क्वय्या सदनय् ट्रम्पविरुद्ध महाभियोग पारित

एजेन्सी – अमेरिकी राष्ट्रपति डोनाल्ड ट्रम्प अमेरिकी इतिहासय् निक्वःतक महाभियोग फःम्ह न्हापांम्ह राष्ट्रपति जूगु दु। म्हिगः अमेरिकी संसदया क्वय्या सदन हाउस अफ रिप्रेजेन्टिभं ट्रम्पविरुद्ध तःगु महाभियोग प्रस्ताव पारित यायेवं निक्वः तक महाभियोग फःम्ह ट्रम्प न्हापांम्ह अमेरिकी राष्ट्रपति जूगु खः ।

छवाः न्ह्यः संसद भवन क्यापिटल हिलय् जूगु हिंसा ट्रम्पं उक्से याःगुलिं हे जूगु धासें डेमोक्रेट सांसदतय्सं क्वय्या सदनय् ट्रम्पविरुद्ध महाभियोग प्रस्ताव यंकूगु खः । थ्व प्रस्तावय् ट्रम्पया हे दल रिपब्लिकनया झिम्ह सांसदतय्सं नं साथ बीवं २३२ मतं पारित जूगु खः । क्वय्या सदनय् डेमोक्रेटतय् २२२ म्ह सांसद दुगु खःसा महाभियोग प्रस्ताव पारित यायेत २१७ मत दःसा गाःगु खः । प्रस्तावया विरुद्धय् रिपब्लिकनया  १९७ मत जक लाःगु खः ।

क्वय्या सदनं पारित जूगु प्रस्ताव च्वय् सदन सिनेटय् यंकी । तर सिनेटय् थ्व प्रस्ताव विरुद्ध वय्कः पदमुक्त जुइधुंकाः जक छलफल जुइ । वय्कः वइगु जनवरी २० तारिखय् राष्ट्रपति पदं मुक्त जुइत्यंगु दु। सिनेटय् थ्व प्रस्ताव पारित जुइत दुईतिहाइ बहुमत माः । थुकिया निंतिं रिपब्लिकनतय् झिंन्हय्म्ह सांसदत आवश्यक जुइ । न्यूयोर्क टाइम्सं २० म्ह रिपब्लिकन सिनेटरत ट्रम्प दोषी खः धयागु पक्षय् दुगुलिं सिनेटय् नं थ्व प्रस्ताव पारित जुइफु धाःगु दु। थ्वयां न्ह्यः सन् २०१९ य् लाःगु महाभियोगय् धाःसा रिपब्लिकनतय्सं साथ मबिउगुलिं सिनेटं पारित जुइमफुगु खः ।

सिनेटं पारित जूसां ट्रम्पयात  सन् २०२४ या राष्ट्रपति निर्वाचनय् उम्मेदवार जुइत धाःसा पने मफइगु खँ धाःगु दु। यदि ट्रम्पयात उबलय् पनेगु खःसा उम्मेदवार जुइमदइगु प्रस्तावय् हाकनं मतदान याकेमालीगु खँ धाःगु दु। ट्रम्पं आः हे सन् २०२४ या निर्वाचनय् दनेगु धकाः धयाच्वंगुलिं नं थुकियात कयाः यक्वस्यां चिउताः प्वंकाच्वंगु दु। उकिं गुलिखे रिपब्लिकनतय्सं ट्रम्पयात महाभियोग मतसे राष्ट्रपति जुइगु पाखें पनेगु उपाय जक नालेमाःगु बिचाः प्वंका हयाच्वंगु खः ।

सम्बन्धित बुखँ

LEAVE YOUR COMMENTS