वडाध्यक्ष न्हुछेकाजी महर्जनया बाखंसफू ‘श्रद्धाञ्जली’ पितब्वज्या
येँ – येँमपा १८ वडाया वडाध्यक्ष नापं समाजसेवी न्हुछेकाजी महर्जनया बाखं मुना सफू ‘श्रद्धाञ्जली’ शनिवाः थनया नेपाः बैंक्वेटय् विमोचन जुल । येँ महानगरपालिकाया मेयर बिद्यासुन्दर शाक्य व सभासद बसन्त मानन्धरं मंकाः कथं उकिया विमोचन यानादीगु खः ।
सामुदायिक अध्ययन केन्द्रया ग्वसालय् जूगु ज्याझ्वः संस्थाया नायः नापं बाखंच्वमि न्हुछेकाजी महर्जनया सभापतित्वय् न्ह्याःगु खःसा धर्मशोभा तुलाधरं लसकुस यानादीगु खः । ज्याझ्वलय् वरिष्ठ बाखं च्वमि राजा शाक्य, ज्यापु महागुथिया नायः राजभाइ जकःमि, नेवाः देय् दबूया नायः नरेश ताम्राकारपिसं सफूयात कयाः नुगःखँ तयादीगु खः । ज्याझ्वलय् संघीय सासंद रामवीर मानन्धर, ज्यापु महागुथिया पुलांम्ह नायः राजभाइ ज्यापु, बाबु राजा महर्जन, प्रा. भगवानरत्न तुलाधर, हेमज्योति शाक्य, हेरा शोभा, अम्बिका सुनारपिं पाहां कथं झाःगु खः ।
ज्याझ्वलय् न्ववासें मूपाहां मेयर शाक्यं वडा अध्यक्ष धइपिं ब्यस्त जुइगु खयां नं च्वमि महर्जनं अति व्यस्तताया बाबजुद नं बाखं च्वयाः सफू पिथनाः तसकं च्वछायेबहगु ज्या यानादीगु दु धयादिल । नेवाःतय्सं थथे हे कुतः याना वन धाःसा नेपालभाषाया साहित्य ख्यः नं विकास जुयावनीगु बिचाः वय्कलं तयादिल ।
अथेहे नेवाः देय् दबूया नायः नरेश ताम्राकारं नेपालभाषा म्वाका तयेत नेवाः लागाय् स्थानीय भाषाया ल्याखं ब्वनेकुथिइ नेपालभाषायात अनिवार्य याकेया नितिं येँ महानगरपालिकापाखें मेयरं हे पलाः न्ह्याकादीत इनाप यानादिल ।
LEAVE YOUR COMMENTS