सामुहिक टिका व ज्येष्ठ नागरिक सम्मान

येँ- येँ महानगरपालिका वडा नं. ३पाखें मोहनि नखःया लसताय् सामुहिक टिका व ज्येष्ठ नागरिक सम्मान ज्याझ्वः याःगु दु । येँ मनपा ३ वडापाखें मोहनि नखतं कुबिया च्वंगु सामाजिक सद्भावया पक्षयात पुस्तान्तरण यायेत धासें उकथं सामुहिक टिका व ज्येष्ठ नागरिक सम्मान ज्याझ्वः याःगु खः ।

उगु इलय् पुलांम्ह उपप्रधानमन्त्रीलिसें नेकपा (एमाले)या नेता ईश्वर पोखरेल, येँ महानगरपालिकाया प्रमुख विद्यासुन्दर शाक्य, ३ वडाअध्यक्ष दीपक केसीं मंकाःकथं वडाया ज्येष्ठ नागरिकयात दोसल्ला न्ययेकाः रुद्राक्षया माला क्वखायेकाः सम्मान यानादीगु खः । लिसें वय्कःपिंसं ज्येष्ठ नागरिक च्वनाच्वंगु थासय् हे वनाः हे सिन्हः तिनाः सुवाः कयादीगु खः ।

ज्याझ्वलय् नवासें पुलांम्ह उपप्रधानमन्त्री पोखरेलं मोहनि नखतं दक्वं भाषाभाषी, जातजाति, धर्म, सम्प्रदाययात सामाजिक सद्भावया सुत्रय् चिनातःगु खँ न्ह्यथनादिसें थ्व नखः थवं थवय् सम्बन्ध स्थापना यायेगु ई नं जूगु धयादिल ।

येँ महानगर प्रमुख शाक्यं ज्येष्ठ नागरिकया सहज जीवन यापनया निंतिं येँ महानगरं विशेष ज्येष्ठ नागरिक भत्ताया व्यवस्था यानागु खँ कनादिसें हरेक वडाय् ज्येष्ठ नागरिकया निंतिं मनोरञ्जनया केन्द्र नं दयेकेत्यनागु जानकारी बियादिल ।
लिसें वय्कलं ज्येष्ठ नागरिकमैत्री पार्क निर्माण यासें इमिगु स्वास्थ्य उपचारय् सहज यायेगु ल्याखंया प्रणाली नं विकास यायेगु महानगर प्रमुख शाक्यं धयादिल ।

वडाअध्यक्ष केसीं मोहनि नखःया सिन्हः तीगु ज्याझ्वःयात समावेशी यायेत स्वयागु धासें वडा दुनेया न्ह्यागु हे जातियापिं ज्येष्ठ नागरिक जूसां इपिं सकसितं ज्याझ्वलय् ब्वनागु जानकारी बियादिल ।

उगु ज्याझ्वलय् वडाया ख्वीन्याम्ह ज्येष्ठ नागरिकयात सम्मान यासें खीर भोजनया नं व्यवस्था याःगु खः ।