थ्व हे रामवण जुइ !
अख्तियारं धाइ । ‘भूमिसुधार, नापीया कर्मचारीतय्त भ्रष्टाचारया कारवाही याःसा, इपिं अफिस हे खाली जुइ । शुन्य जुइ ।’ गुलि दुःखद् व लज्जास्पद खँ । भूमि सुधार, नापी विभागया जक खँ मखु । थौं देय्या हरेक सरकारी क्षेत्रया खँ वइ । भ्रष्टाचारया दृष्टिं कारवाही याःसा शायद देय् हे सरकारविहीन जुइ । खाली जुइगु सम्भावना जुइ ।
उकिं । थौं । देशय् सरकारविहीनया स्थितियात पनेत नं भ्रष्टाचारया कारवाहीयात दिकेमाः । जनतां मिखा तिस्सिनाः सह यानाः च्वनेमाः । जग थुना बिल धाःसा छेँ छखां गल्र्यामगुर्लुम जुइ । दुनी । क्षत विक्षत जुइ । देय्या क्वातुगु जग जुइ थौं भ्रष्टाचार । भ्रष्टाचारया जगयात संकल कि, थुन कि । देय् हे दुनी । गन ल्यनी ?
उकिं देय्या सुरक्षाया निंतिं नं भ्रष्टाचारयात धिसिमिसि धायेकेमाः । बल्लाकेमाः । क्वातुकेमाः । अख्तियारया मूल्यांकन पाय्छि जू । भ्रष्टाचारया कारवाही यानं छु याये ! देय् सरकारी ज्याकूविहीन जुइ । अःखबतं देशय् अराजकस्थिति वइ । भ्रष्टाचार स्वयां नं ग्यानापुगु परिस्थिति जुइ । हाहाकार जुइ । उकिं सरकारया न्यूनतम अनुभूतिया निंतिं नं भ्रष्टाचारयात स्वीकार यायेमाः ।
भ्रष्टाचार शुन्य प्रशासन सिर्जना याये । मन्त्रीजुया धापू ठीक जू । खाली थासय् भरे जुइ । याइ । थौंकन्हय् भूमिसुधार, नापी विभागय् सरुवा जुइगुया निंतिं तच्वःगु लेनदेन जुइ धाइ । मन्त्रीजुया ‘यानां त्वःते’या संकेत थुखेपाखे हे जुइमाः । नं नयात चाइ ।
भ्रष्टाचारप्रति अनुग्रहित जुइमाः । भ्रष्टाचारया जय माने यायेमाः ।तर सम्बन्धित मन्त्रीं माकःफुइँ याइ । भूमिसुधार, नापी विभाग खाली जूसा जुइ । भ्रष्टाचारीतय्त कारवाही याये । यानां त्वःते । खालिगु थासय् न्हूपिं शुद्ध कर्मचारीतसें जायेके । भ्रष्टाचार शुन्य प्रशासन सिर्जना याये । मन्त्रीजुया धापू ठीक जू । खाली थासय् भरे जुइ । याइ ।
थौंकन्हय् भूमिसुधार, नापी विभागय् सरुवा जुइगुया निंतिं तच्वःगु लेनदेन जुइ धाइ । मन्त्रीजुया ‘यानां त्वःते’या संकेत थुखेपाखे हे जुइमाः । नं नयात चाइ । अथे हे भ्रष्टाचार शुन्य यायेत भ्रष्टाचार हे छ्यलेमाः । भ्रष्टाचारं हे जक सम्भव जुइ । भ्रष्टाचार शुन्य यानां त्वःते । मन्त्रीजुया अठोटया भाय् स्पष्ट जुइ ।
‘मूलुखां झाये मते, क्यब लुखां झासँ’ भ्रष्टाचारयात संबोधन यानाः मन्त्रीजुं हाःगु मतिनाया म्येँ जिगु न्हाय्पनय् थ्वइ । न्हाय्पं हे नइ थें च्वं थ्वया वइ । खँयाखँय् । मेम्ह मन्त्री भाजु थनथाय् लुमना वइ । थौं देशय् नये जिउगु शुद्ध पदार्थ छुं हे मदयेधुंकल । फुक्क अखाद्य । गुणस्तरहीन । दुरुया पाकेट, जारय् च्वंगु लः, मियातःगु ला फुक्क दूषित, विषाक्त ।
मन्त्रीजु स्वयम थः हे फ्याक्ट्री फ्याक्ट्रीइ वनी । उत्पादित वस्तुत खनी । फुक्क गुणस्तरहीन । मन्त्रीजु स्वयमं हे थ्व दुर्दशायात कयाः नवाइ । कुं खिनी । तर थन न्ह्यसः दनी । मन्त्री थेंज्याःम्ह जिम्मेवार व्यक्तिं मात्र कुं खिनां गाःला ? थुलिं हे थःगु कर्तव्य पालना जूगु ठहर जुइ ला ? थन दूषित, अखाद्य लः, दुरु, लाया विषयय् मसिउपिं सु दु ? सकसिनं सिउ ।
गुणस्तर विभाग मोहनि, स्वन्ति वल कि खूब सक्रिय जुइ । बजारय् मीत तयातःगु ला, अखाद्य, मरिचरिइ तयातःगु रंग विषाक्त । हल्ला याइ । हल्लां हे जक थःगु ज्याखं क्वचायेकी । समस्या, चिन्ता, पीर ला जनतायात जुइ, उपभोक्तायात जुइ । बजारय् दुगु वस्तुत व हे खः । विष धाःसां नये हे माः । माल ।
थौं बजारय् च्वंगु वस्तुत म्वायेया लागि नयेगु मखसे ल्वय् पियाच्वनेगु निंतिं जुयाच्वंगु दु । अकाल मृत्युया लँ स्वयाः छ्यले मालाच्वंगु दु । विषाक्त, अखाद्य वस्तुत धयाः छु याये ? भाः न्हियान्हिथं थिके जुया वनी । मभिंगु, बांमलाःगु नसात्वँसा धकाः दंकं लाइगु मखु । अनियन्त्रित बजाःया कारणं मनूतय् सामान्य जीवन हे मिं पू थें जुयाच्वंगु दु ।
तर । जीवन मरणलिसेया स्वापू दुगु थज्याःगु न्ह्यःयात कयाः सुयात धयेगु ? सुयात धाः वनेगु ? मन्त्रीजुपिंत धाःवंसा ‘जिमिसं दूषित यानागु ला ? जिमिसं थिके यानागु ला ? धाइ । सत्ययुगया भावं नये दइला ? ई अनुसार थिके जुइका ।’ तप्यंगु लिसः वइ । थन अखाद्य वस्तुत एक मिनेटं हे खाद्य जुइ । जादू याये थें अखाद्य वस्तुयात ध्यबा थीकेमाः ।
अनया अन हे खाद्य जुइ । गज्याःगु चमत्कार थौंकन्हय् ।सरकारं न्हू न्हूगु प्रतिवाद व आत्मरक्षाया लँपुत लुइका हःगु दु । छ्यला हःगु दु । समाजय् जुयाच्वंगु हत्या, बलात्कार, सामाजिक अपराधया कारणं फुक्क पूँजीवाद, अय्लाः, गजि, लागू वासःया दुने चिइका बिउगु दु । थुकी समाजवादी सरकारया छुं दोष मदु । थौं सरकारं स्पष्ट याइ । धाइ ।
देशय् दयाच्वंगु भ्रष्टाचार, मूल्यवृद्धि, अखाद्य वस्तुतय् बेचविखन, दूषित नसाज्वलंया बजाःया दोषी, देशी–विदेशी पूँजीवादी दलालत खः ।
अय्लाःगुलु, गजिगुलु, लागू वासः नइपिनि कुकृत्य खः । देशय् अस्थिरता कायम यायेगु कुनियतं थुपिं सक्रिय जुयाच्वंगु दु । उकिं सरकारया मखु, पूँजीवादया विरोध यानादिसँ । फुक्क दक्व ठीक जुइ । ल्वय् लायेकेगु रामवाण थ्व हे जुइ ।
LEAVE YOUR COMMENTS