च्वबहालय् छेँ दनेत जग म्हूबलय् सुरुङ लुया वल

येँ – च्वबहाः (चोभार) लागाय् छखा छेँ दनेत गाः म्हूबलय् सुरुङ लुया वःगु दु । च्वबहाः द्यःयाथाय् दुहां वनेगु मू लुखाया पिनेसं च्वंगु स्थानीय पूण्यरत्न शाक्यया छेँय् थ्व सुरुङ लूगु खः । भुखाचं क्षति जूगु थःगु छेँ हानं दनेगु लागिं जग तयेत गाः म्हूबलय् थ्व सुरुङ लूगु खः । न्हापा गाः थें जक लूगु व अन प्यपुनाच्वंगु चायात सुत्तुसुयाः धिना छ्वःबलय् क्वय् थ्यंक कुहां वने जिउगु सुरुङ लूगु खः । उगु सुरुङय् मनू छम्ह नं न्ह्यः । अनं नं दुहां वनेबलय् दुने निम्ह ति मनू च्वने जिउगु थाय् छकू नं दु । आः अनं नं मेथाय् वने जिउ लाकि धकाः स्वयेगु ज्या जुयाच्वंगु दु ।

थ्व सुरुङ मुक्कं ल्वहंया ल्वहंपाखें जक दयेका तःगु खनेदु । अन सुरुङ लुया वःगु खनाः छेँथुवाः थः हे अजूचायाच्वंगु दु । अन अज्याःगु सुरुङ दु धइगु खँ थ्व स्वयां न्ह्यः सुनां नं मसिउगु खः । सुरुङ लुल धइगु खँ प्रचार जुइवं अन सुरुङ स्वयेत न्हिंन्हिं हे आपालं मनूत वयेगु यानाच्वंगु दु । थौंकन्हय् अन छेँ दनेगु ज्या हे छखे तयाः सुरुङ निं म्हुइगु ज्या जुयाच्वंगु दु ।ल्वहंया द्यःने बसे जुयाच्वंगु वस्ती जूगुलिं ल्वहंया कापय् सुरुङ बने जुयाच्वंगु अनुमान याःगु दु । थ्वहे च्वबहाः लागाय् चखुंति बखुंति नांगु मेगु छगू नांजाःगु गुफा नं दु गुगु थौंकन्हय् पर्यटन केन्द्र थें जुयाच्वंगु दु ।