चालक व सहचालक प्रहरी नियन्त्रणय्

येँ (नेपालभाषा टाइम्स) – ड्युटीइ खटे जुयाच्वंम्ह ट्राफिक प्रहरीयात आर्थिक प्रलोभनय् लाकेत स्वःम्ह चालक व सहचालकयात प्रहरीं ज्वंगु दु । मोहनि नखःया इलय् सवारी नियम हाचां गायाः सवारी साधन चले याःपिंत कारवाही यायेत स्वःगु व प्रहरीयात हे आर्थिक प्रलोभनय् लाकेत स्वःपिंत प्रहरीं कारवाही याःगु खः ।

ट्राफिक प्रहरी महाशाखाया कथं न्यासःनिसें स्वद्वः तका दां बियाः प्रहरीयात प्रभावित यायेत स्वःपिं च्याम्ह चालक व सहचालकयात प्रहरीं कारवाही याःगु खः । महाशाखां बिउगु जानकारीकथं रामप्रसाद चौधरी, दीपकबहादुर कुमाल, अभिनन्दन काफ्ले, प्रेमबहादुर तामाङ, अभिक आचार्य, अविन शाही व खड्गबहादुर सुनुवारयात कारवाही याःगु खः ।

उखे गुगुं कथंया नं प्रलोभनय् मलासे आर्थिक लाभ अस्वीकार यानाः प्रलोभनय् लाकेत स्वःपिंत अःखबतं कारवाहीया दायराय् हःगु धासें ७३ म्ह ट्राफिक प्रहरीयात पुरस्कृत नं यानागु महाशाखां न्ह्यथंगु दु ।