलयात अर्थमन्त्री बिउगु व ईश्वर पोखरेलयात रक्षा मन्त्रीं चीकाः प्रधानमन्त्री व मन्त्रिपरिषदया जिम्मा बिउगु खँ विशेष चर्चाया विषय जुयाच्वंगु दु। ईश्वर पोखरेल पार्टी कचवंया इलय् खास भूमिकाविहीन जुयाः मन्त्री जक चले यायेगु ज्याय् सना जूम्ह मनू खः । लिपा वनाः सेनालिसे नं विवाद जूगु धइगु खँ पिहां वःगु खः । थ्व ल्याखं पोखरेलयात नं प्रम ओलीं सजाय हे बिउगुकथं कायेमाःगु खनेदु ।

मेखे कर्णाली प्रदेशय् मुख्य मन्त्री महेन्द्रबहादुर शाहीया विरुद्ध थःगु हे पार्टीया १८ म्ह सांसदतय्सं अविश्वासया प्रस्ताव तल । थुकिं छगू तरंग हे पिहां वल । पूर्व माओवादीया भागय् लानाः मुख्यमन्त्री जुयादीम्ह मुख्यमन्त्री शाही सुरक्षित यानाः बरु १ नम्बर प्रदेशया मुख्यमन्त्री शेरधन राई व ३ नम्बर अर्थात् बागमती प्रदेशया मुख्यमन्त्री डोरमणि पौडेलयात हिलेगु खँ चर्चाय् वयाच्वंगु खः । थुकिया थासय् महेन्द्रबहादुर शाही विरुद्ध अविश्वासया प्रस्ताव वःगु धइगु ओलीं प्रचण्डयात प्रहार याःगु खः । कर्णालीया सवालय् प्रचण्डयात प्रहार यायेगु व मन्त्रिमण्डल पुनर्गठनय् थः मनू जक तयाः प्रचण्डयात म्वाय् चुइकेगु ज्या प्रधानमन्त्री ओलीं याःगु दु।

थुकियात प्रचण्डं गुगु कथं याइगु खः व थःगु पाखें छु अभिव्यक्ति व पलाः न्ह्याकीगु खः, थ्व स्वये ल्यंदनि । कर्णालीया मुख्यमन्त्री विरुद्ध अविश्वासया प्रस्ताव वःबलय् थुकियात ओलीं हे स्वयेमाः धकाः न्ववानाः थःगु पोजिसन क्यनेगु ज्या याःगु खः । ओलीयात चीके धायेगु तर चीकेमफुगु धइगुहे ओलीं प्रचण्डयात मन्त्रिमण्डल पुनर्गठन यानाः म्वाय् चुइका बिउगु व कर्णालीया मुख्यमन्त्रीयात नतूचां सुइगु ज्या याःगु खँ थुइकेत थाकु मजू । आः नेकपा दुनेया बुलुमि जुयावंगु विवाद हाकनं गुगुं इलय् सतहय् पिहां वल धाःसां अजू चायेमाली मखु ।

सम्बन्धित बुखँ

LEAVE YOUR COMMENTS