ने. सं. ११४३ ञलाथ्व चतुर्दशी -

छु जुयाच्वन प्रधान–सुनार प्रकरण ?

येँ – जातीय भेदभाव याःगु धइगु द्वपं बियाः दलित कार्यकर्ता रुपा सुनारं तःगु रिटयात कयाः सर्वोच्च अदालतं बिउगु आदेश कथं प्रहरीं ज्या न्ह्याकाच्वंगु खँ सीदुगु दु । प्रहरीं तत्कालीन शिक्षा मन्त्री कृष्ण गोपाल श्रेष्ठं थ्व मुद्दाय् छु गज्याःगु हस्तेक्षप याःगु खः धकाः छानबिन यानाच्वंगु खः । तर आः तक पूर्व मन्त्री श्रेष्ठयात छुं न्यनेकने धाःसा मयाःनि ।
नापं रुपा सुनारया मोबाइलय् टेप जुयाच्वंगु संवाद न्यनेगु ज्या नं जुयाच्वंगु खँ धाःगु दु । तर अदालतया आदेश कथं सुनार नापं वं हे ल्यःम्ह मनू तयाः जक मोबाइल स्वयेगु ज्या जुयाच्वंगु दु । उकी विपक्षीपाखें धाःसा सुयातं तयेगु आदेश बिउगु मदु ।

लिसें थौंकन्हय् सर्वोच्चया आदेश कथं रुपा सुनारयात प्रहरीया सुरक्षा बियाः तयातःगु खँ नं सीदुगु दु । सुनारं थःगु जिउ ज्यानया सुरक्षा मंत धासें सुरक्षा माग याः कथं अदालतं वय्कःयात सुरक्षा प्रदान यायेत प्रहरीयात आदेश बिउगु खः।

उखे थ्व प्रकरणय् पीडित सरस्वती प्रधानं काठमाडौं जिल्ला अदालतय् दर्ता यानातःगु मुद्दायात कयाः नं सुनुवाईया तयारी जुयाच्वंगु खँ सीदुगु दु । प्रधानं सुनार विरुद्ध थीथी न्यागू द्वपं बियाः मुद्दा दर्ता यानादीगु खः । उकी धाःसा आः तक सुनुवाई मजूनि ।

प्रधानं सुनार विरुद्ध थःगु गोप्यता भंग याःगु, थःलिसे जूगु संवाद गैरकानुनी रुपं टेप याःगु, उकियात सार्वजनिक याःगु, निषेधाज्ञाया नियम हाजांगायाः क्वथा मालेगु त्वहचिनाः पिहां वयेगु ज्या याःगु आदि द्वपं बियाः मुद्दा दर्ता यानादीगु खः ।

मेखे थ्व प्रकरणय् प्रधानया पक्षय् जनचेतना थनेत सक्रिय जुयाच्वंपिं नेवाः अभियन्तातय्सं मुद्दायात कयाः नियमित रुपं निगरानी तयेगु लिसें सरसल्लाह यायेगु ज्यायात नं निरन्तरता बियाच्वंगु खँ सीदुगु दु ।