ओली–नेपाल पुचः हानं वार्ता
येँ – प्रधानमन्त्री केपी शर्मा ओलीं माधव नेपाल पुचःयात हस्ताक्षर लित कायेगु लागिं बिउगु अल्टिमेटम क्वचाःगु दु । तर ओलीया अल्टिमेटम माधव पुचलं अस्वीकार याःगु कारणं आः एमालेया विवाद गुकथं न्ह्याः वनी धइगु न्ह्यसः पिहां वःगु दु ।
कांग्रेस सभापति शेरबहादुर देउवा– यात प्रधानमन्त्री दयेकेगु लागिं माधव पक्षया २३ म्ह सांसदतय्सं यानातःगु हस्ताक्षर लित कायेमाःगु माग यासें यदि म्हिगः तकया दुने नं थ्व हस्ताक्षर लित मकाल धाःसा एमाले एकताया सम्भावना भंग जुइगु ख्याच्वः बिउगु खः । तर माधव नेपालं अज्याःगु ख्याच्वः वःसां नं हस्ताक्षर लित कायेत धाःसा अस्वीकार याःगु खः ।
नेपाल पक्षं अल्टिमेटमयात माने मयाइगु जुइवं आः गय् यानाः न्ह्याः वनेगु धइगु खँयात कयाः म्हिगःनिसें वालुवाटारय् दौडधुप शुरु जूगु खँ धाःगु दु । वालुवाटारया नेतातय्सं नेपालयात ह्ययेकेगु लागिं थीथी कथंया कुतः याना हःगु खः ।
थ्वहे झ्वलय् माधव पक्षं आः खँ न्ह्यःने यंकेगु खःसा निगू पुचःया मनूत तयाः गठन यानातःगु कार्यदलया मुँज्या च्वनाः बैठक न्ह्याकि धकाः सुझाव बिउगु खः । कार्यदलया बैठक च्वनेगु बारे म्हीग बहनी प्रम ओली व माधव पुचःपाखें भीम रावलया दथुइ खँल्हाबल्हा जूगु खः । वयां लिपा म्हिगः उगु कार्यदलया बैठक नं च्वनेगु ज्या जूगु खः । उगु कार्यदलय् माधव पुचःया संयोजक भीम रावल खःसा ओली पुचःया संयोजक सुवास नेम्बाङ खः । म्हिगः बहनी सिंहदरवारय् निगुलिं पुचः दुथ्याःगु कार्यदलया बैठक च्वंगु खः ।
प्रधानमन्त्री ओलीं निक्वःखुसी संसद विघटन यायेवं पार्टीया विवाद हानं तच्वया वंगु खःसा थ्व कार्यदल नं बन्द जूगु खः । आः थःगु सरकार संकटय् लायेवं ओलीं माधव पक्षयात ह्ययेकेत कार्यदल हानं म्वाकूगु खः ।
छुं जुयाः माधव पक्षं हस्ताक्षर लित काये मखु धाल धाःसा ओलीं छु याइ धइगु खँ धाःगु मदुनि । माधव पक्षं धाःसा पार्टीयात जेठ २ गतेया अवस्थाय् यंकेमाःगु लिसें चुनाव जुल धाःसा थःगु पक्षयापिंत टिकट सुनिश्चित यायेमाःगु खँ तःगु नं पिहां वःगु दु ।
LEAVE YOUR COMMENTS