धरहराया पार्किङ विवाद
येँ (नेपालभाषा टाइम्स)÷येँ महानगरपालिकां धरहराय् शुरु याःगु निःशुल्क पार्किङयात कयाः संघीय सरकार व येँ महानगरपालिका दथुइ विवाद शुरु जूगु दु । येँ मनपां न्हू सतकय् पार्किङ निषेध यानाः धरहराय् निःशुल्क पार्किङया व्यवस्था याःगु खःसा सहरी विकास मन्त्रालयं थ्व पार्किङ तत्काल दिकि धकाः महानगरपालिकायात पौ छ्वया हयेवं विवाद ब्वलंगु खः ।
मन्त्रालयया सहरी विकास तथा भवन निर्माण विभाग केन्द्रीय आयोजना कार्यान्वयन इकाई (भवन तथा आवासं) वंगु माघ १८ गते महानगरपालिकायात पौ च्वःगु पतिइ धयातःगु दु, ‘अन महानगरपालिकां पार्किङ याःगुलिं निर्माण व्यवसायी श्री जीआईईटिसी–रमन जेभीपाखें आयोजनाय् क्षति जुइ फइ धासें आर्थिक क्षतिपूर्ति लिसें आयोजना क्वचायेकेत थप म्याद माग याःगुलिं आःयात उगु पार्किङ बन्द यानाः आयोजना इलय् क्वचायेकेत ग्वाहालिया निंतिं इनाप यानाच्वना ।’
सहरी विकास आयोजनाया निर्देशक झप्पर सिंह विश्वकर्मां छ्वःगु पतिइ न्ह्यःने धयातःगु दु, ‘दयेकेगु ज्या क्वचाइगु चरणय् थ्यंगु अवस्थाय् आकाझाकां थुगु इकाईलिसे छुं समन्वय वा जानकारी हे मयासे मनपां यकःति ढंगं छगू तला भूमिगत पार्किङ चायेका बिउगु उचित मजू ।’
अथे हे वंगु माघ १९ गते सहरी विकास मन्त्रालयं नं दयेकाच्वंगु धरहराया ज्या याकनं क्वचायेकाः सर्वसाधारणयात पार्किङ सुविधा याकनं बीगु मन्त्रालयया चाहना खःसां महानगरया बलजफ्तीं यानाः योजनाय् पंगः ब्वलंगु खँ धाःगु खः ।
मन्त्रालयया थ्व पौ वयेवं मनपाया मेयर बालेन साहं सामाजिक सञ्जालय् छगू स्टाटसपाखें उकियात लिसः बिसें धरहराया अन्डरग्राउन्ड निःशुल्क पार्किङ बन्द मयायेगु घोषणा यानादीगु खः ।
मेयर साहं अव्यवस्थित सहरी पार्किङयात थम्हं व्यवस्थापन यायेत स्वयां नं पार्किङया ठेक्का कयाः नेपाल सरकारया सम्पत्तिइ रजाइँ यायेगु मनसाय खनेदुगु धासें दयेकेगु ज्या हे क्वमचायेवं निदँ न्ह्यः तत्कालीन प्रधानमन्त्री केपी शर्मा ओलीं छाय् उलेज्या यात धकाः नं न्ह्यसः थनादीगु दु ।
तत्कालीन प्रधानमन्त्री केपी शर्मा ओलीं दयेकाच्वंगु धराहरा २०७८ वैशाख ११ गते उलेज्या यानादीगु खःसा उकियात कयाः प्यखेरं विरोध जूगु खः । अज्याःगु विरोधयात लिसः बिसें तत्कालिम प्रम ओलीं ‘दयेकेगु ज्या क्वमचाःगु खःसा जि धरहराया २० तल्लाय् गय् यानाः थ्यन ले ?’ धकाः न्ह्यसः तयादीगु खः ।
पुलांम्ह प्रम ओलीया उगु हे धापूयात न्ह्यःने तसें मेयर साहं उद्घाटन जूगु २ वर्ष ९ महिना लिपा वयाः धरहरा दयेकेगु ज्या क्वमचाःनि धायेगु व अन जुयाच्वंगु पार्किङ बन्द याकेत स्वयेगु तर्क जायज मखु धकाः प्रतिवाद यानादीगु खः । मन्त्रालयं धाःसां अन पार्किङ धाःसा चालु दु ।
LEAVE YOUR COMMENTS