बिहीवाः नेम्वाङया राजकीय सम्मान सहित अन्त्येष्टि याइगु, सार्वजनिक बिदा
येँ (नेपालभाषा टाइम्स)÷म्हिगः चान्हय् मदुम्ह संविधानसभाया अध्यक्ष लिसें नेकपा (एमाले) या उपाध्यक्ष व सांसद सुवास नेम्बाङया अन्त्येष्टि विहीवाः याइगु जूगु दु । बिहिवाः सुथय् वय्कःया अन्तिम संस्कार यायेगु निर्णय एमालेया सचिवालयं याःगु खः ।
नेम्बाङया कायपिं निम्हं विदेशय् दुगु जुयाः उपिं लिहां वयेकाः जक अन्तिम संस्कार याये माली धकाः छेँजःपिंसं याःगु इनापयात ध्यानय् तयाः पार्टीपाखें थ्व निर्णय याःगु खः ।
वय्कःया अन्त्येष्टि विहीवाः सुथय् पशुपति आर्यघाटय् याइगु खँ एमालें धाःगु दु । नेपाल सरकारं वय्कःया अन्त्येष्टि राजकीय सम्मानपूर्वक यायेगु धकाः निर्णय यायेधुंकूगु दु । लिसें अन्त्येष्टि याइ कुन्हु सार्वजनिक बिदा नं बीगु धकाः निर्णय याःगु जुयाः विहीवाः बिदा जूगु दु । बिहीवाः नेपाःन्यंकंया सरकारी ज्याकू बन्द यायेगु लिसें विदेशय् च्वंगु नेपाःया दूतावासत नं बन्द जूगु खँ धाःगु दु ।
???????, ?? ???
अन्त्येष्टि मजूतले वय्कःया सीम्ह एमालेया पार्टी ज्याकुथिइ हे तयातइगु खँ धाःगु दु । सोमवाः चान्हय् मदुम्ह नेम्बाङया सीम्ह मंगलवाः शिक्षण अस्पतालं पार्टी ज्याकुथिइ हःगु खःसा अन वय्कःया थीथी नेतातय्सं अन्तिम श्रद्धाञ्जलि देछाःगु खः । पार्टी ज्याकुथिइ दकलय् न्हापां एमालेया अध्यक्ष केपी ओलीं वय्कःया सीम्हय् पार्टीया ध्वाँय् फायेकादीगु खःसा लिपा पूर्व राष्ट्रपति विद्यादेवी भण्डारीं नेपाःया राष्ट्रिय ध्वाँय् फायेकादीगु खः ।
मंगलवाः वय्कःयात प्रधानमन्त्री पुष्पकमल दाहाल लिसें पुलांपिं प्रधानमन्त्रीपिं माधव नेपाल, झलनाथ खनाल, डा. बाबुराम भट्टराई, खिलराज रेग्मी नापं उप– प्रधानमन्त्री नारायणकाजी श्रेष्ठ, मन्त्रीतय्सं नं स्वां तयाः श्रद्धाञ्जलि देछानादीगु खः ।
संविधानसभापाखें संविधान दयेकूबलय् वय्कः हे उकिया अध्यक्ष जुयादीगु खःसा लिपांगु इलय् एमालें वय्कःयात राष्ट्रपतिया उम्मेदवार समेत दयेकूगु खः । एमालेया झिक्वःगु महाधिवेशनं उपाध्यक्ष जुयादीम्ह नेम्बाङयात सरल, मृदुभाषी व सुयातं तंचायेके मयःम्ह नेता कथं म्हसीका तःगु दु ।
LEAVE YOUR COMMENTS