कोभिड-१९या खोप याकनं हे वयेत्यंगु दु । बुखँ वयाच्वंगु दु। खोप वयेत्यंगु दु धइगु। तसकं हे लसताया खँ जुयाः नं, मवःतले कोभिड-१९या महामारीं आक्रान्त मनूत त्रसित जुइगु स्वाभाविक खः । खोप व्यवहारय् मवःतले थ्व महामारीं क्षति याना हे च्वनी । उकिं कोभिड-१९या खोप वइन धाःगु सुचंपाखें विश्वया पीडित जनता उत्साहित जूसां विद्यमान कोरोनाया खतरांमुक्त जुइ मखुनि। जबतक खोप व्यवहारय् वइ मखुनि ।

थाय्थासय् विश्वय् इलय् व्यलय् प्राकृतिक प्रकोपत जुयाच्वनी । गनं भुखाय् ब्वइ । गनं सुनामिं दुःख बी । गनं चलः वनी । तर थाय्थासय् प्राकृतिक प्रकोपं तःधंगु क्षति याःसां थज्याःगु प्राकृतिक प्रकोपं विश्वन्यंकं हे प्रभाव याइमखु। सम्बन्धित देशय् जक प्रभाव सीमित जुइ । तर कोरोनाया प्रकोपं निश्चित देय्, भूभागयात जक प्रभावित याःगु मखसे सम्पूर्ण विश्वं हे थुकिया विनासकारी लिच्वः फयेमाल ।अविकसित देय् जक मखु, विश्वया तसकं विकसित देय्त नं कोरोनाया प्रकोपया न्ह्यःने शक्तिहिन जुल । इमिसं नं कोरोनाया प्रकोपं तसकं क्षति फयेमाल ।

कोरोनाया विश्वव्यापी प्रकोपं छगू गहन न्ह्यसः थना बिउगु दु। अविकसित विकोसोन्मुख देय्तय् मनुखं विकसित देय् तय्त स्वइगु दृष्टिइ हिउपाः हया बिउगु दु । विश्वया विकसित देय्तय्के न्ह्याथेंज्याःगु चुनौति वःसां उकियात सामना यायेगु क्षमता दु, इमि थाय् जूगु चरम विकासं गुगुं समस्या नं चिइके फु धइगु गुगु धारणा अविकसित व गरिब देय्या जनतां कयाच्वंगु दु, व गलत सावित जूगु दु ।

कोरोनाया प्रकोपं विकसित देय्तय्त नं अविकसित देय्तय्त थें निरीह याना बिउगु दु । अविकसित देय्तय्सं फयाच्वंगु दशा थौं विश्वया विकसित देय्तय्सं नं फयेमालाच्वंगु दु । ततःधंगु धनी देय्तसें न्ह्यागु नं समस्या, ल्वय्, आपत विपदयात अःपुक सामना याये फइ धइगु मान्यता फुक्क दुन ।

थौं कोरोनाया प्रकोपं विकसित देय्तय्त नं अविकसित देय्तय्त थें निरीह याना बिउगु दु । अविकसित देय्तय्सं फयाच्वंगु दशा थौं विश्वया विकसित देय् तय्सं नं फयेमालाच्वंगु दु । ततःधंगु धनी देय्तसें न्ह्यागु नं समस्या, ल्वय्, आपत विपदयात अःपुक सामना याये फइ धइगु मान्यता फुक्क दुन। अमेरिकाय् च्वंपिं नेपाःमितय्के कोरोना दुःख बिउगु इलय् गुकथं न्हि छ्याना धकाः न्यनेबलय् इपिं नं नेपालय् च्वंपिं थें हे च्वना च्वनागु खँ धाइ । कोरोनां थुकथं विश्वया जनतायात हे ग्याःचिकुं जाःगु कय्कुंगु जीवन हने मायेकाबिल । कोरोनाया खतरा ल्वय्या दृष्टिकोणं जक मखु। थ्वं हइगु सामाजिक, आर्थिक, सांस्कृतिक, दुष्परिणाम तसकं हे भयावह जुइ । पारिवारिक स्वापू थ्वं क्षतविक्षत यानाबी । थःथिति नाप लायेगु बन्द । पासापिंलिसेया स्वापू त्वाःदली । व्यापार दक्व शिथिल । बजारय् अत्यावश्यक वस्तुया भाः अस्वाभाविक नक्सां थहां वनी । सांस्कृतिक जीवन ठप्प जुइ । जात्रा, पर्वत दी । मोहनि, स्वन्ति नं छेँय्छेँय् जबरजस्तं जक जुइ । पारिवारिक जमघट जुइमखु। राजनीति नं जनताया तहय् शुन्य धाःसां जिउ। नेतातय् तहय् धाःसा राजनीतिं थः जीवन्त जूगु अनुभूति बियाच्वंगु दु । जनजीवनया दक्वं पक्ष अस्तव्यस्त। कोरोनाया संक्रमिततय् ल्याः अप्वया च्वंगु दु। थ्व उपचार क्षमतां पिने लायेधुंकूगु दु। अप्रत्यक्ष रुपं राज्यं ‘भगवान भरोसा’या नीति कायेधुंकूगु खनेदु ।

थज्याःगु भयावह, निस्साह स्थितिइ नं थौं जनतायाके छगू आशा दु । आः कोरोनाया खोप वइ । खोप वल कि थ्व महामारीं मुक्त जुइ खनी । ख नं खः, आःया घडीइ कोरोनाया खतरामुक्त जुइत विश्वय् मेगु छुं उपाय मदु। व हे खोपया आशा खः । खोप वल कि तिनि थौं कोरोनाया महाविनाशपाखें सुरक्षित जुइ फइ । आः याकनं हे खोप वयेत्यंगु दु । खबरत वयाच्वंगु दु। बरु थ्व याकनं धाःगु गबले खः? मनूत धैर्यहीन अवस्थाय् । धैर्यहीन मनूतय् निंतिं घौछिया ई नं दँबदँ थें च्वनी । उकिं जनता खोपया लागि हथाय् चाइगु स्वाभाविक खः ।

विश्वय् खोप प्रयोगय् वयां जक मजिल । नेपालय् गबलय् थ्यनीगु ? थुकिया लागि नेपाल सरकारं आवंनिसें माःगु पहल यायेमाः । खोप विश्वन्यंकं छ्वयेमाःगु दु। नेपालं अवसर कायेत छु गुकथं कुतः यायेमाःगु खः, इलय् हे माःगु पलाः छी माः । वासः पिहां वयेकाः नं नेपालय् वयेत लिपा लातकि नेपाःमितय्सं अःखः दुःख सी । न्यने दु । कोरोनाया खोप नेपालय् हःसां भण्डारण यायेगु व्यवस्था मदु हँ ! खोप भण्डारण यायेत विशेष व्यवस्था इलय् हे मयाःसा नेपालय् खोपं ज्या काये फइमखु । खोप हयेत, सुरक्षित यायेत माःगु पूर्वाधारपाखे सरकारं इलय् हे ध्यान बीमाल । खोप वयेकाः वितरण व्यवस्था न्यायोचित मजुल कि आम जनतां थुकिया लबः काये फइमखु। कोरोनाया समस्या आम जनताया खः ।

उकिं खोपया अवसर आम जनताय् सहज रुपं थ्यनेमाः । सुविधायुक्त मनूतय् लागि जक जुइ मजिउ। हल्ला न्यने दु, खोपया मूल्य तसकं थिके जुइ । थ्व खःसा सामान्य जनतां खोप काये फइ ला कि फइमखु ? सरकारं निःशुल्क याइ ला कि मयाइ? जनतां आर्थिक कारणं खोप काये मफुसा देय् खतरां मुक्त जुइ मखु । विदेशं सहयोगया रुपय् नं खोप वयेफु ! मनूतय् अनुमान दु। सहयोगया रुपय् वःगु खोपयात सशुल्क वितरण याये मजिउ । अथे हे खोप ब्ल्याक मार्केटरया ल्हाती लात कि आम जनतां दुःख सी । खोप वये न्ह्यः हे सरकारं खोप छ्यलेगु सन्दर्भय् वइगु दक्व समस्याप्रति इलय् हे ध्यान बियाःव्यवस्थापन यायेमाः ।

सम्बन्धित बुखँ

LEAVE YOUR COMMENTS