‘६ गते न्हूम्ह सभामुखया निर्णय जुइ’

येँ – उपसभामुख शिवमाया तुम्बाहाम्फें राजीनामा बिउ धकाः सत्तारुढ नेपाल कम्युनिष्ट पार्टीं (नेकपां) थःत निर्देशन बीगु गलत जूगु खँ धयादीगु दु। छगू अनलाइन मिडियायात अन्तर्वार्ता बिसें वय्कलं उगु खँ धयादीगु खः ।

वय्कलं नेकपां सभामुख पदय् उम्मेदवारी बीगु निर्णय याःगुलिं थः नं राजीनामा बीत तयार जुयागु खँ नं धयादीगु दु। वय्कलं धयादी, ‘मार्ग प्रसस्त यायेगु जुइ तर राजीनामा बीवं मैदान प्वनी धकाः म्हगस मम्हंकूसां जिउ ।’

राजनीतिक दलतय्सं सभामुखया उम्मेदवार क्वःछीवं निर्वाचन प्रक्रिया शुरु जुइगु खँ धासें वय्कलं थम्हं संसदया ज्येष्ठ सदस्ययात राजीनामा बीगु खँ नं कनादीगु दु। थ्व स्वयां न्ह्यः नेकपां सभामुख पदय् उम्मेदवारी बी धकाः मधाःगु व स्वन्हु न्ह्यः जक उम्मेदवारी बीगु निर्णय याःगुलिं आः थम्हं नं राजीनामा बीगु खँ नं वय्कलं स्पष्ट यानादिल । ‘माघ ६ गते बैठक सःतूगु दु, उकुन्हु हे सभामुखया बारे नं निर्णय जुइ’ वय्कलं धयादिल ।

वय्कलं थःत पार्टीं उपसभामुख दयेकूगु खःसां उपसभामुख जुइधुंकाः थः पार्टीया साधारण दुजः तकं मखयेधुंकूगुलिं थःत पार्टीं कारबाही यायेगु हेअनुचित जुइगु दावी नं यानादिल ।  वय्कलं प्रतिनिधिसभा छगू बिस्कं कथंया संस्था जूगुलिं उकियात थम्हं नेतृत्व बियाच्वनागु खँ धासें दावी यानादिल, ‘नेतृत्व बियाच्वंम्ह मनूयात गुगुं दलं पद त्वःति धाये फइ मखु। यदि धाल धाःसां नं जिं पद त्वःते मजिउ ।’

सम्बन्धित बुखँ

LEAVE YOUR COMMENTS