झिंछलाया दुने स्वनिगलय् ९६०० सवारी दुर्घटना

येँ (रासस)- चालु आर्थिक दँया जेठ मसान्त तकया दुने स्वनिगलय् जक ९ हजार ६८३ गू सवारी साधन दुर्घटना जूगु खँ धाःगु दु । थुपिं घटनाय् लानाः १७८ म्हेसिया ज्यान वंगु खँ काठमाडौं उपत्यका ट्राफिक प्रहरी कायांलयं धाःगु दु । अथेहे दुर्घटनाय् लानाः २४२ म्ह गम्भीर घाःपाः जूगु दुसा ७ हजार ३६३ म्ह सामान्य घाःपाः जूगु दु ।

दुर्घटनाय् लानाः सीपिं मध्ये अप्वः मोटरसाइकल चालक व स्कुटर चालक लाःगु दु । थ्व ईया दुने मोटरसाइकल व स्कुटर दुर्घटनाय् जक ९३ म्हेसिया ज्वन वंगु खः । अथेहे लँजुवाःत ५६ म्ह, साइकल गयावःपिं प्यम्ह, ट्रक, बस व कार दुर्घटनाय् स्वम्ह–स्वम्ह व माइक्रोबस व टिपर दुर्घटना निम्ह निम्ह व लोडर दुर्घटनाय् छम्हेसिया ज्यान वंगु खः ।

दुर्घटनाय् सीपिनि ल्याः मिस्त स्वयां मिजंत हे अप्वः दुगु खँ नं धाःगु दु । थ्व ईया दुने १३५ म्ह मिजंत दुर्घटनाय् लानाः सीगु खःसा ४३ म्ह जक मिस्त सीगु दु । सीपिं मध्ये बछिं मल्याक १७ निसें ३५ दँ उमेरयापिं दु । १७ निसें ३५ दँ उमेरयापिं जक ९२ म्ह, ३५ दँ स्वयां च्वय्यापिं ७५ म्ह व झिंखुदं क्वय्यापिं ११ म्हेसिया ज्यान वंगु खँ प्रहरीं धाःगु दु ।

थुपिं दुर्घटनाय् नं चालकया लापरवाहीया कारणं ६ हजार ७७५ गू दुर्घटनाया घटना जूगु खःसा ८३१ गू घटना तीव्र गतिया कारणं, मापसेया कारणं ५७५ म्ह, गाडी खराब जुयाः १४२ गू व गाडी ओभरटेक यायेत्यंगु इलय् २२७ गू, सतकया अवस्थाया कारणं २१ गू व मौसमया कारणं ३४ गू सडक दुर्घटना जूगु खः ।

स्वनिगलय् जक सवारी साधन व्यवस्थापनया निंतिं प्रहरी नायब महानिरीक्षण (डिआइजी)या नेतृत्वय् १ हजार ८ सय म्ह स्वयां अप्वः ट्राफिक प्रहरी परिचालित जुयाच्वंगु दु । थौंकन्हय् देय्न्यंकं यानाः ३० लाखं मल्याक मनूतय्सं सावरी साधन चले यानाच्वंगु खँ धाःगु दु । थ्व मध्ये स्वनिगलय् जक १२ निसें १५ लाख मनूतय्सं सवारी साधन चले जुयाच्वंगु खँ धाःगु दु ।