खोप कायेत बाध्य यायेमखु : बाइडन

एजेन्सी – अमेरिकाय् राष्ट्रपतिइ निर्वाचिन जो बाइडनं कोभिड १९ विरुद्धया खोप वल धाःसा थ्व खोप फुक्क नागरिकतय्त कायेमाः धकाः बाध्य मयायेगु खँ धयादीगु दु । अमेरिकाया सेन्टर्स फर डिजिज कन्ट्रोल (सिडीसीं) थः छेँ बाहेक बन्द क्वथाय् न्ह्याथाय् वनेमाःसां मास्क तयेत इनाप याये वं बाइडेनया थ्व धापू वःगु खः । सिडिसीं अमेरिका कोरोना भाइरस ‘उच्च दरं संक्रमण जुइगु अवस्थाय् प्रवेश जुइधुंकूगु’ धासें सतर्कता नालेत धाःगु खः ।

शुक्रवाः जक अमेरिकाय् संक्रमणया कारणं २५०० म्हेसिया ज्यान वंगु खःसा थ्व छन्हुया दुने हे २ लाख २५ हजारयात कोरोना संक्रमण जूगु खः । अमेरिकाय् आःतक १ करोड ४३ लाख मनूतय्त कोरोना संक्रमण जुइधुंकूगु दुसा २ लाख ७९ हजार मनूतय् ज्यान वनेधुंकूगु दु ।

अमेरिकी कम्पनी फाइजर व मोर्डर्ना कोरोना भाइरस विरुद्ध दयेकूगु खोप ९५ प्रतिशत प्रभावकारी जूगु धासें अमेरिकाय् खोपया स्वीकृति कायेगु निंतिं आवेदन बीधुंकूगु दु । अमेरिकी उपराष्ट्रपति माइक पेन्सं थ्व खोपयात स्वीकृति बीगु बारे थ्व हे वालय् निर्णय जुइगु धाःगु दु । तर थ्व हे इलय्रा ष्ट्रपतिइ निर्वाचित बाइडनं कोरोना विरुद्धया खोप अनिवार्य यायेमाःगु आवश्यक मदुगु खँ धयादीगु खः । छुं ई न्ह्यव अमेरिकाय् पिउ रिसर्च सेन्टरं याःगु सर्वेय् ६० प्रतिशत अमेरिकीत जक खोप कायेत तयार दुगु खनेदुगु खः । थ्वयां न्ह्यः सेप्टेम्बरय् याःगु सर्वेय् ला ५१ प्रतिशत जक खोप कायेत तयार जूगु खः ।

मेखे बाइडनं खोप बारे सम्भावित चिन्ता म्हो यायेगु निंतिं थः सार्वजनिक रुपं हे खोप काये त तयारी दुगु खँ धयादी धुंकूगु दु । अथेहे अमेरि काया पुलांपिं स्वम्ह राष्ट्रपतित बराक ओबामा, जर्ज डब्ल्यू बुश व बिल क्लिन्टनं नं थःपिं सार्वजनिक रुपं हे खोप कायेत तयार दुगु खँ धायेधुंकूगु दु ।