प्रधानमन्त्री ओलीयात बजेट न्ह्यः हे चीकेगु तयारी

येँ – मेपिनि पार्टी तछ्यायेत हःगु अध्यादेशं प्रधानमन्त्री केपी ओलीया पद हे वनीगु खनेदुगु दु । प्रधानमन्त्री ओलीयात वय्कःया हे पार्टीं प्रधानमन्त्री पदं चिइकेगु तयारी जूगु दु । आः जुयाच्वंगु तयारीया ल्याखं ओली थुगुसी बजेट तकं हये मखनीगु खनेदुगु दु ।

प्रधानमन्त्री ओलीयात चीकेत नेकपाया मेम्ह अध्यक्ष पुष्पकमल दाहाल लिसें पुलांपिं प्रधानमन्त्री माधव नेपाल, झलनाथ खनाल लिसें नेता बामदेव गौतम छथाय् च्वनेधुंकूगु दु । थुपिं नेतातय्सं ओलीयात बजेट न्ह्यव हे प्रधानमन्त्री पाखें चीकेगु रणनीति दयेकेधुंकूगु दु ।

कन्हय् मंगलवाः च्वनीगु धयातःगु नेकपाया सचिवालयया बैठकय् थुपिं नेतातय्सं प्रधानमन्त्री ओलीयात लँ चिइकाबीत इनाप याइगु खँ दु । थुपिं नेतात ओलीयात चीकेगु खँय् पूवंक सहमत जुइधुंकूगु दुसा कन्हय्या बैठक औपचारिकता बीत जक जुइत्यंगु खँ धाःगु दु । यदि ओली थः हे राजीनामा बीत माने मजुल धाःसा छु यायेगु धयागु बारे नं थुपिं नेतातय् दथुइ रणनीति तयार यानातयेधुंकूगु सीदुगु दु ।

विशेषत प्रधानमन्त्री ओलीयात चिइकेगु कथं घटना विकसित जुया वयेधुंकाः थौं प्रधानमन्त्रीं माधव नेपालयात याकःयाकः नापलाःगु खः । नेपाललिसे याकःयाकः नापलाये धुंकाः ओलीया पक्षया व नेपाल पक्षया नेतात च्वनाः नेपालया छेँ कोटेश्वरय् मेगु बैठक च्वनाः कन्हय् सचिवालय् बैठक सःतेगु क्वःछिउगु खः । सचिवालय बैठकय् ओली पद त्वःतेत माने मजुल धाःसा वय्कःयात चीकेगु निंतिं थप दबाब बिया यंकेगु तयारी जुयाच्वंगु दु ।

ओलीयात चिइके धुंकाः माधव नेपाल प्रधानमन्त्री जुइफुगु खँ धाःगु दु । प्रचण्डं नं नेपालयात प्रधानमन्त्री दयेकेत थः तयार दु धयागु संकेत बीधुंकूगु दु । अथे खःसां नेपाल हे जुइ वा झलनाथ खनाल जुइ धयागु धाःसा क्वःछिउगु मदुनि ।

सम्बन्धित बुखँ

LEAVE YOUR COMMENTS