
येँ- थनया स्वयम्भूइ च्वंगु आनन्दकुटी विद्यापीठयात आइसोलेसन सेन्टर दयेकीगु जूगु दु । थौंकन्हय् अथें लानाच्वंगु आनन्दकुटी विद्यापीठयात ५० बेड क्षमाताया आइसोलेसन सेन्टर दयेकेत्यंगु खः ।
येँ क्षेत्र नं. ८या प्रतिनिधिसभा सदस्य जीवनराम श्रेष्ठं सांसद विकास कोषपाखें आनन्दकुटीयात आइसोलेसन सेन्टर दयेकेत्यंगु खः । सांसद श्रेष्ठं कोषपाखें छगू करोड न्यय्गू लाख पीद्वः तका दां विनियोजन यानादीगु दु । आइसोलेसन दयेके न्ह्यः सांसद श्रेष्ठं आनन्दकुटी विद्यापीठया निरीक्षण नं यानादीगु खः ।
सांसद श्रेष्ठं विश्वन्यंकं महामारीया रुप कयाच्वंगु कोरोना भाइरस (कोभिड–१९)या संक्रमणया निगूगु लहर खने दयाच्वंगु इलय् नेपालय् नं थ्व अवस्था वये फुगुयात ध्यानय् तयाः पूर्व तयारी यायेकथं आइसोलेसन दयेकेत्यनागु जानकारी बियादीगु दु । आनन्दकुटीयात आइसोलेसन दयेकाः अन ‘हाइ फ्लो’या अक्सिजन बीमाःपिं ल्वगियात जक तयेगु व संक्रमितयात तसकं असहज जूगु अवस्थाय् चिकित्सकतय् परामर्शय् अस्पताल यंकेगु नं व्यवस्था यायेगु वय्कलं कनादिल ।
थनिं ६८ दँ न्ह्यः श्रद्धेय भिक्षु अमृतानन्द महास्थविरं पलिस्था यानाबिज्याःगु आनन्दकुटी विद्यापीठ थेंज्याःगु स्वयम्भू परिसरया पवित्र थासय् निर्माण जुइगु आइसोलेसनय् च्वनीपिनिगु आवश्यककथं ख्यः नं दुगुलिं क्वथा दुने जक लिकुना च्वनाच्वने मालीगु अवस्था मदइगु वय्कलं धयादिल ।
आवश्यक जुल धाःसा ८० बेड संख्या थ्यंके फइगु जानकारी बियादिसें वय्कलं आइसोलेसनय् च्वनीपिंत नियमित रुपं चिकित्सकतपाखें रेखदेखया व्यवस्था यायेगु नं धयादिल । आइसोलेसन सेन्टरया निंतिं विद्यापीठय् आवश्यक मर्मत सम्भार व मतया व्यवस्था झिन्हुया दुने यायेगु नापं मेमेगु नं आवश्यक पूर्वाधार तयार यायेगु ज्या सिधयेकेगु ग्वसाः दुगु वय्कलं कनादिल ।
थुगु आइसोलेसन सेन्टरय् च्वनेत गुगुं शुल्क पुलेम्वाःगु व आइसोलेसन संचालनया निंतिं येँ महानगरपालिकालिसें स्थानीय रोटरी क्लब, मनाङ क्लब लगायत संघसंस्थां ग्वाहालि याइगु जूगु दु ।
LEAVE YOUR COMMENTS