झी भ्रष्ट जुजुं वनाच्वन

पंचायती व्यवस्था लागू जुयाच्वंगु इलय् भ्रष्ट पंचतय्त विरोध यानाः उमिगु तानाशाही व एकलौटी व्यवस्था बिरुद्ध बहुदलवादीत छथाय् लाइगु खः । उगु इलय् गबलें गबलें देसय् प्रजातन्त्रया किचः नं खने दयेकः वःगु खः ।

अथे धइगु २०१७ साल लिपा बहुदलवादीत अन लाः थन लाः मदयाच्वंगु इलय् गोप्य रुपं संगठन यानाच्वंपिं नेपाली कांग्रेस व वामपन्थी शक्तितय्सं यःसां मयःसां पंचायती व्यवस्था विरुद्ध थीथी सः थ्वयेकीगु इलय् पंचायती तानाशाही व्यवस्था दथुं नं पंचायती आम निर्वाचन, बहुदल व निर्दलया छनौट यायेगु मौका जनमत संग्रह थेंज्याःगु अवसरत चूलाःवःगु खः ।

अबले तप्यंक तानाशाही व्यवस्था वा जुजुया शासन खःसां स्वतन्त्रताया सः थ्वयेके फुसा अधिकार छ्वासुया वःगु रेकर्ड, इतिहास व दस्तावेजत आपालं दु । थौं देसय् बहुदलीय व्यवस्था नाप नापं गणतान्त्रिक शासन पद्धतिया विकास जूगु दु । स्वतन्त्रता मधाक्व चूलाःवःगु दु । तर नयेगु, त्वनेगु, पुनेगु व न्हिया न्हिथंया सुविधाय् धाःसा झन् झन हे कटौती जुजुं वनाच्वंगु दु ।

तानाशाही व्यवस्थां व्यवस्था तानाशाही जूसां नयेगु त्वनेगु नियमित यानाः जनतायात बजाः भाः सहुलियत दर कायम यायेत ताःलाःगु खः । तर थ्व व्यवस्थाय् स्वतन्त्रताया नामय् बल्लाःपिं, राजनीतिक दलय् आवद्ध जुयाः थःगु हैसियत कायम यायेफुपिं निश्चित मनूतय्सं जक सुख, सुविधा व लूट कायम याये फइगु अजू चायापुगु पद्धति झीथाय् वयाच्वंगु दु ।

म्हिगः किसान नेता जुयाच्वंपिं पार्टीया दिग्गजतय्त मल्ता व्यापार यात, अप्पा भट्टा तल धकाः उकिं ज्या मयायेत सचेत यानाः कारवाही याःगु खः । तर आः झन अप्वः भट्टा तयाः किसानत स्यायेगु ज्या जुयाच्वंगु दु ।

म्हिगः चप्पल न्ह्यानाः राजनीति याइपिं मनूत थौं महलय् थ्यनेधुंकूगु दु । झिदँ न्ह्यः तक सिलावरया देमाय् जा नइपिं आः ६ करोडया महलय् च्वनीपिं जूगु दु । नापं जनयुद्धया नामय् झिंन्याद्वः नेपाली जनताया ज्यान वंसां जनयुद्धया छुं हे नां उल्लेख मयासे तयार यानातःगु वर्तमान संविधानय् आधारित व्यवस्थाया सत्ता आरोहण यानाः उपिं नं फयांफछि थःपिंत जुजुया हे हैसियतय् कायम यायेत स्वयाच्वंपिं जक दु ।

उमिगु सुख, सुविधा व हैसियत थौं छुं नं कथंया दरवारिया, जुजु महाराज व राजकुमारतय् सुविधा स्वयां म्हो मजू । अझ नं उमित सुविधा मगाःनि धयाच्वंगु दु । थःपिनि सुविधा अप्वयेकेत थीथी कथंया कर जक कयाः करं हे जनताया दुगःक्वँय् त्वःथुलीगु स्थिति वयाच्वंगु दु । थुलि च्वन्ह्याःपिं नेतात उलिमछि भ्रष्ट व विलाशी जूवनीगु कल्पना हे मदु ।

मनूत सुख, सुविधा व सत्ताय् थ्यनेवं झन् झन् भ्रष्ट जुया वनीगु जुयाच्वन धइगु खँ सत्ताय् वंपिं नेतातय्गु जीवन शैली स्वयेगु इलय् स्पष्ट जू । थथे थःगु हैसियत व थःगु इमान्दारिता स्वयां नं उपिं व्यक्तिवादी जुजुं वनाः मेपिंत मनू हे गने मयायेगु प्रवृत्ति उमिके थौं विकास जूवनाच्वंगु दु ।

थीथी दल, थीथी राजनीतिक शक्ति व विचारधारायात नाला वनेगु व्यवस्था हे जक बहुदलीय व्यवस्था खः । गणतन्त्र व प्रजातन्त्र खः । तर थन ला छगू वा सत्ताय् थ्यंगु पार्टीया मनोपोली कायम जुयाच्वंगु दु । उमिसं प्रतिपक्षी व मेमेगु सदनय् दुगु राजनीतिक दलया खँयात भ्याः भचा हे वास्ता याःगु मदु ।

सदनय् सहलह हे याके मबीगु कथं विधेयकयात पनेत स्वयाच्वंगु दु । अले विधयेक ह हे हःसां उकियात फेल यायेगु यानाच्वंगु दु । वास्तविक समस्या छखे तयाः समाधान मालेगु पलेसा बलया भरय् दबे यायेगु ज्या तकं जूगु दु । बहुमत किसान दुगु नेपालय् किसान विरोधी ज्या अप्वयाच्वंगु दु ।

म्हिगः तक बाली काट्ने आन्दोलन, भर्पाइ आन्दोलन व साँधे धपाउने आन्दोलन मार्फत् किसानतय् जग्गा बचे यायेगु जीवनस्तर च्वन्ह्याकेगु धकाः किसान संघर्षया इतिहास कायम यानाच्वंगु पार्टीतय्सं तकं थौं वयाः धमाधम किसानतय्के जग्गा, थ्वकेगु किसानतय्त जग्गापाखें बञ्चित यायेगु वा किसानतय् जग्गाय् ततःधंगु अगः तयाः अप्पा उत्पादन यानाः व्यापार यायेगु ज्याय् हे हौसला प्रदान यानाच्वंगु दु ।

म्हिगः किसान नेता जुयाच्वंपिं पार्टीया दिग्गजतय्त मल्ता व्यापार यात, अप्पा भट्टा तल धकाः उकिं ज्या मयायेत सचेत यानाः कारवाही याःगु खः । वयात उगु ज्यां त्वःतूगु खः । तर आः ला झन झन अप्वः भट्टात तयाः किसानत स्यायेगु ज्या जुयाच्वंगु दु । थ्व देसय् थः सत्ताय् मवंतले जनताया सेवाया खँ ल्हाइगु अले सत्ताय् जक थ्यनेवं हे किसान मजदुर व जनताया खँ हे मन्यंसे थः यथे ज्या यानाः शासन चले यायेत स्वइपिं यक्व दु ।

उकी मध्ये बहुदल वयाःलि म्हिगः दल चायेकाच्वंपिं राजनीतिक नेतात स्वयम् थुगु पंक्तिइ थ्यनाच्वंगु दु । थः बाज्यां बुँथु जूगु ल्याखं बुँ किसानतय्त मबिल धकाः संघर्ष यानाः व्यापक जनताया मन त्याकाच्वंपिं मनूत आः थःपिं हे उगु बुँइ भट्टा तयाः नं प्लानिङ यानाः नं किसानतय्त उगु जग्गा जमिनं उठिवास यायेगु ज्याय् सहभागी जुयाच्वंगु स्थिति दु ।

जग्गाय् गाडी चले यायेत लँ दयेकेत योजनाकार जुयाः मेपिनिगु जग्गा थःपिनिगु गथे यानाः यायेगु धइगु कासाय् तल्लीन जुयाच्वंगु दु । स्वयेबलय् पार्टीया किसान कार्यकर्ता थें च्वंसां उपिं सारा जनताया दथुइ किसानमारा जुयाः खने दयाच्वंगु दु । जानाजान ५० औं दँ न्ह्यवंनिसें ज्या यानाच्वंगु जग्गापाखें हे छुं छुं हे मदयेक जग्गां नां लिकयाः ज्यां लिकया सुकुम्बासी यायेगुली अज्याःपिं हे नेतात न्ह्यःने लानाच्वंगु दु ।

थथे स्वयेगु इलय् २०२१ सालं वःगु भूमि सुधारं गथे पंचायती व्यवस्था तिके यायेत साथ बिउगु खः । आः नं भूमि कर अप्वयेकाः ज्यापु ज्यामितय् जग्गा थःपिनिगु यानाः थनया छुं तानाशाही जुजुं वनाच्वंपिं प्रजातान्त्रिक व वामपन्थी नेतातय्सं हे आः धमाधम किसानतय्त जग्गां बञ्चित यायेगु ज्या यानाच्वंगु खनेदु ।

थज्याःगु ज्यायात किसान बिरोधी ज्या मधाःसा छु धायेगु ? म्हिगःया इतिहास स्वयेगु इलय् जग्गा जमीन बचे यायेत किसानतय्त संगठित यानाः प्रहरी प्रशासनया सामना यानाः नं जनताया मन त्याकेत गुलिं किसान संगठनया मनूत सक्रिय जूगु इतिहास दु । थौं मजदुरया नामय् मजदुरतय् शोषण यानाच्वंगु दु । श्रमिकया नामं श्रमिक जनताया दां अपब्यय जुयाच्वंगु दु ।

छु थ्व भ्रष्ट आचरण मखुला ? अले अज्याःगु राजनीतिक दलतय्सं भ्रष्टाचार विरोधी अभियान चले यायेगु धायेवं जनताया सेवा यानाच्वनागु दु धायेवं जनतां गथे पत्याः याइ ? खँ वा नारा मू खँ मखु, व्यवहार मू खँ खः । म्हिगः जेल नेल च्वनेमाःगु इलय् मेपिं मनूत दुफ्वानाः थौं उगु भट्टा वा व्यापार व्यवसायपाखें सुविधा काये खनीगु इलय् थःपिं हे न्ह्यःने वयेगु परिपाटी गुलित भ्रष्ट परिपाटी खः ?

 

सम्बन्धित बुखँ

LEAVE YOUR COMMENTS