युक्रेनया राजधानी किभय् आक्रमण

किभ – युक्रेनया राजधानी किभय् तःधंगु ल्याखय् क्षेप्यास्त्र व ड्रोन आक्रमण जूगु दु । विहीवाः रुसं याःगु आक्रमणय् झिंस्वम्ह सीगु दुसा स्वीम्हं मल्याक घाःपाः जूगु दु । घाःपाः जूपिंलय् मस्त नं लाःगु दु ।

किभया आपालं थासय् मिं नयाच्वंगु व तःधंगु ल्याखय् भौतिक संरचना नं क्षति जूगु युक्रेनी अधिकारीतय्‌सं धाःगु दु । किभय् च्वंपिंत सुरक्षित थासय् ल्ह्ययेगु ज्या जुयाच्वंगु अधिकारीतय्‌सं धाःगु दु । उद्धारकर्मीतय्‌सं थीथी थासं ३४ म्हेसित सुरक्षित उद्धार याःगु थप उद्धारया ज्या नं जुयाच्वंगु धाःगु दु ।

युुक्रेनी वायु सेनायाकथं रुसं ७४ क्षेप्यास्त्र व ४९६ ड्रोन प्रहार याःगु खःसा अप्वःथें प्रहार राजधानी किभयात हे लक्षित यानाः याःगु खः । हवाई रक्षा प्रणालीं आपालं क्षेप्यास्त्र व ड्राने कुर्कूगु धाःगु दुसा २५ गः क्षेप्यास्त्र व १२ गः ड्रोन किभया थीथी थासय् कुतुं वंगु खः ।

आक्रमणया कारणं आपालं भवन, सवारीसाधनलिसें थीथी संरचना क्षति जूगु दुसा एम्बुलेन्स, दमकल, होटल आदिइ नं क्षति जूगु दु । किभया सैन्य प्रशासन प्रमुखं रुसं जानाजान आवासीय भवनया लागायात निशाना दयेकूगु द्वपं बिउगु दु ।

युक्रेनया विदेशीमन्त्री आन्द्री सिबिहां थप हवाई सुरक्षा प्रणालीइ ग्वाहालि यायेत व रुसयात कडा स्वयां कडा प्रतिबन्ध तयेत अन्तराष्ट्रिय समुदाययात अपिल याःगु दु । वंगु बाःछिया दुने रुसं युक्रेनय् याःगु थ्व तःधंगु आक्रमण खः ।