डब्लुएनओ अमेरिकन कचाया हलिं नेवाः मचा साहित्य व संगीत मुँज्या

येँ (नेपालभाषा टाइम्स) – वर्ल्ड नेवाः अर्गनाइजेसन (डब्लुएनओ) अमेरिकन कचाया ग्वसालय् न्हापांगु हलि नेवाः मचा साहित्य व संगीत मुँज्या जुल । नेपाल संवत् ११४१ न्हूदँया लसताय् १६ दँ क्वय्यापिं मस्तय् दथुइ जूम अनलाइनया माध्यमं वंगु शनिवाः उगु मुँज्या जूगु खः ।

डब्लुएनओ अमेरिकन कचा न्वकुलिसें साहित्यकार केशरमान तााम्राकारया संयोजनय् जूगु मुँज्याय् नेपाःलिसें अमेरिका, क्यानाडाया नीन्याम्ह मस्तय्सं ब्वति काःगु खः । ज्याझ्वलय् ब्वति काःपिं मस्तय्सं बाखं, प्याखं, चिनाखँ वाचन यानाः न्यंकादीगु खःसा अमेरिकाया मस्तय्सं म्येँ व नेवाः धुन न्ह्यब्वःगु खः ।

सांस्कृतिक राजदूत बासव राजोपाध्यायं प्रविधिया माध्यमं उलेज्या यानादीगु ज्याझ्वलय् डब्लुएनओ अमेरिकन कचा नायः प्रमेश श्रेष्ठं लसकुस यानादीगु खःसा ज्याझ्वः ताःलाकेत ग्वाहालि यानादीपिं लोचनतारा तुलाधर, रितादेवी प्रधान व सुनिता मानन्धरं नुगःखँ तयादीगु खः । मुँज्याया दकलय् लिपांगु ब्वय् अमेरिकन कचाया मूछ्यांजे बासव राजोपाध्यायं मुँज्या ताःलाकेत ग्वाहालि यानादीपिंत सुभाय् देछानादीगु खःसा ज्याझ्वः फेसबुकपाखें प्रत्यक्ष प्रशारण नं याःगु खः ।