दोल्खा भिंद्यःयात चःति वयेवं सीडीओ चिन्तित

येँ – देशय् कोरोना महामारी न्यनाः न्हिं न्यय्म्ह धइथें मनू सिनाच्वंगु दु । मेखे सरकारयात वयाच्वंगु संकटं यानाः देय् हानं मेगु राजनीतिक अस्तव्यस्तताय् वनीगु खः लाकि धइगु चिउताः ब्वलनाच्वंगु दु । थज्याःगु हे इलय् दोल्खा भिंद्यःयात चःति पिहां वःगु दु ।

दोल्खा भिंद्यःयात चःति पिहां वल कि देशय् अनिष्ट जुइ धइगु धार्मिक मनूतय् धापू दु । थज्याःगु अनिष्ट पनेगु लागिं थुगुसी अनया सीडीओ समेत सक्रिय जुयाः माःगु पुजाआजा शुरु याःगु दु । थ्व झ्वलय् चरिकोट दोल्खाया सीडीओ वासुदेव घिमिरें छगू प्रेस विज्ञप्ति हे जारी यासें दोल्खा भिंद्यःयात शनिवाः न्हिनय् १२.१५ बजेनिसें १.३० बजे तक तःक्वः तःक्वः मछि चःति पिहां वःगु जूगुलिं थः स्वयम् लगायत सुरक्षा निकायया प्रमुख समेत वनाः पुजा याकागु खँ धाःगु दु ।

उलि जक मखु, भिंद्यःयात चःति पिहां वल धाःसा अन तःधंगु पुजा यानाः उकिया महाप्रसाद राष्ट्रप्रमुखया हैसियतं राष्ट्रपतियात छ्वयेमाः धकाः आइतवाः तःधंगु पुजा यानागु खँ समेत न्ह्यथंगु दु । थ्व ज्याय् अनया सीडीओ थः हे सक्रिय जुसें राष्ट्रपतियात महाप्रसाद छ्वयेगु तयारी याःगु खः । थुकिया लागिं वय्कलं भीमेश्वर मन्दिर पूजा व्यवस्थापन समितिया बैठक तयेकाः थ्व ज्या न्ह्याकूगु खः ।

दोल्खा भिंद्यःयात चःचि पिहां वल धाःसा अनया पुजारी व गुथ्याःत जानाः पुजापाठ याइगु परम्परा दु । भिंद्यःयात चःति वःगुलिं तत्काल हे अज्याःगु पुजापाठ याकाः राष्ट्रपतियात महाप्रसाद छ्वयेत्यनागु खँ सीडीओं प्रेस विज्ञप्ति हे जारी यानाः सार्वजनिक याःगु खनाः धाःसा मेपिं मनूत अजूचायाच्वंगु दु ।

सम्बन्धित बुखँ

LEAVE YOUR COMMENTS