१६० म्हेसित यौन शोषण याःम्हेसित १७५ दँ जेल सजाय
एजेन्सी- अमेरिकाया ओलम्पिक जिम्नास्टिक टिमया पुलांम्ह चिकित्सक लेरी नस्सारयात यौन उत्पीडनया मामिलाय् १७५ दँया जेल सजाय न्यंकूगु दु । सछि व खुइम्हेसिनं बिउगु बयान लिपा वयात थ्व सजाय न्यंकूगु खः । सजाय न्यंके न्ह्यः नस्सारं माफी फ्वनेगु कुतः याःगु खः, तर जजं वयागु खँ हे मन्यँसें ल्यं दुगु जिन्दगी जेलय् च्वनेमाःगु सजाय न्यंकूगु खः ।
नस्सारयात तःम्ह हे मिस्तय्त यौन उत्पीडन याःगुलि दोषी ठहर याःगु खः, गुकी छुं छुं ओलम्पिक कासामित नं लाःगु दु ।
५४ दँया नस्सारयात थ्वयां न्ह्यव नं ‘चाइल्ड पोर्न’ (मस्तय् यौन भिडियो) तयातःगु द्वपनय् खुइदँया जेल सजाय न्यंकातयेधुंकूगु खः ।
जज रोजमेरी अकीलीनां थ्व सजाय न्यंकेगु झ्वलय् नस्सार विरुद्ध तसकं कडा शब्द न्ववाःगु खः ।
नस्सारयात संवोधित यासें जज अकिलिनां धाःगु खः, ‘बचे जूपिं मिस्तय् खँ न्यनाः जितः गुलि राहत जुल, उलि हे राहत छंत सजाय न्यंके खनाः जूगु दु । छाय्कि सर, छ जेलं पिने च्वने लाय्कम्ह मनू हे मखु ।’ थु
किया लिसें जजं धाःगु खः, ‘जिं नकतिनि छंगु मृत्युया वारेन्टय् दस्तखत यानाबियागु दु ।’
नस्सारपाखें पीडितपिंसं वंगु छवाः न्ह्यवनिसें अदालतय् बयान बियाच्वंगु खः । अन्तय् नस्सारयात थःगु पक्ष तयेत ई बिउबलय् वं माफी फ्वनेकथं धाःगु खः, ‘छुं न्ववायेत जिके शब्द मदु, छु जुल उकिया निंतिं जितः तसकं अफसोस दु ।’
प्यक्वः तकया ओलम्पिक च्याम्पियन नीदँया अमेरिकी जिम्नास्टिक कासामि सिमोन बाइल्सं नं छगू ट्विट यासें नस्सारं थःत नं यौन शोषण यायेगु खँ सार्वजनिक याःगु खः ।
बिबिसीं धाःकथं बयान बिउपिं यक्व हे मिस्तय् घटनाय् समानता खनेदुगु खः । नस्सारं मिस्तय्त उपचारया निंतिं थःथाय् सःती, अले उमिगु उपचार यायेगु पलेसा उमिगु म्हय् खेलवाड याइगु जुयाच्वन । थथे उपचार याये धकाः वःपिं गुलिखे मिसामस्त ला ताःई तक थःगु यौन उत्पीडन जूगु धयागु हे मसिउपिं लानाच्वन ।
LEAVE YOUR COMMENTS