प्रहरी छ्यलाः बञ्चरेडाँडाय् फोहर वात
येँ – बन्चरेडाँडाय् प्रहरी बल छ्यलाः फोहर वायेगु सुरु जूगु दु । म्हिगः फोहर वायेगु निंतिं वंगु गाडीयात बन्चरेडाँडा ल्यान्डफिल साइत प्रभावित क्षेत्र सरोकार समितिया मनूतय्सं पनेवं प्रहरी बल छ्यलाः फोहर वाःगु खः ।
म्हिगः सुथय् येँ नं फोहोर ज्वनाः वंगु गाडीयात पनेगु निंतिं सरोकार समितिया मनूत सुथंनिसें बञ्चरेडाँडा व सिसडोलया दथुइ च्वनाच्वंगु खः । फोहर वायेत पनाच्वंपिंत प्रहरीं नियन्त्रणय् कयाः अवरुद्ध जूगु सतक चायेकाः फोहर वाकेबिउगु खः । थ्व झ्वलय् प्रहरीं नीम्ह स्वयां अप्वः स्थानीय वासिन्दायात नियन्त्रणय् काःगु खः ।
स्थानीय वासिन्दा सन्नोत उप्रेतीया कथं थःपिंसं शान्तिपूर्ण आन्दोलन यानाच्वनागु खःसां प्रहरी दमन याःगु खँ धाःगु दु । थःपिंसं स्थानीयतय्त दमन यायेमत धकाः इनाप यानाच्वंसां प्रहरीं बलपूर्वक धरपकड याःगु द्वपं बिउगु दु । थ्व झ्वलय् प्रहरी मिस्तय्त हातपात याःबलय् गुलिखेसिया लं गूगु, ज्याथापिंत प्रहरी प्यंकूगु द्वपं स्थानीयतय्सं बिउगु दु ।
लँ चायेकेगु निंतिं प्रहरीं आन्दोलन यानाच्वंपिनि छेँय् छेँय् वयाः हे ज्वना यंकूगु, लँय् न्यासि वनाच्वंपिंत कथिं दायाः दमन याःगु खँ उमिसं धाःगु दु । प्रहरीं हस्तक्षेप यानाः लँ चायेके धुंकाः येँ नं फोहर ज्वनावंगु गाडी बञ्चरेडाँडाय् वंगु खः । थ्व स्वयां न्ह्यः येँ महानगरपालिकाया मेयर बालेन साहं फोहोर वायेगु झ्वलय् बल मछ्यलेगु धया वयाच्वंगुु खः ।
म्हीगः शहरी विकास मन्त्रालय, येँ महानगरपालिका, यल महानगरपालिका, नुवाकोटया ककनी गाउँपालिका, धादिंगया धुनिबेसी नगरपालिकाया जनप्रतिनिधि दथुइ फोहर वायेगु निंतिं सहमति जूगु खः । तर उगु सहमतियात स्थानीय वासिन्दायात सहभागी मयासे याःगु धासें सरोकार समितियापिंसं माने याये फइमखु धकाः सतकय् पंगः थंवःगु खः ।
शहरी विकास मन्त्रालयया कुतलय् च्वंगु बैठकय् जूगु सहमतिइ शहरी विकास मन्त्रालयया आयोजना निर्देशक रविन्द्र बोहरा, येँ महानगरपालिकाया प्रमुख प्रशासकीय अधिकृत लोकनाथ पौड्याल, धुनिबेसी नगरपालिकाया प्रमुख प्रशासकीय अधिकृत हरिदत्त कँडेल व ककनी गाउँपालिकाया प्रमुख प्रशासकीय अधिकृत गीताकुमारी शर्मां हस्ताक्षर याःगु खः ।
LEAVE YOUR COMMENTS