बेइजिङ फोटो प्रदर्शनीइ नेपाः थीम

येँ (नेपालभाषा टाइम्स) – चीनया राजधानी बेइजिङय् वंगु मंगलवाःनिसें अन्तर्राष्ट्रिय फोटो प्रदर्शनी शुरु जूगु दु । झिन्हुतक न्ह्याइगु फोटो प्रदर्शनीइ विशेष अतिथि राष्ट्र ‘थीम कन्ट्री’या रुपय् नेपाःयात प्रस्तुत याःगु दु ।

चिनिया संस्कृति व पर्यटन मन्त्रालय व बेइजिङ महानगरपालिका जनसरकारया मंकाः ग्वसालय् उगु फोटो प्रदर्शनी जूगु खः । फोटो प्रदर्शनीइ नेपाःपाखें प्रतिनिधित्व यानाच्वंगु साइने नेपाल मिडिया सोसाइटीं विश्व सम्पदाया धलखय् दुथ्यानाच्वंगु नेपाःया सम्पदा क्षेत्रलिसें चितवन व सगरमाथा राष्ट्रिय निकुञ्जया ५० पाः स्वयां अप्वः फोटो दुथ्याकातःगु दु ।

प्रदर्शनीइ बीआरआई विश्व प्राकृतिक सम्पदात अन्तर्राष्ट्रिय फोटो प्रदर्शनीइ थीम कन्ट्रीया रुपय् छगू जक देय् नेपाःयात बिस्कं विशेष प्रदर्शनी कक्षया व्यवस्था यानातःगु दु । नेपाः सरकारयात छुंकथंया नं आर्थिक भार मलाइकथं थीम कन्ट्रीया रुपय् नेपाःयात प्रस्तुत यायेकथं निःशुल्क रुपं थाय्या व्यवस्था यानातःगु दु ।