बौद्ध वक्तृत्व कलाय् विजय जूूपिंत सिरपाः लःल्हात

येँ(नेपालभाषा टाइम्स)( बौद्ध युवा कमिटी यलया ग्वसालय् २८ क्वःगु स्वनिगःव्यावी बौद्ध वक्तृत्व कला धेंधेंबल्लाः कासा जुल । समितिया ग्वसालय् जूगु वक्तृत्वकला कासाय् विजयी जूपिंत वंगु शनिवाः छगू ज्याझ्वःया दथुइ सिरपाः लःल्हाःगु खः ।

कासाय् मैत्रेय युवा संघ ख्वपया प्रमिला धुख्वा न्हाप लाःगु खःसा शाक्यसिंह बौद्ध परियत्ति शिक्षालयया अनिशा श्रेष्ठ लिउ व धर्म साकच्छा संघ हःखाया प्रतिष्ठा शाक्य लियांलिउ लाःगु खः । कासाय् निर्वाणमूर्ति विहारया सजगता मानन्धर व दीपावति पुस्तकालयया पारमी शाक्यं हःपाः सिरपाः त्याकादीगु दु ।

कासाय् न्हाप जूम्हेसित दसिपौलिसें झिंन्याद्वः तकानापं निम्हेसिया निंतिं पोखराया एकतर्फी हवाइ टिकट सिरपाःकथं लःल्हाःगु खःसा लिउयात दसिपौलिसें झिद्वः व लियांलिउयात दसिपौलिसें च्याद्वः तका दां नापं भोटेकोशी बञ्जी जम्पया कुपन नं लःल्हाःगु खः । थीथी झिगू संस्था ब्वति काःगु कासाय् ब्वति कयादीपिंत प्रोत्साहन स्वरुप द्वःछि, द्वःछि तका दां लःल्हाःगु खः ।

मूपाहांकथं झायादीम्ह नांजाःम्ह समाजसेवी मोतिलाल शिल्पकारं दां सिरपाः लःल्हानादीगु खःसा बागमति प्रदेश सांसद शोभा शाक्यं दसिपौ लःल्हानादीगु खः । कासाया निर्णायक मण्डलय् भिक्षु विमलो, मदनरत्न मानन्धर, शाक्य सुरेन, व नरेशवीर शाक्य च्वनादीगु खः ।

ज्याझ्वलय् समितिया संस्थापक राजु शाक्य व पुलांम्ह नायः सुनिल महर्जनयात दोसल्ला न्ययेकाः हनापौ लःल्हासे सम्मान याःगु खः । वय्कःपिंत समितिया नायः सतिश शाक्यं स्वांमाः क्वखायेकाः, भिक्षु कोण्डन्यं दोसल्ला न्ययेकादीगु खःसा मूपाहां मन्त्री श्रेष्ठं हनपौ लःल्हानादीगु खः ।