लुँया भावय् कीर्तिमान ः तोलां ६४ द्वः

येँ – लुँया भाः थहां वनाः न्हूगु रेकर्ड कायम जूगु दु । म्हिगः प्रतितोला लुँ ६४ हजार तका थ्यंगु दु । थ्व नेपालय् न्हापांगु रेकर्ड जूगु खँ नेपाल सुनचाँदी व्यवसायी महासंघया पुलांम्ह अध्यक्ष तेजरत्न शाक्यं ‘नेपालभाषा टाइम्स’ यात कनादीगु दु । वय्कःया कथं अमेरिकां इरानया पर्सियन गल्फय् १ हजार सेना तैनाथ यायेगु निर्णय यायेवं लुँया भाः थहां वंगु खः ।

इरानं हाकनं युरेनियम प्रशोधन यायेगु शुरु यायेवं अमेरिकां इरानयात थप नाकाबन्दी तयेगु ज्या यायेगु लुँया भाः थहां वंगु खः । युरेनियम प्रशोधन मयायेत अमेरिकां इरानयात इनाप याःगु खःसा इरानं उकियात अस्वीकार याःगु खः । इरानया अस्वीकार लिपा अमेरिका सेना तैनाथ यायेवं न्युयोर्क बजारय् लुँया भाः थहां वंगु खँ नं वय्कलं कनादीगु दु ।

थ्व स्वयां बाछि न्ह्यवंनिसें लुँया भाः थहां वनीगु अनुमान जुयाच्वंगु खःसां नं रेकर्ड ब्रेक जुइ कथंया अनुमान धाःसा मजूगु खँ नं वय्कलं कनादिल । अमेरिका व चीन दथुइ भन्सार अप्वयेकेगु खँय् प्रतिस्पर्धा जुयाः लुँया भाः थहां वनेगु अनुमान जुयाच्वंगु खःसां नं गुकथं भाः थहां वनाः उकिया कारण धाःसा इरान हे जूगु दावी नं वय्कलं यानादिल ।

वय्कःया कथं लिपांगु चरणय् वयाः अमेरिकां भारतीय उत्पादनय् नं भन्सार दर अप्वयेकेगु तयारी याःगु खःसा भारतं नं अमेरिकायात लिसः बीकथं अमेरिकी कम्पनीं उत्पादन जुइगु सामानय् नं भन्सार अप्वयेकेगु तयारी यायेवं लुँया भाः न्हिथं थहां वनाच्वंगु खः । तर इरानया कारणं धाःसा रेकर्ड ब्रेक जूगु खः ।

थ्व स्वयां न्ह्यः २०७० साल भदौ १२ गते लुँया भाः दकलय् अप्वः ६३,३०० तका कायम जूगु खः । सरकारं बजेट भाषण याःगु इलय् तक लुँया भाः ५९,००० तका जुयाच्वंगु खःसा लुँया भन्सार थकायेवं ६०,००० तका थ्यंगु खः ।

म्हीग अन्तर्राष्ट्रिय बजारय् प्रतिऔश १३४४ डलर कायम जुयाच्वंगु खःसा म्हिगः छक्वलं ३६ डलर थहां वनाः १३८० डलर कायम जूगु खः । अन्तर्राष्ट्रिय बजारय् प्रतिऔंस १४०० डलर थ्यनीगु अनुमान यानातःगु दु ।

सम्बन्धित बुखँ

LEAVE YOUR COMMENTS