गैरनेवाः मस्तय्सं नेवाः भासं चिनाखँ व च्वखँ च्वयाः न्यंकल
येँ (नेपालभाषा टाइम्स) – येँ महानगरपालिकाय् स्थानीय भासं अनिवार्य शिक्षा लागु यायेवं थुकिया बांलाःगु लिच्वः खनेदया वयाच्वंगु दु । महानगर दुनेया स्कुलय् येँया स्थानीय नेवाःभाय् ब्वंकेगु यायेवं छगू ला समावेशी शिक्षा चूलानाच्वंगु दुसा थुकिया लिसें मस्तय्सं स्वनिगःया संस्कृति सम्पदा बारे सयेके सिइके खनाच्वंगु दु । नेपालभाषा अनिवार्य रुपं लागु यायेधुंकाः स्थानीय भाय्या संरक्षणय् नं विशेष तिबः जूवनाच्वंगु दु ।
थुकिया लिच्वः येँ महानगरपालिका २३ वडाया ग्वसालय् जूगु येँ महानगरब्यापी अन्तर स्कुल चिनाखँ व च्वखँ धेंधेंबल्लाखय् बांलाक हे खने दत । बालसाहित्यकार शान्तदास मानन्धर या लुमन्तिइ येँ महानगरपालिका २३ वडाया ग्वसालय् स्वक्वःगु येँ महानगरब्यापी अन्तर स्कूल चिनाखँ व च्वखँ धेंधेंबल्लाः जुल । नेपालभाषा व नेपाली भाय् निगुलिसिनं जूगु थुगु धेंधेंबल्लाखय् येँया नीस्वंगू स्कुल ब्वति काःगु खः ।
थ्व धेंधेंबल्लाःया विशेष आकर्षण धयागु हे स्कुलय् नेपालभाषा ब्वनाच्वंपिं गैर नेवाः मस्तय्सं नं नेवाः भासं बांबांलाःगु च्वखँ व चिनाखँ च्वयाः न्यंकूगु जुल । धेंधेंबल्लाखय् तगिं खुगू व न्हय्गूयापिंत नेपालभाषां चिनाखँ व खस नेपाली भासं च्वखँ च्वके बिउगु खःसा च्यागू व गुंगू तगिंयापिंत नेपालभाषां च्वखँ व खस नेपाली भासं चिनाखँ च्वके बिउगु खः । थुगु धेंधेंबल्लाखय् नेपालभाषां च्वखँ व चिनाखँ च्वंपिं मध्ये यक्व हे गैर नेवाः विद्यार्थीत दुथ्याःगु खःसा सिरपाः त्याकूपिं नं अप्वः धयाथें गैर नेवाः मस्त हे खने दुगु खः ।
नेपालभाषा चिनाखँपाखे विश्वनिकेतन माविया आमूल अधिकारी न्हाप लाःगु खःसा कन्या मन्दिर माविया सोफिया डंगोल लिउ, महांकाल माविया आराधना खड्का लियांलिउ व शान्ति निकुञ्च माविया सुशीला जैसीयात हःपाः सिरपाः लाःगु खः । अथेहे नेपालभाषा च्वखँपाखें ज्ञानोदय माविया वर्षा श्रेष्ठ न्हाप, नेपाल आदर्श माविया प्रिति साह लिउ, जगतसुन्दर ब्वनेकुथिया याङ्गचेन लामा लियांलिउ व पद्मकन्या विद्याश्रम माविया अरुणा महतयात हःपाः सिरपाः लाःगु खः ।
खस नेपाली भाय्या च्वखँपाखे श्रीरत्नराज्य माविया मुकेश जोशी न्हाप, विजेश्वरी ज्ञानमन्दिर सैनिक महाविद्यालयया सुवास्ना खड्का केसी लिउ, श्रीरत्नराया हे सदीक्षा न्यौपाने लियांलिउ व विजेश्वरी ज्ञानमन्दिर सैनिक माविया प्रजिश कार्कीयात हःपाः सिरपाः लाःगु खः ।
अथेहे खस नेपाली भाय् चिनाखँय् न्यू जेनिथ इंग्लिस मोडल स्कुलया सन्देश गौतम न्हाप, जनकल्याण माविया स्मारिक बलायर लिउ, विश्व निकेतन माविया कृति गौतम लियांलिउ व नेपाल आदर्श माविया युवराज शाहयात हःपाः सिरपाः लाःगु खः । धेंधेंबल्लाखय् च्वखँपाखे न्हाप, लिउ, लियांलिउ व हःपाः लाःपिंत छसिकथं झिंन्याद्वः, झिद्वः, न्हय्न्यासः व न्याद्वः तका दां सिरपाः बिउगु खःसा चिनाखँपाखे झिद्वः, न्हय्न्यासः, न्याद्वः व नीन्यासः दां सिरपाः बिउगु खः । अथेहे प्यंगुलिं विधाय् निम्ह निम्हेसित यानाः च्याम्हेसित प्रोत्साहन कथं द्वःछि द्वःछि तकाया विशेष सिर पाः नं लःल्हाःगु खः ।
शुक्रवाः येँया छत्रपार्टी पार्टी प्यालेसय् जूगु सिरपाः लःल्हाये गु ज्याझ्वलय् न्हाप, लिउ व लियांलिउ लाःपिंसं चिनाखँ व च्वखँ ब्वनाः न्यंकूगु खः । वरिष्ठ बाल साहित्यकार शान्तदास मानन्धरया किपाय् स्वां देछासें न्ह्याःगु ज्याझ्वलय् येँ महानगर पालिका २३ वडाया अध्यक्ष मचाराजा महर्जनं त्याःपिंत नगद सिरपाः लःल्हानादीगु खः । अथेहे पाहां २३ वडाया पुलांम्ह अध्यक्ष लिसें नेवाः देय् दबूया संरक्षक पवित्र वज्राचार्यं दसिपौ लःल्हानादीगु खः । २३ वडाया सदस्य सुरेश मानन्धरया संयोजकत्वय् थुगु धेंधेंबल्लाः जूगु खः ।
धेंधेंबल्लाखय् दुहां वःगु चिनाखँ व च्वखँया क्ववालेज्या वरिष्ठ साहित्यकार रमेशकाजी स्थापित, नारद वज्राचार्य व पूर्णिमा शाक्य दुथ्याःगु निर्णायक मण्डलं याःगु खः ।
LEAVE YOUR COMMENTS