ने. सं. ११४६ बछलागा तृतीया -

क्याम्पसय् नेपालभाषा ब्वनीपिं विद्यार्थी अप्वयेकेत इनाप पौ लःल्हात

येँ- नेवाः विद्यार्थी युनियनं स्वनिगःया क्याम्पस क्याम्पसय् नेपालभाषा विषय कयाः ब्वनीपिं विद्यार्थीत अप्वयेकेत इनाप यासें हलिं नेवाः गुथियात छपु इनाप पौ लःल्हाःगु दु । युनियनया नायः रिदेन महर्जनं गुथिया भाषा, लिपि कवःया कजि मय्जु सुष्मा श्रेष्ठयात उगु इनाप पौ लःल्हानादीगु खः ।
युनियनं थनया भृकुटीमण्डपय् च्वंगु रत्नराज्य क्याम्पस व बागबजारय् च्वंगु पद्मकन्या क्याम्पसय् नेपालभाषा विषयया कक्षा संचालन जुइगुलिं उगु विषय कयाः अध्ययन याइपिं विद्यार्थीत छ्वया ग्वाहालि यायेत इनाप यानातःगु दु ।

म्होतिं नं झिम्ह झिम्ह विद्यार्थी दत धाःसा जक निगुलिं क्याम्पसय् नेपालभाषा विषयया कक्षा संचालन जुइगुलिं थ्व हे महिनाया दुने विद्यार्थी छ्वयाः ग्वाहालि यायेत इनाप यासें युनियनं गुथियात उकथं इनाप पौ लःल्हाःगु खः ।
नेवाः विद्यार्थी युनियन क्याम्पसय् नेपालभाषा विषय कयाः अध्ययन यानाच्वंपिं विद्यार्थीतय् संगठन खः ।