येँ महानगरया गुक्वःगु अधिवेशन असारय्

येँ -येँ महानगरपालिकाया गुक्वःगु अधिवेशन थ्व हे वइगु असारया २ गतेनिसें न्ह्याइगु जूगु दु । अधिवेशन स्वयां न्ह्यः च्वंगु कार्यपालिकाया बैठकं उगु मिति क्वःछिउगु खः ।
येँ महानगर प्रमुख विद्यासुन्दर शाक्यया अध्यक्षताय् राष्ट्रिय सभागृहय् आः नकतिनि च्वंगु ६१ क्वःगु कार्यपालिकाया बैठकं वइगु असार २ गते गुक्वःगु अधिवेशन यायेगु मिति क्वःछिउगु खः ।

कोरोना भाइरस (कोभिड–१९) रोकथाम, नियन्त्रण व न्यूनीकरणया निंतिं येँ महानगरं न्ह्याकूगु थीथी ज्या व गतिविधिया बारे समीक्षा यायेत च्वंगु कार्यपालिकाया बैठकं असार २ गते येँ महानगरया गुक्वःगु अधिवेशन यायेगु मिति क्वःछिउगु खः । अधिवेशनया न्हापांगु दिंकुन्हु आर्थिक दँ ०७८÷७९या नीति तथा कार्यक्रम पेश जुइगु येँ महानगरं न्ह्यथंगु दु ।

उगु इलय् येँ महानगर प्रमुख शाक्यं वइगु आर्थिक दँय् यायेमाःगु ज्यायात योजनाया रुपय् संकलन व वडा समितिया बैठकं प्राथमिकीकरण यानाः छ्वया हयेत वडाअध्यक्षतय्त इनाप यानादिल । वडा समितिया बैठकय् स्वयत थः नं उपस्थित जुयाः छुं सयेकेगु इच्छा दु धासें येँ महानगर प्रमुख शाक्यं वडा समितिया बैठक च्वनीगु इलय् थःत नं सःतेत इनाप यानादीगु दु ।

कार्यपालिकाया उगु बैठकं कोभिडया महामारी नियन्त्रणया निंतिं येँ महानगरपाखें आतक न्ह्याकूगु थीथी ज्याया अनुमोदन नं याःगु खःसा कोरोनाया महामारी पनेत जूगु ज्याया विषयय् कार्यपालिकाया दुजःपिं न्यनादीगु न्ह्यसःया लिसः नं प्रमुख शाक्यं बियादीगु खः । वय्कलं धयादीगु दु, ‘थुगुसी महानगरपाखें सरकारी व सामुदायिक अस्पतालया क्षमता, पूर्वाधार विकास, आवश्यक स्वास्थ्य सामग्री लगायतया ज्याय् ग्वाहालि यानागु दु । मानवीयता व मानव जीवन रक्षाया निंतिं यायेगु ज्या सशर्त जुइमखु । उकिं महानगरं याःगु ज्या निःशिर्त खः ।’

बैठकय् महानगरं वडास्तरय् संचालन यायेत्यंगु खोप केन्द्र, कोरोना संक्रमितया व्यवस्थापनया निंतिं आइसोलेसन संचालन, एम्बुलेन्स संचालन लगायतया विषययात कयाः २ वडाअध्यक्ष राजेन्द्रकुमार श्रेष्ठ, ४ वडाअध्यक्ष मोहन विष्ट, ५ वडाअध्यक्ष रमेश डंगोल, ७ वडाअध्यक्ष शुद्धकुमार डंगोल, १० वडाअध्यक्ष रामकुमार केसी, १५ वडाअध्यक्ष ईश्वरमान डंगोल, २३ वडाअध्यक्ष मचाराजा महर्जन व २५ वडाअध्यक्ष नीलकाजी शाक्यं थःथःगु धारणा तयादीगु खः ।

सम्बन्धित बुखँ

LEAVE YOUR COMMENTS