सवारीसाधन, भ्वँ तन धाःसा अनलाइनपाखें उजुरी
येँ (नेपालभाषा टाइम्स) – आवंलिं स्वनिगलय् थःगु सवारी साधन वा उकिया छुं भ्वँ तन धाःसा अनलाइन मार्फत हे ट्राफिकय् निवेदन बीफइगु जूगु दु। कोभिड १९ या जोखिम तच्वया वयेवं महानगरीय ट्राफिक प्रहरी महाशाखां अनलाइन सेवा सुरु याःगु खः ।
महाशाखां थ्व हे असोज महिना निसें सवारी साधन व भ्वँ तन धाःसा उकिया उजुरी अनलाइन पाखें बीफइ कथं सफ्टवेयर विकास याःगु खः । उजुरी बीगु निंतिं महाशाखाया वेबसाइट traffic.nepalpolice.gov.com य् वनाः निवेदन बीफइ । थ्व वेबसाइटय् वनेवं ‘लस्ट डकुमेन्ट एप्लिकेशन’ व ‘लस्ट भेइकल एप्लिकेशन’ यानाः निगू अप्सन खनेदइ । थःगु छु तंगु खः उकिया आधार थ्व निगू मध्ये छगू अप्सनय् क्लिक यानाः निवेदन बीफइ । अनलाइनय् निवेदन बीवं थुगु विवरण तप्यंक ट्राफिक प्रहरी नियन्त्रण कक्षय् थ्यनीसा थ्व हे आधारय् प्रहरीं दर्ता यानाः तुरुन्त मालेगु ज्या न्ह्याकीगु खँ धाःगु दु ।
LEAVE YOUR COMMENTS