कोरोना महामारीया दथुइ साहित्य सम्मेलन : तःजिक बिराट सम्मेलन, भर्चुअल माध्यमं तःमुँज्या

तःजिक बिराट सम्मेलन

ख्वप (नेपालभाषा टाइम्स) – बिराट नेपालभाषा साहित्य सम्मेलन गुथिं थुगुसी कोरोना भाइरसया महामारीया दथुइ नं तलेजु बैंक्वेट राममन्दिरय् न्यय्गुक्वःगु बिराट नेपालभाषा साहित्य सम्मेलन तःजिक यात। बिराट गुथिया नायः महेन्द्रगोपाल कर्माचार्यया सभापतित्वय् उगु सम्मेलन जूगु खः । सम्मेलनय् स्वीन्याम्ह साहित्यकारतय्त प्रत्यक्ष सहभागी याःगु खः । उलि हे जक सिटया व्यवस्था यानाः सामाजिक दूरी कायम यानाः जूगु थ्व ज्याझ्वलय् थुगुसी नेपालभाषा विषय कयाः उत्कृष्ट ल्याः हयादीम्ह केन्द्रीय विभागया कविन श्रेष्ठ व एसईई परीक्षाय् नेपालभाषा विषय कयाः उत्कृष्ट जुयादीम्ह विद्यार्थी जगतसुन्दर ब्वनेकुथि चागः डल्लुया सुस्मिता राजभण्डारी मय्जुयात बिराट सुरत्न सिरपाः व विराट पदक लःल्हाःगु खः ।

गुथिया नायः महेन्द्रगोपाल कर्माचार्यं सम्मानित व्यक्तितय्त हना पौ नापं दां सिरपाः देछानादीगु खः । बिराट नेपालभाषा साहित्य सम्मेलन गुथिया पुलांम्ह नायः साहित्यकार प्रा. गोबिन्दमान श्रेष्ठं मूपाहांया थासं उगु सम्मेलनया उलेज्या यानादिल । ज्याझ्वलय् वय्कलं परम्परायात कायम यायेगु लागिं जक मखुसें सकल भाषाप्रेमि व साहित्यप्रेमितय् प्रेरणाया लागिं नं बिराटं याःगु थुगु ज्याझ्वःयात च्वछायेमाः धयादिल । ज्याझ्वलय् बिराटया पुलांम्ह नायः नापं साहित्यकार त्रिरत्न शाक्य, सौरभ शाक्य, तेजकृष्ण श्रेष्ठ, रेणु श्रेष्ठ, सुरेश प्रधान, न्हुछेभक्त कवां, कुमुल श्रेष्ठ, बाबुकाजी सुवाल, लगायत झिंन्हय्म्ह
साहित्यकारतय्सं थः थःगु च्वसु न्यंकादीगु खः । बिराटया दांभरि रामगोपाल चौगुठीं सुभाय् देछानादीगु उगु ज्याझ्वलय् सभापतिया थासं बिराट गुथिया नायः महेन्द्रगोपाल कर्माचार्यं विशेष परिस्थितिया कारणं म्हो सहभागीताय् यायेमाःगु खँ
कनादिल ।

न्यय्गुदँ न्ह्यःनिसें ख्वपय् मदिक्कं न्ह्यानाच्वंगु बिराटया थुगुसीया ज्याझ्वलय् चिनाखँ, चिबाखं, हाइकू साहित्य नापं थीथी साहित्य बाचन जूगु खः । सम्मेलनया ज्याझ्वः नविनप्रकाश श्रेष्ठं न्ह्याकादीगु खः ।

भर्चुअल माध्यमं तःमुँज्या

ख्वप (नेपालभाषा टाइम्स) -पीदँ न्ह्यःनिसें ख्वपया थीथी त्वालय् कौलाथ्व द्वादशि व त्रयोदशि निन्हुयंकं न्ह्याका वयाच्वंगु नेपालभाषा साहित्य तःमुँज्या थुगुसी कोभिड १९ या कारणं भर्चुअल माध्यमं जुल । नेपालभाषा साहित्य तःमुँज्याया पुलांम्ह नायः व नेपाल क्रान्तिकारी शिक्षक संघया अध्यक्ष शिक्षक ज्ञानसागर प्रजापतिया सभापतित्वय् थुगुसीया सम्मेलन जूगु खः । सम्मेलन मूपाहाँया थासं नेपाल मजदुर किसान पार्टीया अध्यक्ष नारायणमान बिजुक्छेँ रोहितं उलेज्या यानादिल । तःमुँज्यां थुगुसी इतिहासय् हे न्हापांखुसि भर्चुअल माध्यमं ज्याझ्वः याःगु खः । ज्याझ्वलय् सांसद प्रेम सुवाल, ख्वप नगरपालिकाया मेयर सुनिल प्रजापति, नेमकिपाया केन्द्रीय दुजःपिं नारायण महर्जन, कृष्णकुमार वैद्य, बागमती प्रदेश सांसदपिं सुरेन्द्रराज गोसाईं व सृजना सैंजु, पुलांम्ह सांसद अनुधारा थापामगरपिंसं थः थःगु धारणा तयादीगु खः ।

तःमुँज्याय् साहित्यकारपिं सुलोचना मानन्धर, हरिहर तिमिल्सिना, अभय श्रेष्ठ नापं सीमा अभियन्ता रतन भण्डारी, डा. सरोज धिताल, ज्योतिषशास्त्री वीरेन्द्र कायस्थ, स्त्रीरोग विशेषज्ञ डा. सानुमैंया श्रेष्ठ, डा. राजेन्द्र कोजू लगायतं रचना वाचन यानादीगु खः । प्राध्यापक समाजया उपाध्यक्ष प्रकाशकुमार श्रेष्ठ, इन्जिनियर सुजन श्रेष्ठपिसं नं न्ववानादीगु खः ।

ज्याझ्वःयात अनलाइन मजदुर, भादगाउँ टेलिभिजन  व भक्तपुर एफ.एम.पाखें प्रत्यक्ष प्रशारण याःगु खः । निन्हु कुन्हुया ज्याझ्वः नं उगु टेलिभिजनं प्रत्यक्ष प्रशारण जुइगु खँ धाःगु दु। तःमुँज्यां दँय्दसं याना वयाच्वंगु थीथी सांस्कृतिक ज्याझ्वः धाःसा थुगुसी कोरोना भाइरस कोभिड १९ या कारणं स्थगन याःगु दु। ज्याझ्वः जुम मार्फत् जूगु खः ।

सम्बन्धित बुखँ

LEAVE YOUR COMMENTS