लुमनी । कांगेस पार्टीया प्रधानमन्त्री स्व. कृष्णप्रसाद भट्टराईया प्रधानमन्त्रीत्वकालया छगू घटना । धाये कथित छगू उपलब्धि । कृष्णप्रसादजुया प्रधानमन्त्रीत्वकालय् ‘शनिवार व आदित्यवार’ निन्हुयंकं अफिसय् विदा बीगु याइ । शनिवाः साविकया सरकारी विदाया न्हिं । परम्परा । आदित्यवार नं तनी । सरकारी विदा निन्हु जुइ ।

थथे निन्हु विदा बीगु विदेशया चलन । नेपालय् नं वइ । हइ । थ्व विदेशी नक्कल खः ला ? वा थ्वया व्यावहारिकता नेपालय् नं औचित्यता दया बिउगु खः ? तर अबलय् सरकारं छवाःया निन्हु विदा बीगु पक्षय् अनेक तर्कत बी । थुकिया फाइदाया बारे अनेक प्रचार याइ । छवाःया निन्हु विदा । नेपाःमितय् निंतिं न्हूगु प्रयोग ! न्हूगु चलन । निन्हु प्यन्हु न्ह्यइपुसे च्वनी । अबलय् ।

प्रधानमन्त्री भट्टराईया सरकारया ज्याया अद्यावधिक मूल्यांकन जुइ । छु छु उपलब्धि जुल ? छु छु महत्वपूर्ण कार्यत जुल । धलः पिहां वइ । धलखय् सरकारया छगू तःधंगु उपलब्धिकथं ‘निन्हु विदा’ बीगु ज्यायात कयाः नं न्ह्यथनातइ । च्वछाइ । थ्व खँ लुमनी । आतक नं न्हिले मास्ति वइ ।

‘शनिवार–आदित्यवार’ निन्हु विदा बिउगु ज्यायात छुं नं छुं महान राष्ट्रिय उपलब्धिकथं अबलय्या सरकारं प्रचार याइ । जनतायात गर्व बोध याकेत स्वइ । तर । धाधां हे व विदा बीगु चलन हाकनं फासांफुसुं जुइ । हाकनं विदा शनिवारय् कुहां वइ । सरकारया महान् उपलब्धिकथं दावा याःगु ‘शनिवार–आदित्यवार’या विदाया ज्याखँ ध्वंप्वालय् लाइ । तनी ।

फासांफुसुं जुइ । खत्तम ।थथे हे देशय् अनेक प्रधानमन्त्रीत वइ । सरकार चले याइ । प्रत्येक प्रधानमन्त्रीतसें थःथःगु कार्यकालय् देय्यात बियागु उपलब्धि, योगदानया बारे बखान याइ । आसेपासेतय्सं समर्थन याइ । हाँलय् हाँ मिले याइ । तर देय्या थौंया दुःखद् स्थितिं क्यनी । देय्यात विगतया सरकारतय् उपलब्धिं गन थ्यंकल । गन थ्यंका थकल ।

सरकारया देशय् निगूकथंया ज्या दइ । नियमित व विशेष । मनुखं न्हिंन्हिं जा, केँ नइ । थःगु दैनिक कार्यत याइ । वयात तःधंगु उपलब्धिकथं गर्व याये आवश्यक जुइमखु । व साविक कर्तव्यया लँय् लाइ । मनूया नियमित ज्याखँया लागि प्रशंसा, बधाइ बियाच्वनी मखु । तर नियमित स्वयां नं पाःगु सुनानं विशेष छुं ज्या क्यन कि वयात मनूतय्सं च्वछाइ ।

जनमतं वइगु सरकारं देय्, जनतायात विकासया लँय् न्ह्याकेगु योजना, कार्यक्रम, दर्शन ज्वना वइ । देय्यात विशेष उपलब्धि बीगु ज्याया प्रतिवद्धता जुइ । जुइमाः । चानचुन, पलखं फासांफुसुं जुइगु ज्या क्यनाः मनूतय्त झंगः लायेगु ज्याय् इमान्दार सरकार तक्यनीमखु ।

वया गुणगान याइ । ठीक । अथे हे सरकारया नं नियमित ज्यात दइ । शान्ति सुरक्षा, जनताया मौलिक अधिकारया रक्षा, जनतायात लः त्वंकेगु, ट्राफिक नियन्त्रण यायेगु, विपद् व्यवस्थापन थ्व फुक्क सरकारं निर्वाह यायेमाःगु नियमित कर्तव्य खः । थुकिया लागि चुस्त प्रशासन दयेमाः । देय्या प्रशासनयात स्थायी सरकार धाइ ।

प्रशासन स्थायी संस्था खः । देय्या जनताया नियमित जीवनयात सकुशल न्ह्याकेगु थ्वया जिम्मा जुइ । जनमतं वइगु सरकारं देय्, जनतायात विकासया लँय् न्ह्याकेगु योजना, कार्यक्रम, दर्शन ज्वना वइ । देय्यात विशेष उपलब्धि बीगु ज्याया प्रतिवद्धता जुइ । जुइमाः । चानचुन, पलखं फासांफुसुं जुइगु ज्या क्यनाः मनूतय्त झंगः लायेगु ज्याय् इमान्दार सरकार तक्यनीमखु ।

देशय् सामान्य ट्राफिक नियम पालना याकेत, लँय् लँय् च्वंगु गाः, सा–द्वंया समस्याया समाधान यायेत, प्रधानमन्त्रीया ध्यानाकर्षण यायेमाः । थ्व विडम्बना मखुला ? प्रधानमन्त्रीं देशय् चुस्त प्रशासनया प्रत्याभूति बीमाः । बी फयेकेमाः । जनताया दैनिक समस्यायात स्वतः समाधान याइगु प्रभावकारी संयन्त्रया निर्माण यायेमाः । दुर्भाग्य !

थौं देशय् प्रशासनया अवस्था झन्झन् अव्यवस्थित, अराजक जुजुं वनाच्वंगु दु । देशय् प्रशासन, पुलिस, अदालत थज्याःगु तःधंगु जिम्मेवारी दुगु संस्थात थौं भताभुंग जुयाः पेच फुस्के जूगु मेशिन थें लथालिंग जुया बिउगु दु । जनताया आम सुरक्षा, अधिकारया निंतिं सुरक्षाया थां जुइमाःगु संस्थात हे थथे छताछुल्ल जुइ । थौं जनतां सन्तोषया सासः ल्हाये फइगु स्थिति गन दइ । दइमखु ।

हालय् प्रधानमन्त्री ओलीजुया सरकारं थप विदाया व्यवस्था याःगु दु । जननजातितय् पर्व विदातय्त सरकारं चिइका बिउगु खः । प्रधानमन्त्रीजु छगू निगू जनजातितय् पर्वय् मूपाहां जुयाः वनी । वय्कःया नुगः नाइ । हाकनं विदा बीगु निर्णय याइ । हाल सरकारया थ्व तःधंगु उपलब्धि खः । प्यखेरं प्रशंसा वइ ।

तर देशय् जनमतं वःगु आधिकारिक सरकारं जनजाति, देय्या अन्य, सीमान्कृत वर्गप्रति गज्याःगु नीति कायेगु खः । स्पष्ट जुइमाः । जनतायात थुइकेमाः । अनुग्रहया रुपय् विदा बीगु । हाकनं मेगु खेमां दबाव वलकि विदा चिइकेगु । क्यातुम्ह जनताया सरकारं थज्याःगु मचा म्हितेगु ज्या याइमखु । हचुवाय् तक्यनी मखु ।

वर्तमान सरकारं जनजाति, सीमान्तकृत वर्गप्रति थःगु नीति छु खः प्रष्ट यायेमाः । इमिगु भाषा, धर्म, संस्कृति, पहिचानप्रतिया धारणा छु खः क्यनेमाः । मौसमी नीति काये मजिल । पृथ्वीनारायणया एकतायात डण्डाकथं छ्यलाः देशवासीतय्त लाठि चार्ज याये मजिल । याके बी मजिल । देय् सकसियां साझा खः ।

सम्बन्धित बुखँ

LEAVE YOUR COMMENTS