ओली व नेपालं षडयन्त्र यात- खनाल

येँ- नेकपा एमाले व माओवादी केन्द्र एकता जुयाः नेपाल कम्युनिस्ट पार्टी जूगु स्वन्हु हे मदुनिबलय् एकीकृत पार्टीइ कचवं पिहांवइगु संकेत खनेदुगु दु । थ्व कचवं पिकाइम्ह एमालेया हे वरिष्ठ नेता जुयाच्वंगु दु ।

पुलांम्ह प्रधानमन्त्री व एमालेया पुलांम्ह महासचिव झलनाथ खनालं आइतवाः छगू अनलाइन पत्रिकायात अन्तर्वार्ता बीगु झ्वलय् पार्टी एकता लिपा थःत बिउगु वरियता स्वीकार मदु धयादीगु दु । थ्व झ्वलय् वय्कलं थः देशं पिहां वनाच्वनागु इलय् आकाझाकां पार्टी एकता यानाः थःविरुद्ध षडयन्त्र याःगु द्वपं तकं बियादीगु दु ।

एकीकृत पार्टीइ खनालयात पुलांम्ह प्रधानमन्त्री माधव नेपाल धुंकाः जक प्यंगूगु वरियता बिउगु खः । न्हू पार्टीइ दकलय् न्ह्यःने एमाले अध्यक्ष व प्रधानमन्त्री केपी ओली दुसा व धुंकाः माओवादी अध्यक्ष पुष्पकमल दाहाल प्रचण्ड व स्वंगूगु थासय् पुलांम्ह प्रधानमन्त्री माधव नेपालयात वरियता बियातःगु खः । खनालयात नेपाल धुंकाः जक प्यंगूगु वरियताय् तयातःगु खः ।

पार्टी एकता जूगु इलय् खनाल थः काय्या कन्स्ट्रक्सन सम्बन्धी ज्याया निंतिं चीन वनाच्वंगु खः । खनालं पार्टी एकता जूगु ऐतिहासिक इलय् थः उपस्थित जुइमफुगु खँय् दुःख प्वंकुसें थःत बिउगु वरियता स्वीकार यायेफइमखु धयादीगु दु । खनाल पार्टी एकताया निंतिं दयेकातःगु कार्यदलया दुजः नं जुयाच्वनादीम्ह खः ।

वय्कलं तत्कालिन एमाले अध्यक्ष केपी ओली व माधव नेपालं मिलमतो यानाः थःविरुद्ध षडयन्त्र याःगु द्वपं बियादीगु दु । वय्कलं थः मदयेगु ई लाकाः हे हथासं तिथि क्वःछिउगु धासें धयादीगु दु, ‘छन्हु न्ह्यः जक ओली व जि छगू कार्यक्रमय् नापं दुगु खः, तर उबलय् तकं जितः एकताया बारे जानकारी बियामदी ।’ खनालं थःत जक मखु, तत्कालिन एमाले उपाध्यक्ष भीम रावल व महासचिव ईश्वर पोखरेलयात नं अन्याय याःगु खँ धयादीगु दु । अध्यक्ष ओली पोखरेलयात एकीकृत पार्टीइ महासचिवं चिइकाः विष्णु पौडेलयात महासचिव दयेकूगु खःसा भीम रावलयात न्हूगु दयेकूगु हाइकमाण्डय् तकं दुमथ्याकूगु खः ।

खनालं पोखरेलयात नं अन्याय जूगु धयाच्वंसां पोखरेल थम्हं हे धाःसा महासचिव मदयेकूगु खँय् छुं अफसोच मदु धयादीगु दु । वय्कलं अध्यक्ष ओलीं बिचाः यानाः हे पौडेलयात महासचिव दयेकूगु जुइ धासें थःत हाइकमाण्डय् दुथ्याकूगु खँय् हे सन्तुष्टि प्वंकादीगु दु । पोखरेल गुम्ह दुजः दुगु हाइकमाण्डय् न्हय्गूगु वरियताय् दु ।