कोरोनाविरुद्ध विश्व छप्पँ जुइमाःगु इलय् अमेरिकाया ल्वापुखिचा पह जारी

ने.सं. ११४० चौलाथ्व २ (चैत १३)

एजेन्सी- संयुक्त राष्ट्र संघया महासचिव एन्टोनियो गुटेरसं कोराना भाइरस मानवताया निंतिं खतरा जूगु व थुकिया विरुद्ध विश्व छप्पँ जुयाः ल्वायेमाः धयाच्वंगु इलय् अमेरिका धाःसा कोरोना भाइरस सुरु जूगु देय्यात कयाः ल्वापु थयाच्वंगु दु ।

सम्पन्न देय्तय् पुचः जी सेभेनया विदेश मन्त्रीतय् दथुइ छगू वक्तव्यय् कोरोना भाइरससया स्रोत सम्बन्धी खँग्वः तयेगु खँय् हे मतभेद जूगु दु ।
अमेरिकां वक्तव्यय् चीनं नियतवश गलत सुचं बीगु अभियान न्ह्याकूगु खँ न्ह्यथनेमाः धाःगु दुसा मेगु देय्तय्सं धाःसा थज्याःगु ज्यां अनवाश्यक विभाजन हइ धासें थ्व खँग्वः तयेत अस्वीकार याःगु दु । अमेरिकी विदेशमन्त्री माइक पोम्पेओं बैठकय् चीनं भाइरसया स्रोत बारे अनर्गल रुपं षडयन्त्रया सिद्धान्त न्यंकाच्वंगु जानकारी थःपिंके दुगु खँ धयादीगु खः ।

अमेरिकी राष्ट्रपति डोनाल्ड ट्रम्पं नं ताःई न्ह्यव निसें कोभिड १९ यात चिनियाँ भाइरस धायेगु याना वयाच्वंगु खः ।थुकिं तम्वःपिं चिनियाँ अधिकारीतय्संनं थौंकन्हय् अमेरिकी सेनां हे चीनय् भाइरस दुत हःगु द्वपं बीगु यानाच्वंगु दु ।

थ्व हे दथुइ संरासंया महासचिव गुटेरसं धाःसा कोरोना विरुद्धया ल्वापु याकः याकः देय् कुतः जक पर्याप्त मजूगु खँ धाःगु दु ।
संरासं आः आधारभूत स्वास्थ्य सेवा तक मदुगु जोखिमपूर्ण देय्या ग्वाहालिया निंति. निगू अर्ब डलरया कोषया घोषणा याःगु दु ।
महासचिवं धाःगु दु ‘यदि थ्व महामारीयात विकसित देसय् जक नियन्त्रण यानाः विकासोन्मुख देशय् न्यंके बीगु खःसा थुकिं दसौं लाख मनूतय् ज्या वनी ।’

‘उलि जक मखु, थुकिं भाइरसयात थःगु स्वरुप हिलेत ह्वःताः बी,थथे स्वरुप हिल धाःसा कोरोना विरुद्ध दयेकीगु खोपं नं ज्या बीमखु,, अले हाकनं फुक्कसितं आक्रमण यायेगु सुरु यानाहइ ।उकिं थ्व विरुद्ध बछि जक लडाइँ ल्वानाः ज्या मवः ।’

(ने. सं. ११४० चाैलाथ्व द्वितीया / वि. सं २०७६ चैत १३, बिहिवाः)

सम्बन्धित बुखँ

LEAVE YOUR COMMENTS