ने. सं. ११४४ ञलाथ्व नवमी -

जासूस नापलाःगुलिं ओलीया आलोचना

राष्ट्रियताय् लिच्वः लाकूगुलिं नेकपा दुने हे विरोध

येँ (नेपालभाषा टाइम्स) – प्रधानमन्त्री केपी शर्मा ओली भारतीय जासुसी संस्था ‘रअ’ या प्रमुखयात नापलाःगु खँयात कयाः सत्तारुढ दल नेकपा दुने हे विवाद ब्वलंगु दु । वंगु बुधवाः बहनी ‘रअ’या प्रमुख सामन्तकुमार गोयलयात प्रम ओलीं गोप्य रुपं नापलायेवं उकियात कयाः थीथी ख्यलं विरोध यानाच्वंगु इलय् स्वय्म नेकपाया हे नेतातय्सं समेत आपत्ति प्वंकाहःगु खः ।

लिपांगु इलय् नेपाः-भारत दथुइ ब्वलंगु समस्या बारे सहलह यायेगु आपालं औपचारिक संयन्त्रत दुसां उकियात बेवास्ता यानाः जासुसी संस्थाया प्रमुखयात गोप्य रुपं नापलात धासें थुकिया विरोध जुयाच्वंगु खः । बुधवाः बहनी ‘रअ’ प्रमुखयात प्रधानमन्त्रीं नापलाःगु खँयात शुरुइ अस्वीकार यानाच्वंगु खःसां म्हिगः विहीवाः प्रमया प्रेस सल्लाहकार सूर्य थापां वक्तव्य हे पित बिसें नापलाःगु खँयात पुष्टि यानादीगु खः । प्रम ओलीं सामन्तकुमारयात बुधवाः बहनी ९ निसें ११ बजे तक नापलाःगु खःसा बिहीवाः सुथय् ९ बजे वय्कः लिहां नं झायेधुंकूगु दु । ‘रअ’ प्रमुख भारतीय सेनाया विशेष विमान चार्टर यानाः नेपाः झाःगु खः ।

प्रम ओलीं सामन्तकुमारयात नापलाःगु खँय् नेकपाया मेम्ह अध्यक्ष पुष्पकमल दाहालं असन्तुष्टि प्वंकादीगु खँ सीदुगु दु । वय्कलं पार्टी व सम्बन्धि मन्त्रालययात जानकारी तकं मबिसें विदेशी जासुसी संस्थाया प्रमुखयात प्रधानमन्त्रीं गोप्य रुपं नापलायेगु खँ सामान्य मखु धयादीगु दु। अथे हे वरिष्ठ नेताद्वय माधव नेपाल व झलनाथ खनालं नं प्रधानमन्त्रीया थ्व ज्या राष्ट्रया निंतिं घातक साबित जुइगु विश्लेषण यानादीगु दु। अथेहे पार्टीया प्रवक्ता लिसें पुलांम्ह परराष्ट्रमन्त्री नारायणकाजी श्रेष्ठं भारतीय जासुसी संस्थाया प्रमुखया नेपाः भ्रमण आपालं आशंका ब्वलंकूगु खँ धयादीगु दु ।

‘रअ’ प्रमुख थःगु पुचः ज्वनाः विमान हे चार्टर्ड यानाः थ्व इलय् नेपालय् छाय् वल धइगु खँ प्रष्ट मजूनि । थन वयेगु निंतिं औपचारिक ब्वनापौ बिउगु खःकि मखु धइगु खँ नं प्रष्ट जूगु मदुनि । अनौपचारिक खःसा छाय् वल ? थ्व विषयय् गम्भीर रुपं परामर्श यायेमाःगु दु’ श्रेष्ठं धयादीगु दु ।

कुटनीतिक ख्यलं धाःसा लिम्पियाधुरा विवादय् नेपाःया प्रधानमन्त्रीं गुलि कुतः यातं नं भारतीय प्रधानमन्त्रीं फोन तकं मल्ह्वंगु खँ न्ह्यथँसें आः गुप्तचर संस्थाया प्रमुखयात नेपाः छ्वया हयाः नेपाःया प्रधानमन्त्रीयात गुप्तचर प्रमुखया स्तरय् क्वकया बिउगु टिप्पणी यानाहःगु दु ।