कोरोनाया इलय् चुनाव मयायेत डाक्टरतय् इनाप

येँ -सरकारं घोषणा याःगु चुनावं देशय् कोरोनाया महामारी अझ तच्वयेका बीगु ख्याच्वः स्वास्थ्यविद्तय्सं बियाहःगु दु । जःलाखःला देय् भारतय् तकं थीथी प्रदेशय् याःगु चुनावया कारणं अन कोरोनाया महामारी तच्वया वंगु खः धकाः सरकारया आलोचना जुयाच्वंगु दु ।
नेपालय् कोरोना महामारी विरुद्ध न्ह्यःनेया झ्वलय् सक्रिय जुयाच्वंपिं ९ म्ह चिकित्सकतय्सं थन छगू मंकाः वक्तव्य जारी यासें आः नेपालय् जुइत्यंगु थ्व चुनावं नं महामारी न्यंका यंकेफु धासें थ्व चुनाव बहिष्कार यायेत इनाप याःगु दु ।

थज्याःगु महामारीया इलय् चुनाव यायेगु छुं नं कथं पाय्छि मखु धासें चुनाव यायेगु सरकारया घोषणायात नं आलोचना यानातःगु दु ।
प्रम ओलीं धाःसा महामारीया इलय् नं आवश्यक जुल धाःसा चुनाव याये फइगु खँ धयातःगु दु । वंगु जेठ ७ गते वालुवाटारय् याःगु पत्रकार सम्मेलनय् न्ववासें वय्कलं यदि संसद विघटन जुयाः चुनावय् वनेमाःगु अवस्था वल धाःसा सामाजिक दूरी कायम यानाः जूसां मतदान याके फइगु खँ कनादीगु खः ।

महामारीया इलय् नं भारत व अमेरिकाय् चुनाव जूगु खँ न्ह्यथँसें वय्कलं आः वइगु फागुण तक स्थानीय तहया चुनाव मयासें मगाःगु अवस्था दुगु खँ नं कनादीगु खः । उगु इलय् वय्कलं वंगु पुस ५ गते थम्हं संसद भंग यायेगु धकाः यानागु निर्णय गलत जू थें थःत गबलें नं मताःगु खँ पत्रकारतय्त कनादीगु खः ।

म्हिगः वय्कलं पत्रकारतलिसे खँ ल्हासें चुनाव न्ह्यः फुक्क हे जनतायात खोप बी सिधयेकेगु ग्वसाः बारे कनादीगु दु ।

सम्बन्धित बुखँ

LEAVE YOUR COMMENTS