नेपाः खनाः भारत तम्वःगु संकेत
बिमस्टेक सैन्य अभ्यासपाखें नेपाः लिचिल
येँ – भारतया पुनाय् म्हिगःनिसें सुरु जूगु बिमस्टेक देय्तय्गु मंकाः सैनिक अभ्यासय् ब्वति कायेगु मखु धकाः अन्तिम इलय् वयाः नेपालं याःगु निर्णयं भारत तम्वःगु संकेत वःगु दु । थ्व निर्णय लिपा खास यानाः नेपालय् च्वनाः नं भारतीय बिचाः पित बीपिं थीथी विज्ञतय्सं नेपाःया थ्व पलाखं यानाः कुटनीतिक ख्यलय् नेपाःया छबी बांमलाइगु बिचाः प्वंका हःगु दु ।
अज्याःगु सैनिक अभ्यासय् ब्वति काये मखु धकाः नेपालं न्हापा हे धाये माःगु खःसां प्यखेरं उकिया विरोध जुइवं अन्तिम इलय् वयाः ब्वति काये मखु धकाः निर्णय याःगुलिं थुकिं यानाः अन्तर्राष्ट्रिय ख्यलय् नेपाःया विश्वसनीयता गुमे जुइगु बिचाः नं विज्ञतय्सं प्वंका हःगु दु ।
उगु सैन्य अभ्यासय् ब्वति कायेगु लागिं नेपाली सेनाया न्याम्ह अधिकृत समेत ३० म्ह सैनिक जवान उखे वनेगु धकाः तयारी समेत जुइधुंकूगु खः ।
तर अन्तिम इलय् वयाः प्रधानमन्त्री केपी ओली थम्हं हे उगु सैन्य अभ्यासय् ब्वति काये मते धकाः निर्देशन बियादीगुलिं वनेत तयार हे जुयाच्वने धुंकूगु सैन्य पुचः रोके जूगु खः । आः उखे वनेधुंकूपिं स्वम्ह सैनिक अधिकारीतय्सं अन पर्यवेक्षक जक जुयाः अभ्यासय् ब्वति काइगु खँ धाःगु दु ।
नेपालं सैन्य अभ्यासय् ब्वति मकाइगु जुइवं थाइल्याण्डं नं सक्रिय रुपं ब्वति मकासे पर्यवेक्षक जक छ्वयेगु निर्णय याःगु दु । नेपालय् जूगु बिमस्टेक देय्–तय्गु सम्मेलनय् भारतीय प्रधानमन्त्री नरेन्द्र मोदीं थःगु देशय् यायेत्यंगु थ्व सैन्य अभ्यासय् ब्वति कायेगु लागिं सकल देतय्त ब्वनादीगु खः ।
नेपाःया परराष्ट्रमन्त्रीं पुनाय् सैन्य अभ्यास यायेगु बारे छुं निर्णय जूगु मदु धासें आः वयाः सैन्य अभ्यास धाःगुलिं उकी थःपिंसं ब्वति मकायेगु निर्णय यानागु खँ कनादीगु दु । थ्व सैन्य अभ्यासयात कयाः नेकपा दुने हे तीव्र रुपं विरोध जूगुलिं सरकार लिचिउगु खः ।
चीन सशंकित ?
भारतया पुनाय् जुइगु बिमस्टेक देय्तय्गु मंकाः सैन्य अभ्यासय् ब्वति काये मखु धकाः नेपालं आकाझाकां निर्णय याःगुया लिउने अन्तर्राष्ट्रिय कारण दये माःगु अनुमान कुटनीतिक ख्यलं याःगु दु । बंगालया खाडीइ थज्याःगु सैन्य अभ्यास जुल धाःसा उकी चीनयात सतर्क याना बीगु व पाकिस्तानयात आक्रोशित याइगु विश्लेषण याना हःगु खः ।
सूत्रया कथं उगु सैन्य अभ्यासयात कयाः नेपाःस्थित चिनियाँ कुटनीतिक नियोगं प्रत्यक्ष रुपं छुं न्वमवाःसां नेपाःया छुं उच्चस्तरीय नेतातय्त स्वापू तयाः न्यनेकने धाःसा याःगु खः । स्वयम् नेकपा दुनेया वरिष्ठ नेतातय्सं तकं थ्व सैन्य अभ्यासं चीनयात तम्वयेकीगु व उकिया लिच्वः नेपाःयात नं लायेफु धइगु बिचाः तयेगु याना हःगु खः ।
LEAVE YOUR COMMENTS