छु खः ?

कमरेड प्रचण्डं मोहन वैद्य, नेत्रविक्रम चन्द, डा. बाबुराम भट्टराईपिंत नेकपाय् दुहां वयेत आह्वान याःगु दु। कुचा कुचा दःगु दक्व पूर्व माओवादी छथाय् च्वने । शतप्रतिशत बहुमत हयाः देशय् अभूतपूर्व शासन चले यायेगु कमरेड प्रचण्डया म्हगस थें च्वं ! यथार्थय् वय्कःया म्हगस पूवंकेत गुलि सम्भव ! उकिया गणित जरुर नं कमरेड प्रचण्डयाके दयेमाः । तर । साधारण जनता कमरेड प्रचण्डया थज्याःगु दिवास्वप्नयात छुं कारणं घ्वानाच्वंगु खः ! सीके फइगु स्थितिइ मदु ।

एमाले व माओवादी मिले जुयाः ला देशय् राजनीतिक हालत थुलि बेहाल । पिनें निगू दल मिले जुल । छगू हे जुल धाइ । संसदय् दुइतिहाई मतया हकदार धाइ । व्यवहारय् । दुने दुनें जनतायात छगू दल जूगु अनुभूति बी फुगु मदु। महत्वकांक्षी निम्ह अध्यक्ष । छगू दल । शक्तिया बाँडफाँडया खँय् न्ह्याबलें शंका, उपशंका । भागबण्डा विषयय् उतिकं होशियार ! गबलें गबलें खिचलो । थ्व एमालेया । थ्व माओवादीया । हरेक पदया आन्तरिक विभाजन। कित्ताकाट । निगू दल छगू जुइत कमसेकम आधारभूत खँय् सैद्धान्तिक सहमति दयेमाः । एकमत जुइमाः । साझा नां नेकपा, कम्युनिष्ट । तर सैद्धान्तिक आधारकथं निगुलिं दलयाके कम्युनिष्टया ‘क’ तक नं खनेमदु ।

राजनीतिक विश्लेषकतसें ला खुलेआम धाइ । नेकपा कम्युनिष्ट मखयेधुंकल । नेकपाया राजनीतिक आचरण खनाः पुलांपिं कम्युनिष्टपे्रमी नेतातय्सं थःपिंत कम्युनिष्ट धायेत लज्जाबोध याना हयेधुंकल । थःत कम्युनिष्ट मखु धायेत तकं लिफः मस्वयेधुंकल । नेकपा एकताय् प्रवेश यायेधुंकाः नं सैद्धान्तिककथं छगू हे धरातलय् दुने मफु धासेंलि कमरेड प्रचण्डं मोहन वैद्य, नेत्रविक्रम चन्द, बाबुरामपिंत छु आधारय् नेकपाय् दुहां वा धकाः आह्वान याःगु खः । थज्याःगु आह्वान दुने छुं सैद्धान्तिक तुक दु ला ? मखु, शायद प्रचण्डं नेकपाय् दुहां वयाः शक्तिया सवाः थूगुलिं मोहन वैद्य, नेत्रविक्रम चन्द, बाबुरामपिंत नं शक्तिया आकर्षण क्यंगु खः ला? शक्तिया भागबन्डाय् थ्याकेत्यंगु खः ला ? बाबुराम भट्टराई पुलांम्ह माओवादी खसां नं भट्टराईया राजनीतिक ख्यलय् तःधंगु मोड कायेधुंकल । अझ कमरेड प्रचण्डयात बाबुराम भट्टराई नं भ्रष्टाचारया द्वपं बियाः इलय् ब्यलय् ब्वः बियाच्वनी ।

पिने फ्वनाः नइपिं सहरय् मदयेवं हे देय् आर्थिक दृष्टिं विकासया चरमचुलीइ थ्यन धकाः गर्व यायेगु फजुल खः । फुस्लुगु धाक जक जुइ । लँय् लँय्फ्व नाः नइपिं मनूतय् आर्थिक अवस्था अथें हे बांलाइ, च्वन्ह्याइ । धाये फइमखु ।

अय्नं बाबुराम भट्टराईयात नं नेकपाय् दुहां वा धकाः भगवान बुद्धया चिन्तन क्यनाः कमरेड प्रचण्डं अनुनय विनय यानाच्वनी । थ्व दुनेया गुह्य राजनीतिक रहस्य छु खः? मसिउ! नेकपा छगू जूगु देशय् राजनीतिक स्थिरता हयेत प्रभावकारी जुइ । एकमना सरकारं विकासया गति काये फइ? सकसिनं आशा याःगु खः । तर दुर्भाग्य नेकपां आन्तरिक विभाजित मनस्थितिइ देय्यात निश्चित लँपुइ हाँके याये मफुत। थज्याःगु हे एकतां नेकपा न्ह्याः वनेगु खःसा नेकपा दुनेया आन्तरिक विभाजनं देय् ध्वस्त जुइ । अझ प्रचण्ड, वैद्य, चन्द, भट्टराईपिंत नं नेकपाय् वा धयाच्वंगु दु। इपिं नं नेकपाय् वल कि थ्वया सैद्धान्तिक स्वरुप गय् जुइगु खः? कमरेड प्रचण्डया गज्याःगु परिकल्पना खः ?

थौं कोरोनाया कारणं देय् विकराल स्थितिइ लानाच्वंगु दु। राजनीतिक कचवंलय् ततःक्यनाच्वनेगु ई मखु थौं । कोरोनाया संक्रमितत न्हियान्हिथं अप्वया वनाच्वंगु दु। थथे हे संक्रमिततय् ल्याः अप्वया वनाच्वन धाःसा देशय् वासः याकेगु व्यवस्था हे दइमखु। दुगु अस्पतालया सीमित संख्यां कोरोनाया ल्वगितय्त वासः याये फइगु स्थिति दइमखु। आइसीयु, भेन्टिलेटरया व्यवस्था तसकं हे नाजुक हँ ! ल्वगितय् ल्याः अप्वया च्वनीगु अले इमि वासः यायेत माःगु न्यूनतम उपाय नं मंत कि जनता अथें हे सी । अकालं । संक्रमणं हये फइगु सम्भावित खतरायात ध्यानय् तयाः सरकारं इलय् हे अस्पतालय् माःगु व्यवस्था यायेमाःगु खः । अस्पतालय् माःगु संख्यात तने माःगु खः । निजी अस्पतालय् नं उपचार जू जुइ । तर निजी अस्पतालं कोरोनाया विरामीतय्के उपचारया नामं ध्यबा लखौं कयाच्वंगु दु। सर्वसाधारण निजी अस्पतालय् वनाः वासः याकः वनेगु ध्यबाया दृष्टिं असम्भव । निजी अस्पतालं कोरोनाया उपचारय् निर्ममतापूर्वक ध्यबा कयाच्वंगु दु । सरकारं निजी अस्पतालया अमानवीय व्यवहारप्रति चिउताः तःगु मदु । देशय् पूँजीवाद, प्रोत्साहित जुयाच्वंगु दु ।

जनतायात देय्न्यंकं स्वास्थ्योपचारया अवसर दयेमाः । थ्व जनताया मौलिक अधिकार नं खः । अझ कम्युनिष्ट समाजवादी सरकारं आम जनताया स्वास्थ्य, शिक्षा, नयेत्वनेया व्यवस्था यायेगु सैद्धान्तिक दायित्व खः । भोट कायेबलय् गरिब, दीन दुःखी, उत्पीडित जनतायात अनेक म्हगस क्यनाः भोट काइ । शक्तिइ वइ । आम जनताया स्वार्थ दक्व चट् । धनीवर्ग, भ्रष्टाचारीतय् मतियार जुयाः पूँजीपतितय्त पोसे याइ । डा. गोविन्द के.सीं. देय्न्यंकं स्वास्थ्योपचारया सुविधा दयेमाः । समाजवादी माग याइ । तर । छम्ह नेकपाया मन्त्रीं डा. के.सीयात अःखबतं पाखण्डी धकाः ब्वः बी । स्वयं नेकपाया नेतातय्सं पार्टी दुने भ्रष्टाचार ब्वलना वयाच्वंगु खँ हइ ।

देश विकास यायेत देय्या थां जुयाच्वंगु मूल मूल संस्थातय्त स्वायत्त रुपय् विकास यायेमाः । तर थौं । देय्या दक्व संवैधानिक संस्था, अ·त धलमल । राजनीतिक रङं कुरुप । थौंकन्हय् प्रमज्यूया जोक्सत उलि न्यने मदु। शादय देय्या अवस्थाबारे वय्कः नं गम्भिर जूगु खः ला ? छु खः?