जि अलमलय् लाइ !

थौंकन्हय् देय्या राजनीतिं तःधंगु भ्रम ब्वलंकाच्वंगु दु। देय्या फुक्क राजनैतिक गतिविधि न्ह्यलय् ला ज्वलय् ला, सपनाय् ला विपनाय् ? गन जुयाच्वंगु खः ? ठेगाना याये मफयाच्वनी । गबलें थुपिं म्हगसय् म्हना च्वंगु ला धइथें च्वनी । गबलें विपनाय् खना च्वं थें ताइ ! तर निश्चितकथं धाये मफु। विवेकशक्तिं थथे धकाः निर्णय याये फुगु स्थिति मखु ।

पिने खने दुगु धु्रवसत्य । नेकपाया निम्ह अध्यक्ष दथुइ तःधंगु भिडन्त खः । अधिकांश मनूत थ्व हे निष्कर्षय् वयेधुंकूगु दु । भविष्यवाणी याइपिनि सः झं झं तिसः जुया वइ । ‘आः नेकपा गुगुं हालतय् नं एक जुइ मखुत । थ्व कुचा दली । थुकी शंका मदु ।’ छथ्वः राजनीतिक विश्लेषक धाःपिंसं नेकपा तज्याइ, मिखा तिसिनाः धयाच्वंगु दु ।

तर । आश्चर्य ! छथ्वः विश्लेषकतय्सं हाकनं तसकं हे अजू चायापुगु खँ न्ह्यःने हयाच्वंगु दु। थ्व ओली व प्रचण्ड दथुइ खने दयाच्वंगु युद्ध फुक्क नक्कली खः, फेक खः। मात्र नाटक । जनतायात ल्वापु जूगु अभिनय यानाः थःगु कमजोरी सुचुकेगु इमिगु दाउ जक खः । यथार्थय् निम्हं ल्वापुया अभिनयय् मस्त । इमिसं दुने दुनें थज्याःगु हे गतिविधि क्यनाः देय्या राजनीति स्थिर मखु, गतिशील धइगु जनताय् भ्रम ब्वलंकेत स्वयाच्वंगु दु । इलय् व्यलय् पिहां वइ, निम्हं अध्यक्ष फुक्क खँय् सहमतिया निंतिं तयार ! आः म्हिगःया व कथित वैमनस्यता निम्हं अध्यक्षया दथुइ खने दइमखुत। निम्हं छप्पँ जुयाः नेकपाया एकतायात मजबूत याइ । निम्ह अध्यक्ष दथुइ खास गम्भिर मतभेद हे दुगु मखु । कम्युनिष्ट पार्टी दुने वैचारिक मतभेदत दयाच्वनी । तर छलफलं व समाधान जुइ । उकिं अध्यक्षद्वय ओली व प्रचण्डं थःपिनि दथुइ मतभेद दुसां छलफलं व समाधान याइ । अन्त्य याइ । अध्यक्षद्वय ओली व प्रचण्ड दथुइ खास मतभेद, ल्वापु जूगु हे मखु। पत्र युद्ध नं मात्र जनतायात मूर्ख यायेत छेडन याःगु जक खः । अनुमान याइपिं नं दु ।

ख नं खः, थौं देय्या जिम्मेवार नेतातय्सं देय् व जनताया निंतिं छुं याये फुगु मखु। देशय् गरिबी, पछ्यौटेपन यथावत तिनि । जनताया निंतिं सँ छपु नं उखेथुखे याये फुगु मखु सरकारं । जनस्तरय् जुइमाःगु विकास धइगु गज्याःगु जुइ ? गज्याःगु जुइमाः ?

थौं देय्या जिम्मेवार नेतातय्सं देय् व जनताया निंतिं छुं याये फुगु मखु। देशय् गरिबी, पछ्यौटेपन यथावत तिनि । जनताया निंतिं सँ छपु नं उखेथुखे याये फुगु मखु सरकारं ।

थौंया सरकार नेतातय्सं गबलें सोच विचार याःगु मदु। कम्युनिष्ट सरकारं ला जनकल्याणयात चिउताः तयाः ज्या याइ । तर थौंया कथित विकास आम जनताया आवश्यकतायात चिउताः तयाः जुयाच्वंगु मदु। देय् संचालन सुया निंतिं जुयाच्वन ? देशय् खने दुगु तथाकथित सतही विकासं क्यनी । थौं जनताया अत्यावश्यक वस्तुतय् भाः विचौलियातय् खेलवाडया विषय जुयाच्वनी । राजनीति धइगु देय् व जनताया विकास व उत्थानया निंतिं खः धइगु सोच हे थौं देय्या नेतातय्के शुन्य । राजनीति धइगु दल दुने गूटवाजी यानाः शक्तिया निंतिं हानथाप याना जुइगु । अध्यक्ष ओली व प्रचण्डया युद्ध कासाय् भुले याना तयेगु। मानौं इमिगु खेल निगू जाःगु फुटबल टीमया उच्चस्तरीय कासा खः । थौं जनता इमिगु कासा स्वयाः मनोरञ्जन कायेत बाध्य जुइ । अध्यक्षद्वय ओली व प्रचण्डया तथाकथित द्वन्द्व, ल्वापु हे देय्या विकास खःसा नेकपाया एजेन्डा खःसा थन छुं धायेगु मदु। मखुसा छगू बहुमत दुगु पार्टी धकाः नगरा थानाः हल्ला याना जूम्ह विश्वया न्यागूगु विशाल कम्युनिष्ट पार्टीया सरकारं आम जनतायात विकासया नामय् नेतातय्सं खिचा ल्वाःथें ल्वापु यानाः जनतायात धोखा बी जिउला ?

प्रधानमन्त्री ओलीं न्हूगु पुस्तायात सत्ता लःल्हायेगु नं खँ ल्ह्वनी । थज्याःगु नाटकीय घोषणा प्रथमपंक्तिया नेतातय्सं इलय् व्यलय् यानाच्वनी । तर थ्व नं नेतातय् ध्वं लायेगु जुक्ति जक खः । एकत प्रथमपंक्तिया नेतात शक्ति त्वःतेत तयार जुइमखु। निगूगु न्हू पुस्ताया नेतातय्सं थःगु स्वतन्त्र नेतृत्व, व्यक्तित्व दयेकेफुगु मदुनि । छम्ह छम्ह नेताया क्वय् च्वनाः झोले नेता जुया च्वंपिं न्हू पुस्ता वःसां गुटबाजी यथावत जुइ ।

न्हूगु नेतृत्व स्वतन्त्र, व्यक्तित्व इमिसं क्यने फइमखु। पार्टी दुने पिनें नेता पाइ । दुनें व हे मुलु व हे सुका जुइ । गुटवाजी, हानथापया राजनीतिं निरन्तरता काइ । गुगुं दिंकुन्हु म्हगस थें अध्यक्ष ओली व प्रचण्डं जिमि दथुइ ल्वापु मदु, जिपिं नेकपा, सरकारयात न्ह्याकेत छगू हे पंक्तिइ दु। छुं मतभेद मदु। वक्तव्य वयेफु । राजनीतिइ सुं नं सदां शत्रु व मित्रु जुइमखु। उखान न्ह्यब्वये फु। निम्ह अध्यक्ष दथुया ल्वापु भ्रम सिर्जना याःगु स्वदेशी व विदेशी षडयन्त्रकारीतत खः धायेफु। न्यने । जिं थःत थम्हं कुतिं न्याये । जि जागा खः ला मखु। मेगु विपरीत सः थ्वया वइ । नेकपाया एकता नक्कली खः । कृत्रिम महत्वकांक्षी नेतात व वैचारिक असमानताया जगय् दनाच्वंगु नेकपाया एकतां देय्यात राजनीतिक नेतृत्व बी फइ मखु। थ्वं देय्या ई बर्बाद यानाबी । तीव्र सलं नेकपा विघटन जुइमाःगु खँ हइ । निगुलिं सः न्यने । तर थुपिं थ्वयाच्वंगु सःत जिगु न्ह्यलय् ला ज्वलय् ला ? जि अलमलय् लाइ ।

सम्बन्धित बुखँ

LEAVE YOUR COMMENTS