निपु म्येँया म्युजिक भिडियो पिदन

यल (नेपालभाषा टाइम्स)- थनया सुनागूस्थित तःधिकःम्ह भिंद्यःया मूर्तियात कयाः चिनातःगु म्येँया म्युजिक भिडियो पिदंगु दु । सुनागूया संगीतकःमि रुपेश डंगोलं च्वयाः वय्कलं हे लसय् हनादीगु ‘दर्शन याः वने नु’ म्येँया म्युजिक भिडियो वंगु शनिवाः थनया दरवारमार्गय् च्वंगु किंग्स लाउन्जय् जूगु छगू ज्याझ्वःया दथुइ ख्यलिजुजु मदनकृष्ण श्रेष्ठ व हरिवंश आचार्य पितब्वज्या यानादीगु खः ।

सुनागूया दकलय् जिथिम्ह ९८ दँइा धनमाया महर्जनया विशेष उपस्थितिइ मह जोडीपाखें ज्याझ्वःया उलेज्यालिसें म्युजिक भिडियो सार्वजनिक यानादीगु खः ।

मदनकृष्ण श्रेष्ठ, हरिवंश आचार्य, जेम्स प्रधान, भीम तुलाधर, प्रवेशमान शाक्य, बुद्ध साय्मि, ज्योति घिमिरे, भूपेन्द्र वज्राचार्य, यमन श्रेष्ठ, लसता जोशीलिसें झिंखुम्ह नांजाःपिं कलाकारपिंसं हालातःगु म्येँया म्युजिक भिडियोय् सुनागूया निसः स्वयां अप्वः स्थानीयवासी अभिनय यानातःगु दु ।
विश्वया दकलय् तःधिकःम्ह भिंद्यःया मूर्ति दावी यानातःगु उम्ह भिंद्यःया प्रचार प्रसार यायेगु उद्देश्यं म्येँ व म्युजिक भिडियो निर्माण यानागु म्येँ च्वमि डंगोलं कनादिल ।

ज्याझ्वलय् मह जोडीलिसें सुनागुथि समाज परिवारया अध्यक्ष विनोद डंगोल, सिने पत्रकार विजयरत्न असंबरे, म्युजिक भिडियोया निर्देशक सुरेन्द्र तुलाधरं नं थःथःगु नुगःखँ तयादीगु खः । म्युजिक भिडियोया छाँयाकन व सम्पादन सोहन मानन्धरं यानादीगु खः ।
थुकथं हे छुं दिं न्ह्यः जक ‘वा ग्वारा मै’ म्युजिक भिडियो पिथनादीम्ह कलाकार सुरेन्द्र मानन्धरया मेगु म्युजिक भिडियो ‘छगः निगः स्वंगः’ पिहां वःगु दु ।

मानन्धर थम्हं हे च्वयादीगु म्येँ वय्कः व अञ्जन श्रेष्ठं लसय् हनादीगु खःसा सुरेनमान शाक्य व सुमन मानन्धरं सः दुथ्यानाच्वंगु दु । सुरेन्द्र थम्हं निर्देशन यानादीगु म्युजिक भिडियोय् वय्कःलिसें रबिता बके म्येँ हालामि शाक्य व मानन्धरं अभिनय यानादीगु दु । म्युजिक भिडियोया छाँयाकन सोहन मानन्धरं व सम्पादन इन्द्र मानन्धरं यानादीगु खः ।