शक्तिपीठ : गनं बन्द, गनं चाः

येँ (नेपालभाषा टाइम्स) ( मोहनि नखःया लिसें म्हिगःनिसें नवरात्र नं सुरु जूगु दु। मोहनीया थ्व नवरात्रया इलय् थीथी शक्तिपीठय् वनाः द्यः दर्शन याःवनेगु परम्परा जुया वयाच्वंगु दु। तर थुगुसी मोहनीबलय् वनेमाःगु मूमू शक्तिपीठय् धाःसा द्यः दर्शन यायेमखनीगु जूगु दु ।

कोरोना महामारीया कारणं थुगुसी फुक्क धयाथें आजु अजिमा द्यःयाथाय् दर्शन बन्द जुइगु जूगु दु। मोहनीया चालं कुन्हु वनीगु गुह्येश्वरी नं बन्द जुइगु खँ पशुपति विकास कोषं धाःगु दु। अथेहे पशुपति क्षेत्र दुने लाःगु जयबागेश्वरी द्यःयाथाय् नं बन्द जुइगु जूगु दु। कोरोनाया संक्रमण तच्वया वयाच्वंगु अवस्थाय् द्यःया दर्शन याःवनेबलय् जुइफुगु भीडया कारणं संक्रमण झन तच्वयेफु धकाः गृह मन्त्रालयं ७७ गुलिं जिल्लाय् शक्तिपीठत मचायेकेत निर्देशन बियातःगु दु ।

थ्व हे झ्वलय् येँया मू मू शक्तिपीठत मैतीदेवी, नक्सा भगवती, शोभा भगवती, दक्षिणकाली आदि शक्तिपीठत मचायेकेगु खँ धाःगु दु। मोहनीया न्हापांगु न्हि नलास्वां पीकुन्हु म्हिगः भद्रकालीइ धाःसा भक्तजनतय् हूलमूल खनेदत। थन लाइन तयाः सकसितं द्यः पुज्याके बिउगु दु। मेखे मैतीदेवी, शोभाभगवती धाःसा मचाल ।

वंगु चैतय् नेपालय् कोरोना संक्रमित खनेदयेवं याःगु लकडाउन सुरु जूसां निसें देय्न्यंकं द्यः, देगलय् नित्य पुजा बाहेक दर्शन फुक्क बन्द यानातःगु खः । आः मोहनीबलय् नं नित्य पुजा बाहेक द्यःयाथाय् पुज्या वनेगु बन्द जुइगु जूगु खः । थीथी शक्तिपीठत बन्द जूसां येँया छुं छुं द्यःयाथाय् धाःसा पुजाआजा न्ह्याना वयाच्वंगु दु। येँया पचली आजुया मू जात्रा मोहनी सुरु जूगु न्यान्हुया न्हिकुन्हु पचिमह्रः कुन्हु जुइ । थुगुसी पचलीया जात्रा चिधंक जूसां यायेगु खँ पचलि जात्रा व्यवस्थापन समितिं धायेधुंकूगु दु ।

थ्वहे दथुइ विश्व हिन्दू महासंघं मोहनीया इलय् शक्तिपीठत चायेकेत माग याःगु दु। भौतिक दूरी कायम यानाः स्वास्थ्य सुरक्षाया विधि नालाः देय्न्यंकंया शक्तिपीठ चायेकेमाःगु माग महासंघं यानाःगु दु । थ्वहे दथुइ थुगुसी चालं कुन्हु राष्ट्रपति, प्रधानमन्त्रीं न्हापा थें सर्वसाधारणयात सिन्हः मतीकीगु जूगु दु। अथेहे पुलांम्ह जुजु ज्ञानेन्द्रं नं सिन्हः मतिकेगु खँ धाःगु दु ।

सम्बन्धित बुखँ

LEAVE YOUR COMMENTS