मेयर फोरमपाखें प्रदेश स्वास्थ्यमन्त्री श्रेष्ठयात भिंतुना देछा
येँ(नेपालभाषा टाइम्स)÷स्वनिगःया पूर्व मेयरतय् संगठन मेयर्स फोरमं बागमति प्रदेशया नवनियुक्त स्वास्थ्य मन्त्री रामेश्वर श्रेष्ठयात भिंतुना देछाःगु दु । फोरमया संस्थापक नायःलिसें येँ महानगरपालिकाया पुलांम्ह मेयर विद्यासुन्दर शाक्यया सभापतित्वय् जूगु छगू ज्याझ्वलय् बागमति प्रदेश स्वास्थ्य मन्त्री श्रेष्ठयात भिंतुना देछाःगु खः ।
उगु इलय् प्रदेश मन्त्री श्रेष्ठं थः म्हिगः महालक्ष्मी नगरपालिकाया मेयर जुयागु ईया अनुभवपाखें सयेके सीके यानाः सकसिगुं सल्लाह, सुझावकथं न्ह्याः वनेगु प्रतिवद्धता प्वंकादिल । वय्कलं म्हिगःया दिनय् मेयर फोरम व स्वनिगःया स्थानीय तहया विकास निर्माण व उकी फयेमालाच्वंगु थीथीकथंया समस्या, बाधा अड्चन आदिया पृष्ठभूमिइ न्ह्यःने हःगु नीर्ति, कार्य योजना, धारणायात ध्यानय् तयाः ज्या याना वनयेगु जुइ धयादिल ।
म्हिगः मेयर जुयाच्वनादीगु इलय् फोरमय् नापं च्वनाः ज्या यानाम्ह छम्ह दुजः थौं बागमति प्रदेशया मन्त्री जुयादीगुलिं लसता प्वंकादिसें फोरमया नायःलिसें येँ महानगरया पुलांम्ह मेयर शाक्यं म्हिगः स्थानीय तहय् च्वनाः ज्या यानागु इलय् प्रदेश सरकारपाखें गज्याःगु साथ सहयोगया अपेक्षा यानागु खः, थौं व हे सहकर्मि प्रदेश सरकारय् वनेधुंकाः म्हिगः यानागु अपेक्षा पूवंकेत कुतः याइ धइगु खँय् थःपिं विश्वस्त दु धयादिल ।
प्रादेशिक संरचनायात चलायमान याना यंकेत महत्वपूर्ण भूमिका म्हिते फयेमा व कार्यकाल नं सफल जुइमा धकाः भिंतुना देछासे वय्कलं संघ, प्रदेश व स्थानीय स्वंगुलिं तहया सरकार दथुइ समन्वय, सहकार्य, सहअस्तित्व कायम यानाः जनताया सरोकार व जन अपेक्षायात पूवंकाः देय्यात समृद्धिया लँपुइ न्ह्याकेमाःगु खँय् बः बियादिल ।
फोरमया सचिवलिसें मध्यपुर थिमि नगरपालिकाया पुलांम्ह प्रमुख मदनसुन्दर श्रेष्ठं स्वनिगःया समग्र विकासया निंतिं स्वनिगः बाहेकया मेमेगु जिल्ला सरह प्रदेशं प्राथमिकता बीगु स्वयेमाः धयादिल ।
LEAVE YOUR COMMENTS