मानन्धर समुदायया परम्परागत स्वयम्भू भ्वय् क्वचाल 

येँ – केन्द्रीय मानन्धर संघया ग्वसालय् दँय्दसं न्ह्याना वयाच्वंगु परम्परागत स्वयम्भू भ्वय् वंगु शनिवाः क्वचाल । थुगुसी स्वयम्भू भ्वय्या व्यवस्थापन फल्चासाः मानन्धर सनाः गुथि खलः व तःखाछेँ खलः जाना याःगु खः । स्वयम्भू भ्वय्या व्यवस्थापन दँय्दसं थीथी त्वाः, गुथि, खलःपाखें यायेगु याना वयाच्वंगु खः । दँय्दसं होलिपुन्हि धुनेवं न्हापांगु शनिवाः न्यायेका वयाच्वंगु स्वयम्भू भ्वजय् थुगुसी करिब द्वःछियात भ्वय् नकेगु ज्या जूगु खः । थनया स्वयम्भू भुइख्यलय् जूगु स्वयम्भू भ्वय्या हे दथुइ हिदान ज्याझ्वः नं जूगु खः ।

मानन्धर समुदायया दकलय् ज्याथम्ह १०१ दँ दुम्ह ललितमान मानन्धरया प्रमुख आतिथ्यताय् जूगु ज्याझ्वलय् संघया उपसभापति बद्रीनारायण मानन्धरं लसकुस यानादीगु खः । स्वयम्भू भ्वय्या हे दथुइ वंगु दछिया दुने ज्याःजंक्व यानादीपिं, न्हू इहिपा यानादीपिंत नं दसिपौ लःल्हाःगु खः। थुगुसी छम्ह याकः मिसा व निम्ह निम्हतिपू लिसें स्वीन्याज्वः न्हू इहिपा यानादीपिं निम्हतिपूयात मूपाहांपाखें दसिपौ लःल्हायेगु ज्या जूगु खः । ज्याझ्वलय् संघया सभापतिया कार्यकाल पूवंकादीम्ह पुलांम्ह सभापति देवकुमार मानन्धरयात नं सुभाय् पौ लःल्हाःगु खः । अथे हे न्हू इहिपा यानादीम्ह भम्चापिनिगु दथुइ ‘म्युजिकल चियर’ कासा नं जूगु खः ।

कासाय् न्हाप, लिउ व लियालिउ लाकेत ताःलाःपिं निम्हतिपूयात सौराहा, पोखरालगायतया थासय् चाःहिलेगु सिरपाः नापं भाषाथुवाः मथुरा साय्मिपाखें थःगु कृतिया सिडि व नेपालभाषाया नांजाःगु संकिपा जामनः गुभाजुया टिकट सिरपाः कथं लःल्हाःगु खः । संघया कोषाध्यक्ष सन्देश मानन्धरं सुभाय् देछानादीगु ज्याझ्वलय् दैसा मानन्धर सनाःगुथियात आकिवंया स्वयम्भू भ्वय्या व्यवस्थापन यायेगु पाःब्व पौ नं लःल्हाःगु खः ।
ज्याझ्वलय् गौतमदास मानन्धर, सरस्वति मानन्धर, किरण मानन्धर, रामकुमार साय्मि, धर्मरत्न मानन्धरपिंसं सांगीतिक प्रस्तुति नं न्ह्यब्वःगु खः ।

सम्बन्धित बुखँ

LEAVE YOUR COMMENTS