रामशेखरया ख्यालः झिन्हुतक क्यनीगु

ख्वप (नेपालभाषा टाइम्स) – नेपालभाषाया नांजाःम्ह साहित्यकार, कलाकार, निर्देशक, च्वमि रामशेखर नकःमिं च्वयातःगु झिपु ख्यालः झिन्हु तक क्यनीगु जूगु दु । थ्वहे वइगु तछलाथ्व एकादशि (साउन ९ गते) शनिवाःनिसें दिल्लागा खस्थि (साउन १९ गते) मंगलवाः तक झिपु ख्यालः क्यनेत्यंगु खः ।

आस्था सांस्कृतिक समूहया थिएटर लिबालिबिइ न्हियान्हिथं सनिलया ५ ताः इलय् थुपिं ख्यालः क्यनेगु प्रवन्ध मिले याःगु खः । बहुआयामिक व्यक्तित्व नकमःमिया नेपालभाषाया लोकंह्वाःगु ख्यालः तन्त्र ट्याब्लेट छन्हु खस् नेपाली भाषां नापं यानाः झिंछन्हु तक उगु ख्यालः महोत्सव यायेत्यंगु खः ।

महोत्सवय् खेल खतम, छेरावति द्यः, १२ बजे, खुँयात ज्वँज्वँ, तन्त्र ट्याब्लेट (नेपाली), खुँ, तन्त्र ट्याब्लेट (नेपालभाषा), टुरिष्ट गाइड, अस्पतालया जा, रानी पुखू व सिमात फफस्वः छसिकथं साउन ९ गते निसें साउन १९ गतेतक न्हियान्हिथं क्यनेत्यंगु खः ।

समाजं निसः तका टिकटया मू तयाः रामशेखरया ख्यालः ब्वज्या यायेत्यंगु खः । उकी छसिकथं भक्तपुर साकोस, ख्वप कलेज, स्टार बाचनालय, लिबालिबि समूह, बाल बिकास ई. स्कुल, प्रभात मावि, भनपा १, शहीद निर्मल पुष्प स्मृति बाचनालय, जेलाँ सांस्कृतिक समाज व संगम साकोसपाखें थुपिं ख्यालः न्ह्यब्वइगु समूहं जानकारी बिउगु दु ।