पोर्तुगलया नेवाःतयसं नेवाः खलः नीस्वन

येँ । युरोपेली देय् पोर्तुगलय् च्वंपिं नेवाःतयसं नं संगठित जुयाः छगू नेवाः संस्था नीस्वंगु दु । म्हीग आइतवाः अनया लिस्बोनय् भाषासेवीपिं डा. ज्योतिप्रभा तुलाधर व स्वयम्भूधर तुलाधरया अध्यक्षताय् च्वंगु छगू मुँज्यां सहलह यासें छगू नेवाः संस्था नीस्वनेगु निर्णय याःगु खः । मुँज्यां थ्व संस्थाया नां ‘पोर्तुगल नेवाः खलः’ तयेगु निर्णय यासें छगू तदर्थ समिति नं दयेकूगु दु ।
तदर्थ समितिया संयोजक राजेशमान जोशी जुयादीगु दुसा सह–संयोजक श्याम श्रेष्ठ जुयादीगु दु । अथे हे दुजलय् रीता शाक्य, गणेश श्रेष्ठ, सुजेन्द्र श्रेष्ठ, नविन महर्जन, मनोज श्रेष्ठ, समिर किरण जोशी, अमृत रत्न शाक्य, प्रिया श्रेष्ठ व गीता मास्के च्वनादीगु दु ।

समितिया सल्लाहकारय् डा. ज्योतिप्रभा तुलाधर व स्वयम्भूधर तुलाधर च्वनादीगु दु । संस्थापाखें पोर्तुगलय् च्वंपिं फयांफछि फुक्कं नेवाःतय्त कःघानाः संगठित जुइगु व थीथी ज्याझ्वःत याना वनेगु निर्णय नं याःगु दु ।