लुँ दुगु झोला वांछ्वया गाडी टाप

येँ (नेपालभाषा टाइम्स) – येँया व्यस्त शहरय् म्हिगः छगः गाडी लुँ व पेस्तोल दुगु झोला वांछ्वयाः बिसिउँ वनेत ताःलाःगु दु। येँया कमलादी लुँया बिस्कुट व निपु पेस्तोल तयातःगु झोला वांछ्वयाः छगः स्र्कोपियो गाडी बिसिउँ वंगु खः । प्रहरीं चेकजाँच यानाच्वंगु खनेवं बा ६ च ५५१९ नं.या गाडी झोला वांछ्वया बिसिउँ वंगु खँ धाःगु दु ।

प्रहरीं बरामद याःगु उगु झोलाय् न्हापां १५ किलो लुँ दुगु धाःगु खःसां लिपा नेपाल रत्न तथा आभुषण महासंघय् यानाच्वंगु परीक्षणय् बागू किलो जक लुँ जूगु व मेगु साढे १४ किलो धाःसा वहलय् लुँ भुनाः लुँया बिस्कुट थें दयेकातःगु सीदुगु खः ।

काठमाडौं प्रहरीं परिसरं म्हिगः हे पत्रकार सम्मेलन यानाः लुँ दुगु झोला वांछ्वयाः गाडी बिसिउँगु बारे जानकारी बिउगु खः । पत्रकार सम्मेलनय्ए सएसपी श्याम ज्ञवालीं १५ किलो लुँ दुगु धाःगु उगु झोलाय् च्वंगु बागू केजी लुँ जक सक्कली जूगु व मेगु नक्कली जूगु खँ धयादीगु खः । वय्कःया कथं उगु झोलाय् ४२ लाख ९ हजार तका बराबरया लुँ व १५ लाख ५६ हजार तका बराबरया वहलिसें गोली तयामतःगु निपु पेस्तोल बरामद जूगु खः ।

पत्रकार सम्मेलनय् एसएसपी ज्ञवालीं चेकजाँच छले यानाः बिसिउँ वंगु गाडीयात पिछा याःसां झोला वांछ्वयेवं प्रहरीं झोलाय् केन्द्रीत जूबलय्गा डीयात ज्वनेमफुगु खँ धयादीगु खः । थुलिमछि लुँ व पेस्तोल तयातःगु झोला वांछ्वया बिसिउँ वंगु गाडीयात प्रहरीं ज्वने मफुगु खँय् धाःसा सुरक्षाविद्तय्सं आश्चर्य प्वंकूगु दु। येँ थेंज्याःगु थाय् थासय् सिसि क्यामेरा तयातःगु शहरय् तकं अपाय् मछिग्वःगु गाडियात गन वंगु धयागु लुइकेमफुगु धयागु प्रहरीया असफलता जूगु खँ सुरक्षाविद्तय्सं धाःगु दु ।

गाडीयात ज्वनेमफुगु धाःगुलिं थ्व घटनाय् हे शंकास्पद जूगु हेडक्वार्टरया हे प्रहरीतय् धापू दु। एसएसपी ज्ञवालीं धाःसा थ्व घटनाय् संलग्नपिं नक्कली लुँ मीपिं गिरोह जुइमाःगु खँ धयादीगु दु। पत्रकार सम्मेलनय् नक्कली लुँ वांछ्वयाः सक्कली लुँ ज्वनाः बिसिउँ वंगु नं जुइफु धकाः न्यंगु न्ह्यसलय् धाःसा वय्कलं थ्व बारे अनुसन्धान लिपा हे जक सीदइगु लिसः बियादीगु दु। प्रहरीं पत्रकार सम्मेलनय् गाडीया नंम्बर धाःसां गाडीधनीया नां धाःसा सार्वजनिक याःगु मदुनि ।

प्रहरीया कथं थौंकन्हय् लँया भाः तच्वःगुलिं चिनियाँ नाकां अवैधढंगं लुँ हयाच्वंपिंसं भचा दंकं मीगु यानाच्वंगु दु। थुकिया लबः कायेत नक्कली लुँ मीगु गिरोह सक्रिय जूगु अनुमान प्रहरीया दु ।