
नेपाल कम्युनिष्ट पार्टी (नेकपा)या वर्तमान सरकार इतिहासय् शक्तिशाली रुपय् नालाकयातःगु दुसां नं लिपांगु इलय् कोरोना महामारी पनेगु सवालय् धाःसा असफल जूगु संकेत खने दयावःगु दु। केपी शर्मा ओलीया नेतृत्वया वर्तमान सरकारं कोरोनाया सवालय् बुलुहुं बुलुहुं ल्हाः लिकाःगु अवस्था दु अले थःगु जिम्मेवारी त्वःता वनाच्वंगु अवस्था दु। ओली सरकारं कोरोनाया सवालय् सर्वसाधारण जनता थःम्हं हे वासः यायेमाःगु अले अस्पतालय् सीम्ह बाहेक छेँय् आइसलोसनय् सीम्ह जुल धाःसा सीम्हेसिया शव तकं छेँजःपिंसं हे व्यवस्थापन यायेमाःगु गुगु कथं खँ पित हल थ्व बास्तवय् स्वयेबलय् सामान्य थेंच्वंसां नं तसकं गम्भीर खँ खः । सरकारया थुगु निर्णयपाखें मुलुकय् कोरोनाया धात्थेंयागु महामारी सुरु जुइगु संकेत ब्वलना वःगु दु। ताःई न्ह्यः वनेमखु, छन्हु निन्हुया दथुइ वयाच्वंगु कोरोना महामारी सम्वन्धि समाचारयात जक स्वल धाःसां स्पष्ट जुइ । सरकार गुलि तक गैरजिम्मेवार जुयाच्वंगु दु धयागु खँय् ।
सोमवाः सुथय् समाचार वल- ‘विराटनगरय् कोरोना संक्रमणपाखें अस्पताल संचालक नापं थप प्यम्ह मनूतय्गु ज्यान वन। आइतवाः ११ बजे निसें २४ घण्टाया दुने प्यम्हेसिया ज्यान वंगु खः । नोबेल मेडिकल कलेजय् निम्ह, कोशी अस्पताल कोभिड-१९ उपचार केन्द्र बिराटनगर व न्यूरो अस्पतालया कोभिड-१९ अस्पतालय् छम्ह छम्हेसिया ज्यान वंगु खः । मदुपिं मध्ये छम्ह अस्पताल संचालक खः ।’
वंगु आइतवाः न्हिछिया दुने स्वनिगलय् १ हजार ६ सय ९८ म्हेसित कोरोना भाइरस संक्रमित पुष्टि जूगु दु। संक्रमित मध्ये येँय् जक हे १ हजार ४ सय ६९ म्ह, यल जिल्ला दुने १ सय ३० म्ह व ख्वप जिल्ला दुने ९९ म्ह दुसा २४ घण्टाया दुने देय्न्यंकं याना २ हजार ९ सय ४२ म्हेसित कोरोना पुष्टि जूगु दुसासक्रिय संक्रमित ३९ हजार ३ सय ४१ म्ह थ्यंगु दु । आः तकया दुने संस्थागत आइसोलेशनय् १२ हजार ९ सय ३३ म्ह अले होम आइसोलेशन अर्थात थःगु हे छेँय् २६ हजार ४ सय ८ म्ह दु। कोरोना संक्रमित जुयाः थप १२ म्ह मन्त। आः कोरोनापाखें मदुपिं मुक्कं यानाः ७ सय ३९ म्ह थ्यन धकाः स्वास्थ्य मन्त्रालयपाखें आइतवाः सनिलया ४ बजे बिउगु विवरण खः ।
सरकारं औपचारिक रुपं घोषणा मयाःसां नं कोरोना संक्रमितया सवालय् अभिभावक जुया सर्वसाधारण जनतायात बिइमाःगु सेवा सुविधापाखें बिस्युं वनेगु अले जनताया न्ह्याथे जूसां छु मतलब धायेगु धकाः यायेत्यंगु खनेदु ।
अथे हे मेगु समाचार खः कोरोना संक्रमितपाखें सीपिनिगु सीम्ह अर्थात शव व्यवस्थापनाया जिम्मेवारी कयाच्वंगु नेपाली सेनां आः तकया दुने ८ सय ८९ म्हेसिया सीम्ह व्यवस्थापन याये धुंकूगु सैनिक जनसम्पर्क निर्देशनालयपाखें जानकारी बिल धकाः आइतवाःया समाचार खः । थुगु कथंया समाचारयात बांलाक्क स्वल धाःसा स्पष्ट जुइ कि कोरोनापाखें सीपिनिगु ल्याः गुगु कथं सरकारं सार्वजनिक यानाच्वन व उलि पत्याः याये बहः जूगु मदु। सरकारं ७ सय ३९ म्ह सित धकाः धयाच्वंगु दुसा नेपाली सेनां कोरोनापाखें सीपिं ८ सय ८९ म्हेसिया सीम्ह ब्यवस्थापन याये धुन धकाः धाःगु दु। थुगु ल्याखं स्वल धाःसा सच्छि व न्यय्म्ह धइथें फरक जुयाच्वंगु दु। आः नेपाली सेनाया व्यवस्थापन व सरकारया विवरणयात छु आधारय् गुगु कथं विश्वास यायेगु धकाः न्ह्यसः ब्वलंगु दु ।
न्हिया न्हिथं कोरोना संक्रमितत अप्वया वयाच्वंगु अले उकि मध्ये बच्छिसिबें अप्वः स्वनिगलय् संक्रमितत खने दयाच्वंगु दुसा उच्च जोखिमय् येँ जिल्ला लानाच्वंगु खनेदु। येँय् संक्रमितत अप्वया वःगु खनाः थःपिंथाय् नं उगु हे कथं संक्रमितत अप्वया वइ धकाः तायेकाः यल व ख्वप जिल्लाया जिल्ला प्रशासनपाखें अत्यावश्यक सेवा बाहेक मेगु फुक्कं बन्द यायेगु ज्या आइतवाःनिसें याये धुंकूगु जूसां नं सोमवाः तक नं येँया जिल्ला प्रशासनपाखें छुं हे सुचं वःगु मदु। थुगु खँयात ध्यानय् तल धाःसा स्वनिगःया स्वंगू जिल्ला प्रशासन कार्यालय तकं छगू हे थासय् मदु धकाः स्पष्ट जू । आःया अवस्थाय् थुगु कथं वयाच्वंगु समाचारयात ध्यानय् तल धाःसा येँ जिल्लाया सवालय् धाःसा केन्द्रपाखें हे तप्यंक हस्तक्षेप यानाच्वंगु जकं मखुला धकाः न्ह्यसः ब्वलनीगु स्वभाविक हे खः । कोरोना महामारीया अवस्थायात स्वल धाःसा असोज महिनांनिसें कोरोनाया महामारी नेपालय् धात्थें थ्यंगु खःला धकाः महसूस यानाच्वंगु अवस्थाय् हे वया नेपाल सरकारं धाःसा उगु महामारीयात पनेगु मयासे थप मलजल याइगु कथंया निर्णय गुगु बुलुहुँ बुलुहुँ यानाहल थुकिं याना तसकं ग्यानापुगु अवस्था वइगु संकेत क्यंगु दु ।
न्हिया न्हिथं कोरोना संक्रमितत अप्वया वयाच्वंगु जक मखु सीपिनिगु ल्याः नं अप्वया वयाच्वंगु अवस्था खःसा अस्पतालय् कोरोना संक्रमित तयेगु थाय् मदया सर्वसाधारणयात तसकं थाकुयाच्वंगु अवस्था खः । सर्वसाधारण जनतां कोरोना संक्रमित विरामीयात अस्पतालय् भर्ना हे यायेगु खःसा नेतातय्गु पहुँच मन्त धाःसा संभावना हे मदुगुलिं अप्वः यानाः मनूत थःथःगु छेँय् हे आइसोलेसनय् च्वनाच्वंगु अवस्था यथार्थ खः । आः ओली सरकारं कोरोना संक्रमिततय्गु सवालय् गम्भीर लिच्वः लाइगु कथंया निगू निर्णय यात व धइगु जनता व देशया नितिं तसकं ग्यानापुगु खँ खः ।
न्हापांगु निर्णय : कोरोना परीक्षण व उपचारय् थःम्हं हे खर्च यायेगु। आवंलि आर्थिक कथं विपन्न, अशक्त, जेष्ठ नागरिक व फ्रन्टलाइनय् खटेजुइपिं स्वास्थ्यकर्मी, सफाइकर्मी, सुरक्षाकर्मीइ लक्षण खनेदत धाःसा जक सरकारं निःशुल्क परीक्षण व उपचार याइ । तर व ध्यबा नं इमिगु कोरोना विमाय् क्वपालेगु कथं जुइ । मेपिनिगु हकय् परीक्षण व उपचार थःम्हं हे यायेमाः । थुगु कथंया निर्णय कार्तिक २ गते आइतवाःनिसें लागू जुइ धाःगु दु। सरकारी तथ्यांक कथं हे धायेगु खःसा पीसीआर टेष्ट मध्ये थ्यंमथ्यं ६० प्रतिशत सरकारी प्रयोगशालाय् जुयाच्वंगु दु। व अप्वः धइथें निःशुल्क हे जुयाच्वंगु खनेदु। आः पीसीआर परिक्षणया नितिं निद्धः तका पुले मालीगु अवस्था वल । भ्वछिं परिक्षण यायेमाल धाःसा म्होतिं नं झिद्धः तका मालीगु जुल । अले ज्या याना नये मखनाच्वंगु अवस्थाय् झिद्वः तका पुलेमालीगु इलय् त्याये कया यायेमालीगु जुइ । त्याये कायेगु थ्व इलय् गुलि तक संभव जुइ अःपुक हे अनुमान यायेफइगु अवस्था दु ।
थुगु कथंया सरकारया निर्णय वयेवं आः सर्वसाधारण जनतां कोरोनाया लक्षण खने दुसां नं परीक्षण मयाइगु अवस्था वइ, थ्व सरुवा ल्वय् जूगुलिं थुकिं याना समाजय् कोरोना संक्रमित झन झन अप्वया वनीगु अवस्था जुइ ।
निगूगु निर्णय : कोरोना संक्रमित होम आइसोलेसनय् मंत धाःसा थः लाःपिंसं हे सीम्ह ब्यवस्थापन यायेमाः । आः तक अस्पतालय् बाय् छेँय् न्ह्याथाय् हे सीपिं जूसां नं नेपाली सेनां व्यवस्थापन याना वयाच्वंगु खःसा आः छेँय् मंत धाःसा थःपिंसं हे ब्यवस्थापन यायेमालीगु अवस्था वल । थ्व धइगु तप्यंक हे कोरोना संक्रमित जुया सीपिं जूसां नं छेँय् सित धाःसा इपिं कोरोना संक्रमित जुयाः मखु धकाः धाइगु अले इमित समुदाय वना व्यवस्थापन याइगु अवस्थाय् समुदाय हे संक्रमित जुइगु अवस्था ब्वलनी । थुगु कथं स्वल धाःसा सरकारं औपचारिक रुपं घोषणा मयाःसां नं कोरोना संक्रमितया सवालय् अभिभावक जुया सर्वसाधारण जनतायात बिइमाःगु सेवा सुविधापाखें बिस्युं वनेगु अले जनताया न्ह्याथे जूसां छु मतलब धायेगु धकाः यायेत्यंगु खनेदु। उकिं आःया अवस्थाय् कोरोनाया सवालय् ओली सरकार असफल जुजुं वनाच्वंगु हे खः धकाः धायेगु सवालय् सुयां नं निगू मत दइमखु ।
LEAVE YOUR COMMENTS