
नेकपाया थ्यंमथ्यं स्वब्वय् निब्व बहुमत दुगु सरकारयात हाथ्या बिसें नेपाली कांग्रेसया वरिष्ठ नेता रामचन्द्र पौडेलं दमौली थ्यने न्ह्यः वइगु बुल्दी खुसिया ताँ उलेज्या याःगु दु । थुकथं चुनाव बूम्ह नेताया ल्हातय् ताँ दयेकेगु अवसर चूलाःगु धइगु अनया उपभोक्ता समिति व दमौलीया मेयरया हे करामत खः । प्रधानमन्त्री केपी शर्मा ओलीनाप सत्तीम्ह तनहुँ नं त्याःम्ह नेता किसान श्रेष्ठं छन्हु न्ह्यः सिडिओयात धयाः पौडेलयात ३ घण्टातक प्रहरी नियन्त्रणय् तयेकूसां विहीवाः गुगुं पंगः मवयेक नेता पौडेलं ताँ उलेज्या यात। ताँ धाःसा स्थानीय विकास मन्त्रालयया पूर्वाधार निर्माण कार्यक्रमपाखें हे दयेकूगु जुयाच्वन । अनया कांग्रेसतय्गु पहलय् कांग्रेस सरकार दुगु इलय् हे बजेट फ्यानाः ज्या याःगु जूसां उलेज्याया सवालय्द लगत राजनीतिकरण जूगु धइगु नेपाःया राजनीतिइ खने दयावःगु नौटंकीया छगू दसु खः ।
२०४६ सालया जनआन्दोलनया रापताप बल्लाःबलय् कांग्रेसय् दुहां वनाः कांग्रेसं यल जिल्लाय् चुनाव दंम्ह अले राप्रपा दुने वनाः नं निराश जुयाः राजनीति त्वःताः च्वंम्ह केशरबहादुर विष्ट कांग्रेसया विपिन कोइराला व हरिबोल भट्टराईयात तकं जुजुवादी पुचलय् हइम्ह जूगु दु । यलया नेवाःत मुंकाः प्रचण्डं रंग हिलाः एमालेय् दुहां वंसां कक्कु ज्वनाः हयेमाःगु धकाः नेवाः भासं खँपु छ्यलाः भाषण याना जूगु भिडिओ नं स्वये दयाच्वंगु दु । अथे हे गुगुं ईया वामपन्थी अले राष्ट्रवादया नामं मुद्दा तयाः दरवारिया धायेका जूम्ह वकिल बालकृष्ण न्यौपाने नं शनिवाः जुजुवादीया जुलुस पिकायेगु ज्याया अभियन्ता जुया जूगु दु ।
थ्व वास्तवय् जनआन्दोलन, जनयुद्ध जक मखु, संविधानसभाया इलय् खनेदुगु संघीयताया आन्दोलनया रापताप मदयावंगु खँया हे दसु खः । थ्व हे इलय् डा. बाबुराम भट्टराईं धाःगु खँ नं थुथाय् लुमंकेबहजू- गणतन्त्रया जा बूगु मदुनि धकाः गोबर नये फइमखु । थुकिं आः गणतन्त्रवादी व राजतन्त्रवादीया दथुइ ल्वापु सुरु जुइधुंकूगु खँ स्पष्ट खनेदत । भारतय् सन् २०१४ य् भारतीय जनता पार्टीया नरेन्द्र मोदी प्रधानमन्त्री पदय्वः बलय् नेपालय् निक्वःगु संविधानसभाया चुनावया प्रक्रिया न्ह्यायेधुंकल ।
उकिं थ्व प्रक्रियायात रिभर्स यायेगु स्वाभाविक मखुत । संविधान जारी यायेसिकं न्ह्यः भारतीय विदेश सचिव वयाः संविधान जारी यायेगु ज्या छुं ई दिकि धकाः ला धाःगु हे खः । थुकिं संविधान जारी यायेगु प्रक्रियाय् सामेल कांग्रेस, एमाले व माओवादी झस्के जुल व स्वथी नं मिले जुयाः हथाय्हथासं संविधान जारी यात। थुकिया लिच्वः नेपालं नाकाबन्दी भोगे यायेमाल । संविधान जारी जुइधुंकाः जूगु न्हापांगु चुनावय् एमाले व माओवादीया गठबन्धन जुल । थुगु गठबन्धनया लिउने भारतया थिंक ट्यांक एसडी मुनि थुज्वःपिनि ल्हाः दु। थुम्ह मुनि नं अनया भारतीय कांग्रेसनाप सत्तीम्ह बुद्धिजीवी खः ।
भारतीय संस्थापन पक्ष नेपालय् धर्मनिरपेक्षता चीकाः हिन्दू राज्य जक मखु, हिन्दू अधिराज्य हे कायम याये चाहे जू । थन च्वंपिं इमि चेलातसें धर्मनिरपेक्षता धाःगु खँग्वः युरोपियन युनियनया दबावय् तःगु खः धकाः धया हे वयाच्वंगु दु । अथे हे थनया हिन्दूवादी व जुजुवादी पक्षं नेपालय् संघीयता नं खारेज याये चाहे जू ।
अशोक मेहता थुज्वःपिं बेपत्ता जुल । आः वयाः अशोक मेहता हाकनं खने दयावःगु दु । मुनि बेपत्ता जुयावंगु दु । उकुन्हुया नक्सा प्रकरणया इलय् नं जनरल बक्सीं माओवादीयात भारतं लहिनाः थासय् थ्यंकूगु हे गल्ती जुल धकाः न्ववात । थ्वयांलिउ भारतया हे छगू पक्षं माओवादीयात दरकिनार यानाः नेपालय् जुजु हयेगु कुतः सुरु याःगु दु। मेगु पक्षं ओलीयात चीकेगु कुतः नं सुरु याःगु दु । थुकी मध्ये सु बल्लाइ धकाः धइगु ल्वापु थौंकन्हय् सत्तारुढ नेकपा दुने न्ह्यानाच्वंगु दु । ओलीयात चीकेत स्वयाच्वंगु प्रचण्ड-माधव पक्ष एकतर्फी स्थायी कमिटीया दुजःत जक मुंबलय् न्ह्याः वनेमफयाः थस्सः पाःगु अले हाकनं चीकाः पुलांगु एमालेयात जक छप्पँ यानायंकेत स्वयाच्वंगु ओली पक्ष नं थःगु ज्याय् सफल मजूगु स्थितिं यानाः नेकपा दुनेया ल्वापु निगुलिं पक्ष त्याः त्याः मखसें बू–बूया स्थिति लाःवंगु दु । आः हाकनं न्ह्याकेगु झ्वलय् प्रचण्डं थःगु प्रतिवेदन स्थायी कमिटीया मुँज्याय् हे यंकाः पारित याकाः त्याकेगु रणनीति काःगु दु ।
वास्तवय् रामचन्द्र पौडेलया तां उलेज्याया प्रकरण, केशरबहादुर विष्ट, बालकृष्ण न्यौपाने हालाः सना जूगु व नेकपा दुनेया ल्वापुया तानाबाना छगू हे सारं पिहां वयाच्वंगु थीथी अभिव्यक्ति जक खः धइगु थुइकेत थाकु मजू । नेपाःया राजनीतिइ थुकथंया नौटंकी वा नाटकीय घटनाक्रम न्हापा नं मजूगु मखु । गबले माओवादी जनयुद्ध सुरु जुल अबलय् कृष्णप्रसाद भट्टराई नं बाबुरामपिं गुगुं दूतावासय् सुलाच्वंगु दइ धकाः अनुमान यानाः न्ववाःगु खः । उकथं हे असोज १८ य् शेरबहादुर देउवायात अक्षम धकाः चीके न्ह्यः नं नेपाःया राजनीतिक दलत मिले जुयाः चुनाव याये मफइगु जूगुलिं मिति लिछ्यायेमाल धकाः आकाझाकां हे धयाथें निवेदन तःगु खः ।
थ्व खँ स्पष्ट खः कि भारतीय संस्थापन पक्ष नेपालय् धर्मनिरपेक्षता चीकाः हिन्दू राज्य जक मखु, हिन्दू अधिराज्य हे कायम याये चाहे जू । थन च्वंपिं इमि चेलातसें धर्मनिरपेक्षता धाःगु खँग्वः युरोपियन युनियनया दबावय् तःगु खः धकाः धया हे वयाच्वंगु दु । अथे हे थनया हिन्दूवादी व जुजुवादी पक्षं नेपालय् संघीयता नं खारेज याये चाहे जू । नेपाःयात एकात्मक शासन व्यवस्थाय् हे तयातये चाहे जू । थुकथं जुइबलय् वास्तवय् थ्व प्रतिगामी ज्या हे जूवनी । थ्व प्रतिगामी ज्याया निंतिं हे जुयाच्वंगु कुतः खः । तर दुःखया खँ थ्व हे खः कि नेपालय् प्रतिगामीतय्त खबरदारी याइपिं इमि विरुद्ध अभिव्यक्ति बीपिं मनूत हे खनेमदयाच्वन ।
स्वनिगलय् गुथि विधेयकया विरोधय् आदिवासी नेवाःत दना वःबलय् नं प्रधानमन्त्री केपी शर्मा ओलीं गुकथंया अभिव्यक्ति बियाः विधेयक लित काल, उकिं नं अबलय् प्रतिगमन जुइफुगु खतरायात संकेत याःगु खः । नेवाःतय्गु ब्वहः गयाः प्रतिगमन वये मफुत तर उकिं सरकारया विरुद्ध उकथं असन्तुष्ट मनूत कुहां वये फुगु आंकलन धाःसा जुजुवादीतसें यात । ‘इनफ इज इनफ’ आन्दोलनलिसें थीथी असन्तुष्ट जनताया आन्दोलनप्रति जुजुवादीत आशावादी जुयाच्वंगु खः । तर आः वयाः इमिसं हे थीथी ख्यःया जनता मुंकेगु सुरु याःगु खनेदु। थ्व इलय् धाःसा इमिगु सम्भावना आपाः खने दुगु दु। थुकिया नितिं छगू हे जक उपाय धइगु नेपाःया राजनीतियात १२ गू बुँदाया सम्झौतानिसें कयाः थौंतक हःपिं अले संविधान जारी याःगु इलय् इमिसं क्यंगु एकता थें हे एकता प्रदर्शन यायेगु खः । तर उकथंया अवस्था आः खनेमदु। इपिं हे विभाजित जुयाच्वंगु दु ।
LEAVE YOUR COMMENTS