इतुंबहालय् संघदानया निंतिं अक्षय कोष

येँ(नेपालभाषा टाइम्स)÷थनया श्री भाष्करदेव संस्कारित केशचन्द्र कृत पारावत महाविहार इतुंबहलय् संघदानया निंतिं छगू अक्षय कोष स्वनेगु ज्या जुल । महाविहारया बुसादँयाकुन्हु संघ दान यायेगु ल्याखं इतुंबहाःया संघ थाकुलि स्थविर सानुमान शाक्य, दिवंगत चन्द्रदेवी शाक्य व वय्कःया छेँजःपिंसं अक्षय कोष स्वनादीगु खः ।

जूगु ज्याझ्वलय् ८,८८,८८८.00 तका दांया अक्षय कोष स्वंगु खः । इतुंबहाःया मू थाय्पा मणिरत्न शाक्यं अक्षय कोषया ब्यानर उलेज्या यानादीगु खःसा चक्रेश्वर ओमरत्न वज्राचार्यं स्वन्ति वाचन यानादीगु खः । उगु इलय् दातापाखें अक्षय कोष वापतया चेक इतुंबहाः संरक्षण समाजया नायः प्रज्ञारत्न शाक्ययात लःल्हानादीगु खः ।

अक्षय कोषय् दातापाखें बचत खाता चायेकेत थप न्याद्वः तका दां नं ग्वाहालि यानादीगु खः । अथे हे ज्याझ्वलय् कोषया निंतिं दातालिसें बहाः थाकुलि स्थविर शाक्यया म्ह्याय्पिं पद्मतारा शाक्य (पाक्व) नीन्याद्वः रोशनीतारा शाक्य (ओमबहाः) नीन्याद्वः, मू थाय्पा मणिरत्न शाक्यं न्यय्द्वः, बहाः न्वकु धर्मवीर शाक्यं नीद्वः, अमृतमान शाक्यभिक्षु झिद्वः दिवंगत जोगवीर (मुखिया)या म्ह्याय् गंगादेवी शाक्यं न्याद्वः तका दां नं ग्वाहालि यानादीगु खःसा सुरेन्द्र शाक्य, पे्रमकाजी शाक्य व दिवंगत पुण्यरत्न शाक्यया म्ह्याय् लक्ष्मी शाक्यं नं कोषय् ग्वाहालि यायेगु बचं बियादीगु खः ।

संघदानलिसें अक्षय कोष परिचालनया विषयय् समाजया नायः शाक्य, अक्षय कोषय् ग्वाहालि यानादीम्ह दाता अमृतमानं नं नुगःखँ तयादीगु खः । दाता स्थविर शाक्यया काय डा. योगेन्द्रमान शाक्यं कोष नीस्वने खनाः थः तसकं लय्ताः धासें थुकथंया कोष स्वनेगु इच्छा थः मांअबुं तःदँ न्ह्यःनिसें यानाच्वंगु व उकिया निंतिं दांतकं मुंकातःगु जानकारी बियादीगु खः ।