बेरुतय् जूगु विस्फोटय् १४१ फिटया गाः

एजेन्सी – लेबनानया राजधानी बेरुतय् च्वंगु बन्दरगाहय् जूगु विस्फोट लिपा अन १४१ फिट तगाःगु गाः जूवंगु खँ अनुसन्धानकर्तातय्सं धाःगु दु। बन्दरगाहय् भण्डार यानातःगु एमोनियम नाइट्रेट नांया रसायन वंगु मंगलवाः विस्फोट जूबलय् १५० म्हं मल्याक मनूतय् ज्यान वंगु खःसा बन्दरगाहया लिक्क लाःगु यक्व हे भवनय् क्षति जूगु खः ।

फ्रान्सेली अनुसन्धानकर्तात लिसे जानाः ज्या यानाच्वंगु लेबनानी सुरक्षा अधिकारीतय्सं एएफपीयात धाःगु दु, ‘विस्फोट जूगु थासय् थ्यंमथ्यं ४३ मिटर अर्थात १४१ फिट गाः वंगु दु ।’ फ्रान्सं घटनाया अनुसन्धान व उद्धारया निंतिं तःधंगु पुचः लेबनानय् परिचालन यायेधुंकूगु दु। लिसें कतार, रुस, जर्मनीया उद्धारकर्मीत नं बेरुतय् ज्या यानाच्वंगु दु। अमेरिकी भूगर्भ इन्ष्टिच्यूटं विस्फोटं ३.३ म्याग्नीच्यूडया भुखाय् बराबरया धक्का महसुस जूगु खँ धाःगु दु। विस्फोटया कारणं म्होतिं नं ६ हजार मनूत घाःपाः जूगु खःसा छेँ दुंगुलिं स्वंगू लाखं मल्याक मनूत विस्थापित जूगु दु ।